ဗရာတ်သေဝ်လ်၊ အံက်တဝ်ပါ ၂၇
သွက်ဂွံပညဳပညပ်သဳကၠဳပရေၚ်ၜိုဟ်လလမ်အနာဂတ် မွဲသ္ကုတ်မွဲသ္ကူဂှ် ဇရေၚ်ရတ်ယှာ ဒုၚ်ဗလးတဲ တိဍာ်ယူခရုၚ်ဟွံမာန်ပုဟ် ကၠာဟွံစိုပ်သဘၚ်သဳကၠဳ EU ပ္ဍဲဗရာတ်သေဝ်လ်ဂှ် သမ္မတ ဗိုလိုဒဳမာ ဇာလန်သကဳ ဟီုကဵုဌာန်ပရိုၚ် Euronews ရ။
ပြဟ်ဟ်ဏံ ညံၚ်ဂွံဒေါအ်ပန်ပှော်လၟုဟ် မဝ်သကို ဟွံဒုၚ်တဲဂှ် လ္တူရတ်ယှာ အမေရိကာန်ကဵု ယူရောပ်တံ ကၠောန်ပရေၚ်ကေတ်အရေဝ်မာတ်ဆိုအ်တံတုဲ ဇာလန်သကဳ ဟီုတိုန်အရေဝ် ဗီုလၟုဟ်ဏံ မဒှ်ရ။
အတိုၚ်နန်ခရေၚ်မလေၚ် အာတ်မိက်လဝ်ကၠာကၠာတေံ ညိလေဝ်အပြံၚ်လှာဲဟၟဲ၊ ဒေသခရိုၚ်မဳယာကဵု ဒၞာဲရတ်ယှာ ထိၚ်ချုက်ပေၚ်ၚ်ဟွံမာန်ဏီ ဒေသယူခရုၚ် ၄ ဒၞာဲဂှ် ဒးဗလးကဵုတဲရောၚ် ရတ်ယှာ ဟီုလဝ်ရ။
ဒၞာဲသ္ကုတ်ဗၟံက်ယူခရုၚ် ဒေသဒွန်ဗာတ်မွဲသ္ကုတ်မွဲသ္ကူ ဒးကဵုတုဲ သၠာဲဂတးအာကဵု တိဍာ်ယူခရုၚ်သီဂွံလဝ်ညိညတံရောၚ် သမ္မတရတ်ယှာ ဗလာဒဳမာ ပူတေန် ဟီုလဝ်ဂှ် ပ္ဍဲလိက်ပရိုၚ်အမေရိကာန်တံ ချူလဝ်ရ။
ဒၞာဲဒေသတံဏံဂှ် စနူကဵုအခိၚ်ရတ်ယှာတံ ၜက်ၜေတ်ဗတိုက်လဝ် ၂၀၂၄ တေံဂှ်ရ ဂွံထိၚ်ချုက်ကေတ်ပေၚ်ၚ် ဂစာန်ကၠုၚ်မံၚ်ကီုလေဝ် ဒဵုအခိၚ်လၟုဟ်ဏံ ထိၚ်ချုပ်ဂွံပေၚ်ၚ်ဟွံမာန်ဏီ။
ဒေသခရိုၚ်မဳယာသၟးဟွံက မိက်ဂွံထိၚ်ချုက်ကေတ် ဒေသ ဒွန်နက်သ်၊ လူဟာတ်၊ ဇာပိုရဳဇဳဟဳရာ ကဵု ခါသောန်တံကီု နန်ခရေၚ်မလေၚ် ဟီုလဝ်ရ။
ပ္ဍဲကဵုပေါဲပၞာန်ယူခရုၚ်ဏံ ပရေၚ်အာတ်မိက်တိဍာ် ရတ်ယှာတံ ဗီုကလေၚ်ယှအ်ဖျေံလဝ်ဟၟဲပုဟ် အလဵုသမ္မတအမေရိကာန် ဒဝ်နေဝ်ထရ ဟီုလဝ်ရ။
အတိုၚ်ဒၞာဲယူခရုၚ်ကဵု ရတ်ယှာ ဗတိုက်မံၚ်ဏံ ညံၚ်ဂွံဒေါအ်ထောံပန်ပှော်တုဲ သွက်ဂွံ စကၠောန်အာပရေၚ်ပညဳပညပ်ဂှ် အမေရိကာန် ပတိုန်လဝ်ဂလာန်ကီုလေဝ် ရတ်ယှာ တးပါဲဖျေံလဝ်ရ။
ပ္ဍဲအခိၚ်လၟုဟ် ရတ်ယှာ ဗတိုက်မံၚ် ကဏ္ဍဓါတ်လလဳ ယူခရုၚ်တံတုဲ ယူခရုၚ်ဂှ်လေဝ် ဗတိုက်မံၚ်ရတ်ယှာ နကဵုဒရုၚ်တံရ။
မဟာမိတ် ယူခရုၚ်တံဂှ် သွက်ဂွံဆက်ရီုဗၚ်အာယူခရုၚ်ကီု သွက်ဂွံတာဒၞာထပိုတ်ထောံ ဂၠံၚ်ဍာန်သြန်လုပ်ရတ်ယှာ နူကဵုကၠေၚ်ဍေၚ်ကဵု သၟုဟ်ဓါတ်သဘာဝတံမာန် စွံလဝ်ဂတိညးသ္ကံနွံရ။
Ref:Euronews