ဝါယှေန်တာန်၊ ဂျောန် ၁၃
သွက်တ္ၚဲသမ္မတအမေရိကာန် ဒဝ်နေဝ်ထြာမ် က္တဵုဒှ်မၞိဟ် ပေၚ် ၇၉ သၞာံဂှ် သွပ်လ္ပအ်ဂွံကၠောန်ဗဒှ်သ္ဘၚ်ပၠဒပ်ဇၞော်မွဲ လ္တူဍုၚ်ဇၞော် ဝါယှေန်တာန် ပ္ဍဲကဵုဏံကွဳစၚ်ခြပ်ပသဲ၊ က္ၜၚ်ကျာသၞေၚ်ဝဲ ကေုာံ ကောန်ဒပ်ဂၠိုၚ်ကဵုလ္ၚီ ပါလုပ်ဂှ်ဝွံ ဂိတုဂျောန် ၁၄ ဏံမ္ဂး ရုပ်ရဴမံက်ကၠုၚ်ရဏောၚ် မဒှ်ရ။
သွက်တ္ၚဲစၟတ်သမ္တီ ဒက်ပ္တန်ဒပ်ပၞာန်အမေရိကာန် ပေၚ် ၂၅၀ သၞာံဂှ် ဒုၚ်ဖအိုတ်သြန်ဒဝ်ဠာ ၄၅ ပြကောဋိကိုဋ်တုဲ စဳဇန်လဝ် သွက်ဂွံကၠောန်ဗဒှ်သ္ဘၚ်ပၠဒပ်ဏံရ။
ဒပ်ပၞာန်အမေရိကာန်ဝွံ လ္တူဂၠးတိဏံ ဒှ်ဂကောံဇြဟတ်ပရေၚ်ဗ္တိုက် မဇၞော်အိုတ်မွဲရောၚ် ထြာမ် ဟီုရ။
ဆ္ဂး သ္ဘၚ်ပၠဒပ်ဏံဂှ် လ္တူနူကဵုပ္တိုန်စရာဲ သွက်ဒပ်ပၞာန်ဂှ် ဒှ်ဒၟံၚ်သွက်ထြာမ်ဏောၚ်ဂၠိုၚ်ဂှ် ညးပါ်ပါဲဂမၠိုၚ် ဟီုရ။
ဒဒှ်မထြာမ် တုပ်ကၠုၚ်ကဵုတၠအဝဵုဂှ် ပရေၚ်မဗလးဏာလဝ်ကောန်ဒပ်မရေန် ကေုာံ ကောန်ဒပ်မၚ်မွဲစဵုဒၞါကောန်ဂကူ ပ္ဍဲကဵုဒၞါဲပေါဲထ္ၜးဆန္ဒ မဒစဵုဒစး လ္တူပရေၚ်ဍိုက်ဗ္တိုက်ညးဆုဲပြံၚ်မံၚ်တန်တဴ ပ္ဍဲဍုၚ်လတ်အာန်ဂျလိသ်ဂှ်ကီု သ္ဘၚ်ပၠဒပ် မစဳဇန်လဝ် သ္ဂောံကၠောန်ဗဒှ်အာ ပ္ဍဲဂိတုဂျောန် ၁၄ ဏံ ထ္ၜးပျးဒၟံၚ်ရ။
ပေါဲထ္ၜးဆန္ဒ ဒစဵုဒစး တၠအဝဵု ကေုာံ သၞောတ်ဨကရာဇ်ဂှ် စဳဇန်လဝ် သွက်ဂွံကၠောန်ဗဒှ်အာ ပ္ဍဲကဵုဍုၚ်ဇၞော် အလုံဍုၚ်အမေရိကာန်ရ။
ညးထ္ၜးဆန္ဒဂမၠိုၚ် ယဝ်ပ္တိတ်ကၠုၚ်ဇြဟတ် သ္ဂောံပလာပ်ပထုဲ သ္ဘၚ်ပၠဒပ်ဂှ်မ္ဂး သွက်ဂွံထ္ၜးပျးဇြဟတ်ဇၞော်နူဂှ်ဂှ် ထြာမ် ဖ္တိုက်ဖ္အောဝ်လဝ်ရ။
သ္ဘၚ်ပၠဒပ်ဏံဝွံ ကြဴနူပေါဲပၞာန်ပ္ၚံက်ၜဳ အလန်ပထမတုဲ ကြဴနူသၞာံ ၁၉၉၁ တုဲဂှ် ဒှ်ကၠုၚ်သ္ဘၚ်ပၠဒပ်ဇၞော်အိုတ် မကၠောန်ဗဒှ်လဝ် ပ္ဍဲဝါယှေန်တာန်ရ။
ပ္ဍဲကဵုဒၞါဲဒယှ်ဒယှ် နွံလ္တူဍုၚ်ဝါယှေန်တာန်ဂှ် ကောန်ပၞာန် ၇၀၀၀ ပြၚ် ဇက်ဂၠေါဲတိုန်အာဏောၚ် မဒှ်ရ။
ထြာမ်ဝွံ အပ္ဍဲကဵုအာယုက်သမ္မတညး အလန်ပထမတေံဂှ်ရ ဒဒှ်ရဒးဂၞပ်ကဵုပရေၚ်ပၠဒပ်ဂှ် ထ္မံက်ထ္ၜးလဝ်တုဲ တိုန်စိုပ်လဝ် သ္ဘၚ်ပၠဒပ်ပြၚ်သေတ် မကၠောန်ဗဒှ်လဝ် ပ္ဍဲပါရဳရ။
Ref: AFP