သဵု(လ်) ၊ ဨပရဴ ၂၉
သွက်ဂွံဘိုၚ်ဗ္တိုက်ကဵု လ္ပာ်ရုယှာ မဗ္တိုက်ၜက်ၜေတ်ဒၟံၚ်ယူကရုၚ်ဂှ်တုဲ ဗလးဏာလဝ် ကောန်ဒပ်ဂမၠိုၚ်ရောၚ် ကိုဝ်ရဳယျာသၟဝ်ကျာ သ္ပဒတန်လဝ် အလန်ကိုပ်ကၠာအိုတ်ရ။
နကဵုပၟိၚ် က္ဍိုပ်သ္ကိုပ် ကေန်ဂျုၚ်အာန်ဂှ် ဒဒှ်ရကောန်ပၞာန်ကိုဝ်ရဳယျာသၟဝ်ကျာ ရီုဗၚ်ကဵုလဝ် လ္ပာ်ကောန်ပၞာန်ရုယှာ ညံၚ်ဒေသကာသ်ရုယှာတံ ဂွံဗၠးၜးဂှ် ဌာန်ပရိုၚ် KCNA ကၟိန်ဍုၚ်ပိုၚ် ထ္မံက်ထ္ၜးလဝ်ရ။
စပ်ကဵုကောန်ဒပ်ကိုဝ်ရဳယျာသၟဝ်ကျာဂမၠိုၚ် မဂံၚ်သ္ကာဂှ်တုဲ ဇၞော်သ္ကိုပ် စပ်ကဵုလ္ပာ်ပၞာန်ရုယှာ ဗာလဳရဳ ဂဳရာသဳမအ် ဟီုထိုၚ်သးလဝ်တုဲ ဂွံမွဲအံၚ်ဂှ် တၚ်လလောၚ်တြး ပျုၚ်ယာန် မံက်တိတ်ကၠုၚ် သာ်ဏံရ။
ညအ်ဂှ် ကောန်ပၞာန်ကိုဝ်ရဳယျာသၟဝ်ကျာတံ ဒဒှ်ရပါလုပ်ဗ္တိုက်ကဵုလဝ် လ္ပာ်ညးတံဂှ် လ္ပာ်မဝ်သကိုဝ် ဟီုပ္တိတ်ကၠုၚ် အလန်ကိုပ်ကၠာအိုတ်ရ။
ကိုဝ်ရဳယျာသၟဝ်ကျာ ဗလးဏာလဝ် ကောန်ဒပ် ၁၁၀၀၀ တၠ ပ္ဍဲရုယှာတုဲ ပ္ဍဲကဵုဏံ ၁၀၀၀ တၠဂှ်ဝွံ အပ္ဍဲပွိုၚ်ပိဂိတုတုဲကၠုၚ်တေံ ဒဒှ်ရဒးပြဟ်လလုဲအာလဝ်ဂှ် သၞာဲဒဴဍုၚ်ပလိုတ်ဂမၠိုၚ် ဟီုလဝ်ရ။
ဒေသကာသ် နူဒပ်ယူကရုၚ် မၞုံပလိုတ်ကၟိန်ဍုၚ် မသီဂွံလဝ်ဂှ် ၜိုန်ရရုယှာ ဟီုဂးဒၟံၚ် ကလေၚ်ထိၚ်ဂွံလဝ်ကီုလေဝ် ယူကရုၚ် တးပါဲလဝ်ရ။
ဒဒှ်မသ္ဂုတ်သွာတ်လဝ် သွက်ဂွံဗလးဏာ ကောန်ဒပ်ဂမၠိုၚ် ဍုၚ်ရုယှာဂှ်ဝွံ ဒှ်တၚ်တုပ်စိုတ်ပရေၚ်စဵုဒၞါ အကြာၜါဍုၚ်ဏောၚ်ဂှ် KCNA ထ္မံက်ထ္ၜးလဝ်ရ။
ညးမဗ္တိုက် သွက်ဗဗွဲဓဝ်ဂမၠိုၚ်ဝွံ ဒှ်သရာဲသဂံၚ် သီုညးဖအိုတ်တုဲ ဒှ်ညးစၞး မသၠုၚ်ပ္တိုန်စရာဲ ဍုၚ်မိတိမတံဏောၚ်ဂှ် က္ဍိုပ်သ္ကိုပ် ကေန်ဂျုၚ်အာန် ဟီုရ။
ပ္ဍဲကဵုအကာဲအရာ မ္ဒးဆေၚ်ကၠုၚ်မုက် ကုဘဲဍုၚ်သ္အာၚ်တံဂှ် သွက်ဂွံဘိုၚ်ရီုဗၚ်ညးသ္ကအ်ဂှ် က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အာန်ကဵု သမ္မတရုယှာ ဗလာဒဳမာပူတေန်တံ တုပ်စိုတ်ထ္ပက်လဝ်စၟတ်တဲရောၚ် သ္ဂးရ။
ကောန်ဒပ်ကိုဝ်ရဳယျာသၟဝ်ကျာဂမၠိုၚ်ဝွံ ဒှ်ညးမဒုၚ်ပကတ်ပ္ကေၚ်လဝ် ဟွံဍိုက်ပေၚ်တံရောၚ် ဒပ်ပၞာန်ဗျိတိၚ် ဟီုလဝ်ကီုလေဝ် ယူကရုၚ်ဂှ်တှ်ေ ဟိုတ်နူဒှ်ကောန်ပၞာန်ကိုဝ်ရဳယျာသၟဝ်ကျာတုဲ တၚ်ကော်ဆဴနွံဒၟံၚ်ရောၚ် ဟီုလဝ်ရ။
Ref: BBC