လတ်အာန်ဂျလိသ်၊ ဂျောန် ၁၁
သွက်ဂွံစဵုဒၞါ ပေါဲထ္ၜးဆန္ဒ မဒစဵုဒဏး လ္တူပရေၚ်မဍိုက်ဗ္တိုက် ကုညးဆုဲပြံၚ်မံၚ်တန်တဴတံဂှ်တုဲ ပ္ဍဲအရာအလဵုအသဳဖေဝ်ဒရာ မခၠေဝ်ပလန်ကၠုၚ်ဂှ် သွက်ဂွံပါလုပ်ရီုဗၚ်မာန်တုဲ ဒဒှ်ရသမ္မတဒဝ်နေဝ်ထြာမ် ထပ်ဗလးဏာလဝ်ကောန်ဒပ်မၚ်မွဲကောန်ဂကူ ၂၀၀၀ ကဵု ကောန်ဒပ်မရေန် ၇၀၀ ပ္ဍဲဒေသလတ်အာန်ဂျလိသ်ဂှ် ပေန်တဂေါန် သ္ပဒတန်လဝ်ရ။
စပ်ကဵုပရေၚ်မဖျေံလဝ်ဇြဟတ်ကောန်ဒပ် ဗွဲမဂၠိုၚ်ဂၠေၚ်ဂှ်တုဲ စောဲအာဂဗုတ် လ္တူအလဵုအသဳဏောၚ်ဂှ် သ္ကိုပ်အုပ်ဓုပ်တွဵုရး ဂဴလဳဝှဝ်နဳယျာ ဂါဝေန် နျူသေန် ဟီုရ။
သၞာဲဒဴအခေါန်ဖလှာ နူကဵုပရေၚ်ကောပ်ကာဲပရေၚ်မၞိဟ်လုပ်တအ် ကြဴနူလုပ်ဍိုက်ဗ္တိုက် အလုံဍုၚ်လတ်အာန်ဂျလိသ်တုဲဂှ် ပ္ဍဲဂိတုဂျောန် ၆ ဂှ် စလဝ်ပေါဲထ္ၜးဆန္ဒ လဒေါဝ်ဍုၚ်ဂှ်ရ။
အလဵုအသဳဖေဝ်ဒရာ လလောၚ်တြးကၠုၚ်လဝ် ပေါဲထ္ၜးဆန္ဒတံဏံ ဟွံလုပ်သၞောဝ်ပုဟ်ကီုလေဝ် သမ္မတဂှ်တှ်ေ ဗလးလဝ် ကောန်ဒပ်မၚ်မွဲကောန်ဂကူရ။
ပ္ဍဲကဵုပရေၚ်ကောပ်ကာဲသၞောဝ်ဥပဒေ အပ္ဍဲကၟိန်ဍုၚ်ဂှ် ဒဒှ်မကောန်ပၞာန်အမေရိကာန်ဂမၠိုၚ် ပါလုပ်ကၠုၚ်ဂှ်ဝွံ ဒှ်လၟေၚ်ဒဒှ်ဓမ္မတာမွဲဟွံသေၚ်ရ။
ကောန်ဒပ်တံဏံဂမၠိုၚ်ဝွံ သွက်ဂွံပါ်ထ္ကးညးထ္ၜးဆန္ဒတံဂှ် သုၚ်စောဲလဝ်မခတိုဟ်ဍာ်ရမတ်တံဂှ်တုဲ ကောန်ၚာ်သၟတ်မွဲတၠ မပါလုပ် ညးဇီုကပိုက်ကလိဂွံလဝ်ဝပ်လေဝ် နွံဒၟံၚ်ရ။
ပ္ဍဲကဵုတ္ၚဲထ္ၜးဆန္ဒ မရနုက်ကဵုပန်တ္ၚဲဂှ် ညးထ္ၜးဆန္ဒဂမၠိုၚ် စံၚ်လဝ်ကွဳစက်မသက္ကုမၞိဟ်ဒဳဂှ်တုဲ ဒဒှ်ရပန်ဒၟံၚ်ကဵုမကမ်ရာဘာနွံဒၟံၚ်ဂှ် အ္စာပရိုၚ်အဝ်သတြေလျမွဲတၠ ဟီုရ။
ဟိုတ်နူထြာမ်တုဲ အကာဲအရာဟွံညိၚ်ဝတ် မ္ဒးက္တဵုဒှ်ကၠုၚ်ရောၚ် မြုဝန်ဍုၚ် လတ်အာန်ဂျလိသ် စောဲစပ်လဝ်ရ။
အကြာဏံ ဒဒှ်ရဒတူလိုၚ် ကရောံညးထ္ၜးဆန္ဒ ဍုၚ်လတ်အာတ်ဂျလိသ်တံဂှ်တုဲ ပ္ဍဲကဵုတွဵုရးတက္ကသက်လေဝ် ပေါဲထ္ၜးဆန္ဒဂမၠိုၚ် ဒှ်လဝ်ရ။
ပေါဲထ္ၜးဆန္ဒဂမၠိုၚ် သာသ္ကာတ်မြဟ်ကၠုၚ်တုဲ သၠဲလးကၠုၚ်ဒၟံၚ်ကီုလေဝ် အလဵုအသဳဂှ်တှ်ေ ဆက်တုဲလုပ်ဍိုက်ဗ္တိုက်ဒၟံၚ် ညးမဆုဲပြံၚ်မံၚ်တန်တဴတံဂှ်ဖိုဟ်ရ။
Ref: BBC