ဝါယှေန်တာန်၊ မေ ၂၄
သၞောဝ်အပြောံ သမ္မတဒဝ်နေဝ်ထြာမ် သ္ဂောံဖအောန်ဖျေံ ခရိတ်ရပ်စပ် ညံၚ်အခေါန်ဖလှာဂွံသက်သာဂှ် ပ္ဍဲဂိတုမေ ၂၂ ဂှ် အမာတ်ကၠတ်ထဝ်သၟဝ် အမေရိကာန်ဂမၠိုၚ် နူကဵုဗော်ရဳပါပလေတ်ကာန် သ္ကိုပ်သ္ကဂှ် သ္ပဒတန်လဝ်ရ။
ဟိုတ်နူသၞောဝ်အပြောံဏံတုဲ ခတှ်ဂၠိုၚ်ကၠုၚ်မာန်တုဲ သၞောတ်ပရေၚ်ထတ်ယုက်လေဝ် လီုလာ်မာန်ရောၚ် ညးပါ်ပါဲဂမၠိုၚ် ဟီုရ။
အခိၚ်လၟုဟ် နူကၠတ်ထဝ်လ္တူ သ္ပဒတန် သၞောဝ်အပြောံဏံတုဲမ္ဂး နဒဒှ်သၞောဝ်ဥပဒေမွဲဂှ် လမျီုလုပ်ကၠုၚ်ဏောၚ် မဒှ်ရ။
ဟိုတ်နူသၞောဝ်ဥပဒေဏံတုဲ ကဆံၚ်မၞိဟ်အဇာလဒေါဝ်ဂမၠိုၚ် ဒးဇီုကပိုက်ဏောၚ်ဂှ် ဒဳမိုဝ်ကရက်တအ် ဟီုဂးဒၟံၚ်အိုတ်ရ။
ကြဴနူသမ္မတထြာမ် ကလေၚ်စိုပ်ကၠုၚ်သ္ၚိဗု ပ္ဍဲဂိတုဂျာန္နဝါရဳ အလန်ဒုတိယတုဲဂှ် ပရေၚ်ထံက်ဂလာန် လ္တူညး ယအ်စှ်ေကၠုၚ်ကီုလေဝ် ဟိုတ်နူရဳပါပလေတ်ကာန်တအ် အုပ်ဓလီုဂွံလဝ်ကၠတ်ထဝ်တုဲ အစဳဇန်ညး ဗွဲမဂၠိုၚ် ဆက်တုဲရုပ်ရဴမံက်ကၠုၚ်ဏောၚ်ဂှ် ဂွံစၟဳကေတ်ရ။
ၜိုန်ရထြာမ် ထိၚ်ဒက်ဂွံလဝ်ကၠတ်ထဝ် ခိုဟ်ဟ်ကီုလေဝ် စဵုကဵုကၠတ်ထဝ်လ္တူဂှ်တှ်ေ ညးထိၚ်ဒက်ဟွံဂွံရ။
အမာတ်ကၠတ်ထဝ်လ္တူဂမၠိုၚ်ဝွံ တြဴသၞာံမွဲဝါ ဒးကလေၚ်လုပ်ပေါဲရုဲမာဲဂှ်ရ ဟွံဒးသ္ပကာကဵု ပရေၚ်သမ္မတ မကရေပ်ဓရတ်ကၠုၚ်တံဂှ်ပုဟ် သ္ဂးရ။
သၞောဝ်အပြောမ်ဏံဝွံ ပ္ဍဲဝၚ်ဍုၚ်အမေရိကာန်ဂှ် ပ္တိတ်ကၠုၚ်ဇြဟတ် သွက်ဂွံဖအောန်ဖျေံ ခရိတ်အရပ်စပ် ပရေၚ်မၚ်မွဲရံၚ်စံၚ်ပရေၚ်ထတ်ယုက် ဇၞော်ကဵုဇြဟတ်ဂှ်လေဝ် ဂျက်ဖရဳ ညးမဒှ်က္ဍိုပ်သ္ကိုပ်ဂကောံမၞိဟ်အောန် ကၠတ်ထဝ်သၟဝ်မွဲတၠ ဟီုရ။
သွက်ကောန်ဍုၚ်အမေရိကာန် သြန်လုပ်အောန်ဂမၠိုၚ် ဟိုတ်နူသၞောဝ်ဏံ မဖအောန်ဖျေံအာ ပရေၚ်ဒုၚ်ကဵုလျိုၚ် ပရေၚ်ထတ်ယုက်တံဂှ်တုဲ မၞိဟ် ၜိုတ် ၈ ပြကောဋိကိုဋ် ကလိဂွံအာပရေၚ်ဒုၚ်လျိုၚ် ပရေၚ်ထတ်ယုက်ဟွံသေၚ်ရပုဟ်ဂှ် ညးပါ်ပါဲဂမၠိုၚ် ဟီုလဝ်ရ။
Ref: AFP