ဝါယှေန်တာန်၊ မေ ၂၃
က္ၜၚ်ကျာ နူဍုၚ်ကာတာ ကဵုလဝ်ပရၚ်တဲတုဲ ညးထံက်ဂလာန် သမ္မတဒဝ်နေဝ်ထြာမ် လ္ၚဵုတံလေဝ် မ္ဒးပါ်ပါဲလဝ် လ္တူကိစ္စ မရပ်စပ်အာက္ၜၚ်ကျာဏံ နဒဒှ် Air Force One ဂှ် အမေရိကာန် ဂွံဒုၚ်လဝ်တဲတုဲယျဂှ် သၞာဲဒဴဌာနဝန်ဇၞော်ကာစဵုဒၞါဂမၠိုၚ် ဟီုလဝ်ရ။
က္ၜၚ်ကျာ Boeing 747 နူဍုၚ်ကာတာ မကဵုလဝ်ဂှ် ဌာနဝန်ဇၞော်ကာစဵုဒၞါ ဂွံဒုၚ်လဝ်တဲ ဗွဲမဗဗွဲကဵုသၞောဝ်ဖေဝ်ဒရာ တုဲယျဂှ် ယှံၚ်ပါနေဝ် ညးမၞုံအခေါၚ်ဟီုဂး ဇၞော်သ္ကိုပ်ပေန်တဂေါန် ဟီုလဝ် ပ္ဍဲဂိတုမေ ၂၁ တေံရ။
က္ၜၚ်ကျာဏံ သၞာဲဒဴရုၚ်သမ္မတဂမၠိုၚ် ကၠာဟွံဂွံဍိုက်ဏီဂှ် ဒးသၠုၚ်ပ္တိုန်ဒၟံၚ်ကဆံၚ်ဍေံဏီဏောၚ်ဂှ် သၞာဲဒဴအမေရိကာန်ဂမၠိုၚ် ဟီုလဝ်ရ။
သ္ၚိဗု ဟီု ပရၚ်တဲဝွံ လုပ်သၞောဝ်ကီုလေဝ် ဟိုတ်နူတၚ်လလောၚ်တြး ဂွံဒုၚ်ကေတ်ဒုၚ် ပရၚ်တဲဏံ ပ္ဍဲသတ္တာဟတုဲကၠုၚ်တေံဂှ်တုဲ ပရေၚ်ကယျာန်ဓဝါန်ဇၞော်ဇၞော် က္တဵုဒှ်အာလဝ်ရ။
က္ၜၚ်ကျာဏံဂှ် နူဂြောဝ်ဂတာဨကရာဇ်ကာတာ ကဵုလဝ်ပရၚ်တဲတုဲ ၚုဟ်မး ၄၀၀ ပြကောဋိကိုဋ်ဒဝ်ဠာ နွံရောၚ် ဂွံတီကေတ်ရ။
အခိၚ်အာယုက် သမ္မတထြာမ်အိုတ်မ္ဂး က္ၜၚ်ကျာဏံဂှ် ပြံၚ်ဏာ တိုက်ရံၚ်လိက်သမ္မတဏောၚ် သ္ၚိဗု ဟီုရ။
သွက်သမ္မတအမေရိကာန် ဂွံဍိုက်ဂှ် ဒးသၠုၚ်ပ္တိုန်ဒၟံၚ်ကဆံၚ် က္ၜၚ်ကျာဏံဏီဏောၚ်တုဲ ညံၚ်ဂွံဒုၚ်ဘဲဒဏ်လပှ် မက္တဵုဒှ်ကၠုၚ် ဟိုတ်နူနျူကလဳယျာဗ္တိုဟ်ထ္ကးမာန်ဂှ်လေဝ် ဒးကၠောန်မံၚ်ဏီဏောၚ် ဂွံတီကေတ်ရ။
အတိုၚ်သၞောဝ်သ္ဇိုၚ်ဒက်ပ္တန်အမေရိကာန်မ္ဂး ဟွံဂွံအခေါၚ်ကၠတ်ထဝ်မွဲသာ် ဒုၚ်ကေတ်တဲ ပရၚ်တဲနူဍုၚ်သ္အာၚ် ဟွံဂွံ သၞောတ်ဗ္ၜတ်လဝ်သာ်ဏံကီုလေဝ် ဟိုတ်နူဒုၚ်လဝ်တဲသာ်ဏံဂှ်တုဲ ပရေၚ်ကယျာန်ဓဝါန်ဂမၠိုၚ် က္တဵုဒှ်လဝ်ရ။
Ref: BBC