တိုကျို၊ နိုဝမ်ပါ ၁
သွက်ဂွံကလေၚ်စမ်ၜတ် လွဟ်နျူကလဳယာ ဟွံခယျလဝ်မွဲသာ် ထရကဵုလဝ်စၞောန် ဂကောံဂွံလာပ်တဆိပ်နိုဗေလ် ညးဂျိုၚ်ဘဲဗုမ်အဏုလက်ကၠိုက်ဂျပါန်တံ ဒစဵုဒစးပါ်ပါဲအာဗွဲမသ္ကာတ်မြဟ်တုဲ ကိစ္စဒုၚ်တဲဟွံမာန် ဟီုဏာရ။
အပ္ဍဲကဵုပၞာန်ဂၠးကဝ် ကေၚ်စကာသုၚ်စောဲလဝ် လွဟ်နျူကလဳယာမွဲအလန် ဟိုတ်နူကဵုအမေရိကာန် ဖျေံထောံဗုမ် အဏုလက်ကၠိုက် ၂ မ ပ္ဍဲကဵုဂျပါန် ဍုၚ်ဟဳရိုယှဳမာကဵု နာဂါသာကဳဂှ် မၞိဟ်ၜါကိုတ်ပြၚ် ချိုတ်လဝ်ရ။
အခိၚ်တေံ ညးအယုက်သှ်ေဂျိုၚ်တဴမံၚ်တံဂှ် ကော်ခဴစ ဟဳဗာကူယှာတံဝွံ ညးတံဒးဒုၚ်ဒှ်လဝ်ပးဒၞန်ရောၚ် ပရေၚ်ဒုၚ်စသိုၚ် ရုပ်ကဵုနာမ် ၜါသာ်ဏံ ဗွဝ်သၞာံဗွဲမဂၠိုၚ် ဒးဒှ်ကၠုၚ်လဝ် ပရေၚ်ခက်ခုဲနာနာ မဒှ်ရ။
ဂွံတုပ်အာကဵု ကြုက်၊ ရတ်ယှာတံကီု သွက်ဂွံစကလေၚ်စမ်ၜတ် နျူကလဳယာ သမ္မတဒဝ်နေဝ်ထရ ကဵုဏာစၞောန်ပၟိၚ်ကု ပေန်တဂန် ပ္ဍဲအံက်တဝ်ပါ ၃၀ တုဲ ဂကောံဂွံလာဘ်နိုဗေလ် နဳဟောန်ဟိုၚ်ဒေန် ပလံၚ်လိက်စဵုစးစောဒကကု ရုၚ်ကလုတ်အမေရိကာန် နွံဍုၚ်ဂျပါန်ရ။
တင်စၞောန်ဝွံ အလုံဂၠးကဝ်မွဲ ပရေၚ်ၜိုဟ်လလမ် ဟၟဲကဵုလွဟ်နျူကလဳယာ ညံၚ်ဂွံဂျိုၚ်တဴအာ အခိၚ်ဂၠးကဝ် ဂစာန်လွဳမံၚ်ဏံ ဒစဵုဒစးမံၚ်တဝ်ဝ်တုဲ အရာပရေၚ်ကိစ္စ ညိမှဒုၚ်တဲဟွံမာန်ရောၚ် ပ္ဍဲကဵုလိက် ဂကောံလမျီုသှ်ေဂျိုၚ်တဴတံ ချူလဝ်ရ။
သ္ကိုပ်ဝန်ဍုၚ် နာဂါသာကဳလေဝ် ဒစဵုဒစးပျုတ်ဗဒေက်အာ စၞောန်ပညုၚ်ထရဂှ်တုဲ ညးဂၠးကဝ်တံ အခိၚ်ဂစာန်လွဳပရာမံၚ် ပရေၚ်ၜိုဟ်လလမ် ဟၟဲကဵုလွဟ်နူကလဳယာဏံ ကဵုမံၚ်လမျီုဆီပဠက်အာပ်ပြာပ်မံၚ်ကဵု ဍာ်ရမတ်တံဂှ် ဒှ်ကမၠောန်ထပက်ဇိုၚ် ပလီုပလာ်မွဲရောၚ် ဟီုရ။
ဆဂး သ္ကိုပ်ဝန်ဇၞော်တၟိဂျပါန် သာနေ တာကာအိချိဂှ် သွက်လာဘ်နိုဗေလ်ပရေၚ်ၜိုဟ်လလမ် အရၚ်ထရ ပတိုန်ကဵုယၟုရောၚ် ပရိုၚ်တိတ်မံၚ်ရ။
အခိၚ် ဂကောံဟိုၚ်ဒါန်ကျို ဒုၚ်ကေတ်လာဘ်နိုဗေလ် သၞာံ ၂၀၂၄ ဂှ် သွက်ဂွံပလီုကၠေံလွဟ်နျူကလဳယာ ဍုၚ်ဂၠးကဝ်ဂမၠိုၚ် ဗတိုက်ဖအောဝ်မံၚ်ရ။
ဂကောံလမျီုသှ်ေဂျိုၚ်တဴ ဟဳရိုယှဳမာ တၞဟ်ခြာၜါဂကောံပၠန်လေဝ် စၞောန်ပညုၚ်ထရဂှ် ဒစဵုဒစးအာပေၚ်ၚ်ရောၚ် ပတိတ်လိက်လလောၚ်တြးကူရ။
ပ္ဍဲပေါဲပၞာန်နျူကလဳယာတံမ္ဂး ညးဂွံဇၞး ဟွံသေၚ် ညးကျအာတံဟီုဂှ်ဟၟဲရောၚ် မဒှ်တုဲ ဒတောဝ်တၞောဝ်ဂကူမၞိဟ်တံဟေၚ် ဒှ်ညးကျဗြောံဆောံလေၚ်ရောၚ် ပ္ဍဲကဵုလိက်လလောၚ်တြးၜါဂကောံဏံ ချူလဝ်ရ။
Ref:AFP