ကွာလာလမ်ပူ၊ အံက်တဝ်ပါ ၃၀
ပၞာန်အပ္ဍဲဍုၚ် က္တဵုဒှ်မံၚ်ဍုၚ်ဗမာ ကၠောန်အာပေါဲရုဲမာဲဂှ် ဗလးအာ ညးမၚ်လ္ၚတ်ရံၚ်ပေါဲရုဲမာဲဟာ သွက်ပရေၚ်လစွံစိုတ်ဘုံမွဲ နကဵုဂကောံအာသဳယာန် ဟွံဂွံဖျေံသ္ဂုတ်သွာတ်ဏီ သမ္မတဖိလေတ်ပိုၚ် ဖာဒဳနာန် မာကိုသ် ဂျူနဳယာ ဟီုလဝ် ပ္ဍဲအံက်တဝ်ပါ ၂၈ ရ။
ပ္ဍဲကဵုဗမာ စပ်ကဵုဒပ်ပၞာန်ကၠောန်အာပေါဲရုဲမာဲဂှ် နကဵုကောန်ဂကောံအာသဳယာန် ဍုၚ်ညးကဵုညး ကဵုလဝ်အခေါၚ် ဗွဲမသၠးပွး ဖျေံကေတ်သ္ဂုတ်သွာတ်မာန်ရောၚ် သမ္မတ ဖာဒဳနာန် မာကိုသ် ဟီုလဝ်ပေါဲသောၚ်ကလးပရိုၚ် ပ္ဍဲဍုၚ်ကွာလာလမ်ပူရ။
နကဵုဇကုအကြာညးတံ ချပ်ဗ္စာစလဝ် ဇီဒိုဟ်တုဲ သွက်ဍုၚ်ညးကဵုညး ဗွဲမသၠးပွး ဖျေံကေတ်သ္ဂုတ်သွာတ်မာန် စွံလဝ်အတိုၚ်ဏံ သမ္မတဖိလေတ်ပိုၚ် ဟီုရ။
အကြာညးတံ ပ္ဍဲကဵုချပ်ဗ္စာစလဝ်မ္ဂး ဗီုပြၚ်လချပ်တၞဟ်ခြာမံၚ်ညးသ္ကံနွံမံၚ်တုဲ နကဵုတင်တုပ်စွံဘုံ အာသဳယာန် ဟွံဖျေံအာသ္ဂုတ်သွာတ်ပုဟ်ဂှ် ညးဆက်ဟီုထပေၚ်လဝ်ကီုရ။
နကဵုဍုၚ်ဖိလေတ်ပိုၚ် ဗီုထေက်ကဵုဒးကၠောန်ဂှ် ပိုဲဖျေံအာသ္ဂုတ်သွာတ်ရောၚ်။ ဍုၚ်တၞဟ်ဟ်မုကၠောန်အာရော ပိုဲမၚ်ရံၚ်အာကီုရောၚ် မာကိုသ် ဟီုရ။
ကောန်ဂကောံအာသဳယာန် ၁၁ ဍုၚ်တံ စိုပ်အခိၚ်ဒဳဇြမ်ပါမ္ဂး သွက်လစွံစိုတ်ဘုံမွဲတၚ် ညံၚ်ဂွံနွံမံၚ်တုဲတုဲ စၟဳစလဝ်ရောၚ် ညးဆက်ဟီုထပေၚ်ရ။
အကြာကောန်ဂကောံအာသဳယာန်တံ လညာတ်တၞဟ်ခြာညးသ္ကံနွံမံၚ်ကီုလေဝ် ဇၞော်ကဵုဇြဟတ်ဟွံသေၚ်ရောၚ် ညးသ္ဂးရ။
ကၠာဟွံစိုပ် ပေါဲရုဲမာဲဍုၚ်ဗမာ တ္ၚဲကၠောန်အာဒဳဇြမ်ပါ ၂၈ ဟွံစိုပ်ဂှ် အကြာဇကုတံ တၚ်တုပ်စိုတ်ဘုံမွဲမွဲသာ် တိတ်ကၠုၚ်မာန်ရောၚ် နကဵုညးတေံ စၟဳစလဝ်ရောၚ် မာကိုသ် ဟီုရ။
နကဵုဂကောံအာသဳယာန် မွဲလညာတ်ဓဝ် ကၠောန်အာဂှ် ခိုဟ်မံၚ်ဟီုကီုလေဝ် ကၠာဟွံစိုပ်ဒဳဇြမ်ပါ တ္ၚဲ ၂၈ တေံ သ္ဒးဖျေံသ္ဂုတ်သွာတ်ရောၚ် ညးဟီုရ။
အကြာကောန်ဂကောံအာသဳယာန်တံ တၚ်တုပ်စိုတ်ဘုံ ဖျေံဟွံဂွံမ္ဂး သွက်ကိစ္စဗလးအာ ညးမၚ်လ္ၚတ်ရံၚ်ပေါဲရုဲမာဲ ဇရေၚ်ဍုၚ်ဗမာဂှ် နကဵုဍုၚ်ဖိလေတ်ပိုၚ် ဖျေံအာသ္ဂုတ်သွာတ်ကေတ်တ်ရောၚ် သမ္မတ ဟီုလဝ်ရ။
ပေါဲရုဲမာဲ ပ္ဍဲကဵုဍုၚ်ဗမာကၠောန်အာဏံဂှ် နွံကဵုပရေၚ်ဓရ်ယာသၠးပွး ဒှ်ကၠုၚ်ဟွံမာန်ရောၚ် သမဂ္ဂယူရောပ်ကဵု ကုလသမဂ္ဂတံ ဟီုသ္ဂးလဝ်ရ။
Ref: JMA, GMA