မနဳလာ၊ မေ ၂၁
ပ္ဍဲကဵုပေါဲရုဲမာဲကၠတ်ထဝ် ပၟိက်ဇၞော်တုဲ ပရေၚ်ပြိုၚ်ပ္ကာန်လေဝ် သ္ကာတ်မြဟ်ဂှ် မဟာမိတ် ဒုသမ္မတ သာရာဒူတာတေ ပရေၚ်ဆက်ဆောံဟွံခိုဟ်ကုညးတံဂှ် အကာဲအရာခိုဟ်မံၚ်ဏောၚ် ကြဴနူဂွံစၟဳကေတ်တုဲဂှ် သမ္မတဖဳလေတ်ဖေန် ဝှာဒဳနာန် မာကောသ် ဂျူနဳယျာ ဟီုကၠုၚ် ဒဒှ်ရပံက်လဝ်ဂၠံၚ် သွက်ဂွံကလေၚ်ညဳသာ ကုဂြောဝ်ဂတာ ဒူတာတေရ။
ပ္ဍဲကဵုဗဳဒဳယောသ္ကုတ် မထ္မံက်ထ္ၜးလဝ် ပ္ဍဲမုက်လိက်ဝှေတ်ဗော် ပ္ဍဲဂိတုမေ ၁၉ ဂှ် သမ္မတမာကောသ်ဂှ်တှ်ေ နကဵုညး လ္တူနူကဵုသၞဂှ် နွံပၟိက်ကဵုမိဿဟာဲဏောၚ် ဟီုလဝ်ရ။
သမ္မတမာကောသ်ဝွံ အပ္ဍဲကဵုအာယုက်ညးမသှ်ေဒၟံၚ်ပွိုၚ်ပိသၞာံဏံ ညံၚ်ကိစ္စရန်လဝ်ဂွံထ္မံက်အာရုပ်ရဴဂမၠိုၚ် ရုပ်ရဴဂွံမံက်ဂတဝ်ကၠုၚ်ဂှ် ပ္တိတ်ဒၟံၚ်ဇြဟတ်ရ။
အတိုၚ်သၞောဝ်ဖဳလေတ်ဖေန်မ္ဂး သမ္မတမွဲတၠဝွံ ဂွံအခေါၚ်ယိုက်ဂၠေၚ်တာလျိုၚ် တြဴသၞာံ မွဲအလန်ဓဝ်ရ။
ဂြောဝ်ဂတာပရေၚ်ဍုၚ်ကွာန် ဇြဟတ်ဇၞော်ၜါဏံ ပ္ဍဲသၞာံ ၂၀၂၂ တေံ ပံၚ်တောဲတုဲ လုပ်ပြိုၚ်လဝ်ပေါဲရုဲမာဲတုဲ သီုၜါဂြောဝ်ဂတာ ဂွံအံၚ်ဇၞးလဝ်တုဲ ဗွဲကြဴဂှ် က္တဵုဒှ်အာလဝ်ပဋိပက္ခတုဲ သမ္မတမာကောသ်ဂှ်တှ်ေ သွက်ဂွံကလေၚ်ဒက်ပ္တန်ပရေၚ်ဆက်ဆောံဂှ် ပံက်လဝ်ကဵုဂၠံၚ်ရောၚ် ဟီုကၠုၚ်လဝ်ရ။
ဒုသမ္မတ သာရာဒူတာတေဝွံ ဒးဆေၚ်ဒၟံၚ်မုက်ကဵု ပရေၚ်စောဲစုတ် ပရေၚ်ပ္တိုန်ဒုဟ်တံတုဲ ဒးဒုၚ်တာဒၞါနူ ပွမကေတ်ဒၞါဲပရေၚ်ဍုၚ်ကွာန်မာန်ဂှ်ရ အစဳဇန်ညးသ္ဂောံလုပ်ပြိုၚ် ပေါဲရုဲမာဲသမ္မတ သၞာံ ၂၀၂၈ တေံဂှ် လီုအာမာန်ရ။
မအံက်ညး သမ္မတတြေံ ဒူတာတေဝွံ ၜိုန်ဒးဒုၚ်ရပ်လဝ် ပ္ဍဲရုၚ်သၞောဝ်ဓဝ်ဂၠးတိ ဍုၚ်ဒဳဟုက်ကီုလေဝ် ပ္ဍဲကဵုဌာန်တိုပ်ကသုက်ညး ဍုၚ်ဒါဗံၚ်ဂှ် ဂွံဇၞးလဝ် ပ္ဍဲပေါဲရုဲမာဲမြုဝန်ဍုၚ် ပိုတ်တ်သ္ကုတ်တ်ရ။
ပ္ဍဲပေါဲရုဲမာဲ ဂိတုမေ ၁၂ ဂှ် မဟာမိတ်မာကောသ်ဂမၠိုၚ် ဂွံဇၞးဏောၚ် စၟဳစလဝ်ကီုလေဝ် မဟာမိတ်ဂြောဝ်ဂတာဒူတာတေတံလေဝ် ဟိုတ်နူအကာဲအရာခိုဟ်ဒၟံၚ်တုဲ ပ္ဍဲကၠတ်ထဝ်ဂှ် ဒးဂဗဒၟံၚ်ကဵု အကာဲအရာ မဒးကလေၚ်ပညဳဇြဟတ်မာန်ရ။
စပ်ကဵုပရေၚ်သာရာဒူတာတေ ဟီုလဝ် ဒဒှ်ရတက်လဝ်ကျာ ကုရဲဂစိုတ်မၞိဟ် ဂွံကၠတ်ဂစိုတ် သမ္မတမာကောသ်တုဲယျဂှ်တုဲ ပရေၚ်စောတ်စောဲပ္တိုန်ဒုဟ်ဂှ်ဝွံ ဟွံဆက်စပ်ကဵုညးတုဲ ပရေၚ်စောတ်စောဲပ္တိုန်ဒုဟ်ဝွံ ဆက်စပ်ကဵုကၠတ်ထဝ်ရဏောၚ်ဂှ် ဟီုလဝ်ရ။
Ref: Reuters