ဝါယှေန်တာန်၊ ဖေဖဝ်ဝါရဳ ၂
သမ္မတအမေရိကာန် ဒဝ်နေဝ်ထြာမ်ဝွံ စနူဂိတုဖေဖဝ်ဝါရဳ ၁ ဏံတုဲ ကံက်အာအခေါန် လ္တူကနေဒါကဵု မက္ကသဳကိုဝ် ၂၅ တၟံကၠံတုဲ လ္တူကြုက်ဂှ် ကံက်အာ ၁၀ တၟံကၠံဏောၚ်ဂှ် နူသ္ၚိဗု ဟီုလဝ်ရ။
ဆ္ဂး သမ္မတထြာမ်ဂှ်တှ်ေ လ္တူကၠေၚ်ဍေန်ကနေဒါဂှ် ဖအောန်တုဲ ကံက်အာအခေါန် ၁၀ တၟံကၠံရဏောၚ်ဂှ် ဟီုလဝ် ပ္ဍဲဂိတုဂျာန္နဝါရဳ ၃၁ တေံရ။
အကံက်အခေါန် အမေရိကာန် မစၞောန်ပျးလဝ် လ္တူပိဍုၚ်ဏံဂှ်ဝွံ စနူဂိတုဖေဖဝ်ဝါရဳ ၁၈ တုဲ လမျီုစလုပ်အာဏောၚ် မဒှ်ရ။
ဟိုတ်နူအဳယူ ဟွံဆက်ဆောံ ကုအမေရိကာန်ခိုဟ်ဟ်တုဲဂှ်ရ အနာဂတ်တေံ သီုဂွံကံက်ဂလိုၚ်ပ္တိုန်အာ ကုအဳယူဂှ်လေဝ် ဒဒှ်ရစဳဇန်လဝ်ဂှ် သမ္မတထြာမ် သ္ဂးရ။
ကံက်ဂလိုၚ်ပ္တိုန်အခေါန် လ္တူကနေဒါ ကေုာံ မက္ကသဳကိုဝ်တံဂှ်ဝွံ ဒှ်သွက်ဂွံတာဒၞါ ဒဒှ်မဂဥုဲၜူမာဲ ဖာန်တနာၚ် မလုပ်စိုပ်ဒၟံၚ် ဟွံဗဗွဲကဵုသၞောဝ်တုဲ ကောန်ဍုၚ်အမေရိကာန် ဂၠိုၚ်ကဵုပြကောဋိကိုဋ် မ္ဒးချိုတ်ဒၟံၚ်ဂှ်ရောၚ် သၞာဲဒဴလလောၚ်ပရိုၚ်သ္ၚိဗု ဂဴရိုဝ်လေန် လေဗေတ် ဟီုရ။
အခိၚ်ပရေၚ်သွံရာန်ဗၞိက် ကုဍုၚ်ဇိုၚ်ဝုတ်ဒိုဟ်တံ ကျဒၟံၚ်ဂှ် ဟိုတ်နူညးဆုဲပြံၚ်မံၚ်တန်တဴ ဟွံလုပ်သၞောဝ် တတ်ကၠောံပယျဵုတုဲ မလုပ်ကၠုၚ်အပ္ဍဲဍုၚ်အမေရိကာန်ဂှ်တုဲ မ္ဒးကံက်ဂလိုၚ်ပ္တိုန်အခေါန်သာ်ဏံဂှ် သမ္မတထြာမ် ကေၚ်ဟီုကၠုၚ်လဝ် ဂၠိုၚ်ၚ်ကဵုဝါရ။
အခိၚ်စန်ဒက်မာဲ ပေါဲရုဲမာဲဂှ် ထြာမ် ဟီုကၠုၚ်လဝ် ဒဒှ်ရကံက်အာအခေါန် လ္တူကပေါတ်ဗၞိက်ကြုက်တံ ဒဵုကဵု ၆၀ တၟံကၠံကီုလေဝ် ပ္ဍဲကဵုအာယုက်သမ္မတညး တ္ၚဲကၠာအိုတ်ဂှ် ရမျာၚ်ဍိုန်စှ်ေအာတုဲ ကလေၚ်သ္ၚဳဂၠိပ်အာ ကိစ္စဏံဏောၚ်ဂှ် ဟီုလဝ်ရ။
အပ္ဍဲကဵုအာယုက်သမ္မတညး အလန်ကၠာတေံဂှ်လေဝ် ထြာမ် ကံက်ဂလိုၚ်ပ္တိုန်လဝ်အခေါန် လ္တူကြုက်တုဲ ကြဴနူသၞာံ ၂၀၁၈ တုဲဂှ် ကပေါတ်ဗၞိက်ကြုက် လုပ်စိုပ်ကၠုၚ် အပ္ဍဲအမေရိကာန် အောန်စှ်ေကၠုၚ်လဝ်ရ။
ယဝ်ရ သမ္မတထြာမ် စိုပ်ကၠုၚ်သ္ၚိဗုမ္ဂး အကြာဍုၚ်ပရေၚ်ပိုန်ဒြပ်ဇၞော်အိုတ် လ္တူဂၠးတိဏံ ၜါဍုၚ်ဂှ် ပေါဲပၞာန်ပရေၚ်သွံရာန်ဗၞိက်တံ ဒှ်ကၠုၚ်မာန်ရောၚ် သၞာဲဒဴကြုက် ကဆံၚ်လ္တူမွဲတၠ ဟီုလဝ်တုဲ ညံၚ်ဟွံဂွံစွံ ဝါဒစဵုဒၞါဒတုဲဖဵုပူဂဵုဂှ် ဟီုလဝ်ရ။
ပ္ဍဲကဵုဝှဝ်ရာမ်ပရေၚ်ပိုန်ဒြပ်ဂၠးတိ မကၠောန်ဗဒှ်လဝ် ပ္ဍဲဍုၚ်ဒါဗတ် ဍုၚ်သွေတ်သလာန်ဂှ် လစှ်ေသ္ကိုပ်ဝန်ဇၞော်ကြုက် တုက်ယှိုဲကျေန်ဂှ်တှ်ေ ပ္ဍဲအရာသောၚ်ကလး အရာမဒးကယျာန်ဓဝါန်ပရေၚ်သွံရာန်ဗၞိက် အကြာအမေရိကာန်ကဵု ကြုက်ဂှ် ဒးဒှ်သွဟ် မၞုံကဵုဖဵုသီုၜါလ္ပာ်ဂှ်ကီု၊ နကဵုကြုက် ဒဒှ်ရမိက်ဂွံပလံၚ်ပ္တိုန်ဗၞိက် ဇရေၚ်အမေရိကာန်ဂှ် ဟီုလဝ်ရ။
ကြုက်၊ ကနေဒါ ကေုာံ မက္ကသဳကိုဝ်တံဝွံ ဒှ်ဍုၚ်သွံရာန်ဗၞိက်ဇၞော်အိုတ် ကုအမေရိကာန်တုဲ သၞာံတုဲကၠုၚ်တေံ ပ္ဍဲကဵုကပေါတ်ဗၞိက်အမေရိကာန် မပၠောပ်ပ္တိုန်လဝ်ဖအိုတ်ဂှ် ၄၀ တၟံကၠံဂှ်ဝွံ ဒှ်ကပေါတ်ဗၞိက်နူပိဍုၚ်ဏံရ။
ကနေဒါ ကေုာံ မက္ကသဳကိုဝ်ဂှ်တှ်ေ သွက်ဂွံသောၚ်ကလးကဵု ပရေၚ်အမေရိကာန် မဒှ်ဒၟံၚ်ဓဝိၚ်ဂှ်တုဲ ပ္ဍဲကဵုပယျဵုညးတံဂှ် ဖျေံစၟတ်လဝ်အစဳဇန်တၟိတၟိတံတုဲယျ မဒှ်ရ။
ကၠေၚ်တိ မဒးတတ်ကၠောံအာ ရုၚ်စက်သ္အးဇ္ၚးကၠေၚ်ဍေန် အမေရိကာန် ၜိုတ် ၄၀ တၟံကၠံဂှ်ဝွံ ဒးပၠောပ်နၚ် နူကဵုဍုၚ်သ္အာၚ်တံ မဒှ်တုဲ ဗွဲမဂၠိုၚ်ဂှ်တှ်ေ ပလံၚ်ပ္တိုန်ဒၟံၚ် ကနေဒါ မဒှ်ရ။
Ref: BBC