ကျဳကောန်၊ အံက်တဝ်ပါ ၃၁
ပ္ဍဲကဵုကြုက် စဳဇန်လဝ် သွက်ဂွံဗလးဏာ တရဴအာကာသ အလန်ဏံဂှ်တှ်ေ သ္ကိုပ်ဒဳယာန်အာကာသကြုက်ဍောတ်အိုတ် ကေုာံ ကၞိသွက်ဒုၚ်စမ်ၜတ် ပိပန်တံ ပါအာရောၚ် ပ္ဍဲအံက်တဝ်ပါ ၃၀ ဂှ် ညးတာလျိုၚ်တံ ဟီုလဝ်ရ။
ပ္ဍဲကဵုဗ္ဒိုပ်အာကာသ တဳယာန်ကုၚ်မ္ဂး ကြုက်စွံလဝ် သ္ကိုပ်ဒဳယာန် အာကာသ ၃ တၠနွံတုဲ ၆ ဂိတုမွဲအလန် သၠာဲမံၚ်ကဵုရ။
စပ်ကဵုနဲကဲပညာအာကာသ ညံၚ်ဂွံဗက်စိုပ် အမေရိကာန်ကဵု ရတ်ယှာမာန် ကြုက်ဒုၚ်ဖအိုတ် သြန်ဒဝ်လာ ဗဳလဳယာန်ဗွဲမဂၠိုၚ်တုဲ သိုၚ်ခၞံစွံလဝ် ဗ္ဒိုပ်အာကာသဏံ မဒှ်ရ။
ယာန်အာကာသ ယှာန်ကျို-၂၁ ဝွံ ပ္ဍဲအံက်တဝ်ပါ ၃၁ အခိၚ်ဒေါဝ်တ္ၚဲ ၁ နာဍဳ ၄၄ မိနေတ်မ္ဂး နူကဵုဒၞာဲသေန်တာ ဟလးဂြိုဟ်ပတောအ် ကျဳကောန် နွံမံၚ်ဒိုဟ်ဗာယာပ်ဍုၚ်ကြုက်ဂှ် စတိတ်အာရောၚ် ညးနွံအခေါၚ်ဟီုဂး အေဂျေန်သဳအာကာသကြုက် CMSA ကျာန်ကျေန်ပို ဟီုရ။
ပ္ဍဲလၟေၚ်တရဴအာကာသဏံ အေန်ဂျေန်နဳယာ ဝူဖေ စပေၚ်အယုက် ၃၁ သၞာံ ပါအာဂှ် ဒှ်သ္ကိုပ်ဒဳယာန်အာကာသကြုက် အယုက်ဍောတ်အိုတ်မွဲရောၚ် ညးတာလျိုၚ်တံ ဟီုရ။
သ္ကိုပ်ဒဳယာန်အာကာသဝှ်ကြံၚ် ကျာန်လူ အယုက် ၄၈ သၞာံ ဗက်အာလဝ် ယာန်အာကာသ ယှာန်ကျို-၁၅ လောန်ကၠုၚ် ၂ သၞာံပြၚ်တေံ ကော်ကာဲအာ ဝူဖေ ရောၚ်။
တၠပညာဖ္ဍိုက်လျိုၚ် ကျာန်ဟံၚ်ယှာန် အယုက် ၃၉ သၞာံလေဝ် ဗက်အာကရောံ ယာန်အာကာသဏံတုဲ သွက်ဂွံထပက်အဇာ ကေတ်အာတာလျိုၚ် သ္ကိုပ်ယာန်အာကာသ ၃ တၠ နွံမံၚ်ပ္ဍဲကဵု ဗ္ဒိုပ်အာကာသကြုက်တေံရ။
ကရောံညးတံဂှ် ကၞိကၟက်ၜါၝောံၜါ သွက်ဂွံဒုၚ်စမ်ၜတ် ဗက်အာကီုတုဲ ပရေၚ်ကြုက်ဗလးကၞိ ပ္ဍဲအာကာသ အလန်ကၠာအိုတ်ဒှ်တုဲ ပရေၚ်စမ်ၜတ်အလန်ပထမ မဒှ်ရောၚ်။
ပ္ဍဲကဵုဒၞာဲဂၠံၚ်ဂြိုဟ်ဂေတ်ပွူတေံ အလန်တတိယ ပလံၚ်ဏာမၞိဟ် ဒှ်ကၠုၚ်တုဲ ကိုန်အစဳဇန်အာကာသ ပေဂျေန်ဝွံ လ္တူဂြိုဟ်အၚာကီု ဂိတုတေံကီု ကေၚ်ဗလးလဝ် ယာန်ရုပ်စက်တံနွံကီုရ။
ပေၚ်စိုပ်သၞာံ ၂၀၃၀ တေံမ္ဂး နူကဵုကြုက် သွက်ဂွံဗလးဏာမၞိဟ် လ္တူဂိတု နကဵုယာန်အာကာသတုဲ သွက်ဂွံသိုၚ်ခၞံ ဖျေံစွံလဝ်ဗ္ဒိုပ်အာကာသ ပ္ဍဲဗလးဂိတုမွဲ စဳဇန်မံၚ်ရ။
Ref:AFP