မနဳလာ၊ ဖေဖဝ်ဝါရဳ ၁
နကဵုကြုက် သၞောတ်ကမ်လှောဝ်အမေရိကာန် နွံပ္ဍဲဖဳလေတ်ဖေန်တံဂှ် ယဝ်မိက်ဂွံကဵုကလေၚ်ပလံၚ်အာ ဇရေၚ်အမေရိကာန်မ္ဂး ပ္ဍဲၜဳကြုက်သၠုၚ်ကျာ မဒှ်ဒၟံၚ်ပရေၚ်ကယျာန်ဓဝါန်ဂှ် သွက်ဂွံဒေါအ်ကဵုပရေၚ်ဂၠါဲဒၟံၚ်သၞတံဂှ် သမ္မတဖဳလေတ်ဖေန် မာကောသ် ဂျူနဳယျာ ဟီုလဝ် ပ္ဍဲဂိတုဂျာန္နဝါရဳ ၃၁ တေံရ။
သွက်ဂွံပ္ကတ်ပ္ကေၚ်ပရေၚ်ပၞာန်ပံၚ်တောဲ ညံၚ်ဂွံဒှ်ဒၟံၚ်ဒတုဲသွက်ဂွံလုပ်ပေါဲပၞာန်ဂှ် သၞာံတုဲကၠုၚ် ဂိတုဨပရဴတေံ အမေရိကာန် ဖျေံလဝ်သၞောတ်ကမ်လှောဝ် တိုၚ်ဝှောန် မပန်ခြာဟွံသ္ၚောဲဟွံကြပ်တံဂှ်ရ။
သွက်ဂွံဖါဲပ္တိတ်ကဵုသၞောတ်ကမ်လှောဝ်ဏံဂှ် ကြုက် အာတ်မိက်လဝ် ဖဳလေတ်ဖေန် ဂၠိုၚ်ၚ်ကဵုဝါတုဲ ဟိုတ်နူအမေရိကာန် ဖျေံလဝ်ကမ်လှောဝ်ဂှ်တုဲ ပထဝဳပရေၚ်ဍုၚ်ကွာန် မဒးဇီုဒိဓဗတ်ကၠုၚ်တံကဵု ပရေၚ်ပြိုၚ်ပ္ကာန်လွဟ်လက်နက်တံ ဒှ်ကၠုၚ်မာန်ရောၚ် ဟီုဂးလဝ်ရ။
ပ္ဍဲအ္စာပရိုၚ်ဂမၠိုၚ် သၟာန်တဴ စပ်ကဵုကြုက်မပါ်ပါဲကၠုၚ်ဂှ်တုဲ သမ္မတမာကောသ်ဂှ် ပ္ဍဲကဵုကြုက်ဂှ် ကမ်လှောဝ်ခိုဟ်နူညးတံ နွံမံၚ်ဗွဲမဂၠိုၚ်ဂၠေၚ်တုဲ စပ်ကဵုသၞောတ်ကမ်လှောဝ်ကြုက် အခိၚ်ဖဳလေတ်ဖေန် မုဟွံဟီုဂးမွဲသာ်ဂှ် ဒဒှ်မပါ်ပါဲကၠုၚ် လ္တူသၞောတ်ကမ်လှောဝ်ညးတံဂှ်ဝွံ ကၠိုဟ်ကေတ်ဟွံမာန် က္တဵုဒှ်ဒၟံၚ်ရောၚ် ဟီုရ။
ဒဒှ်မဟီုဒၟံၚ် ပိုၚ်ပြဳဒၟံၚ်တိဍာ်ညးတံဂှ် ဒေါအ်ကဵုတုဲ ညံၚ်ဟွံဂွံကဵုပလာပ်ပထုဲ ကုသၟာတမ္ၚာညးတံဂှ်ကီု ဒဒှ်မဂၠါဲဒၟံၚ်သၞ ပ္ဍဲၜဳကြုက်သၠုၚ်ကျာဂှ် ဒေါအ်ဒေၚ်ဏောၚ် ယဝ်ရတုပ်စိုတ်မ္ဂး နကဵုဖဳလေတ်ဖန် ကလေၚ်ပအပ်ကဵုအာ သၞောတ်ကမ်လှောဝ်အမေရိကာန်ဂှ်ဏောၚ်ဂှ် သမ္မတမာကောသ် ဟီုဂးလဝ်ရ။
ပရေၚ်ကြုက်ဂၠါဲသၞ မကၠောန်ဒၟံၚ်လၟုဟ် အရာအိုဿီုဂှ် ယဝ်ရဒေါအ်ကၠေံမ္ဂး နကဵုညးတံ ကလေၚ်ပအပ်အာကဵု သၞောတ်ကမ်လှောဝ်အမေရိကာန်ဂှ်ဏောၚ် မိက်ဂွံသ္ဂးသာ်ဝွံရ။
သၞောတ်ကမ်လှောဝ်အမေရိကာန် မပန်ဗလးကမ်လှောဝ် ခြာဟွံသ္ၚောဲဟွံကြပ်နာနာသာ်ဂွံဂှ် ဟိုတ်နူဖျေံစွံလဝ်တုဲ ယဝ်ပဋိပက္ခဒှ်ကၠုၚ်မ္ဂး စပ်ကဵုအန္တရာယ် ပွန်ညးတံ ဒးဒုၚ်ဗ္တိုက်အာဂှ်တုဲ ကြုက်ဂွိၚ်ဒၟံၚ်ရ။
ပ္ဍဲၜဳကြုက်သၠုၚ်ကျာ ဗ္ဒါဲဒၞါဲဒပ်မၚ်ပြၚ်ၜဳ ကြုက်ကဵုဖဳလေတ်ဖေန်တံ လေပ်ဒှ်ကယျာန်ဓဝါန် မွဲဏှမွဲဏှဂှ် ဒၟါနူဖျေံလဝ်သၞောတ်ကမ်လှောဝ်ဏံ မဒှ်ရောၚ် တမ်ပရိုၚ်ပရေၚ်ပၞာန် ဟွံမိက်ထ္မံက်ယၟုမွဲတၠ ဟီုလဝ်ရ။
Ref; AP