ဂျဳယောန်ဂျူ၊ နိုဝမ်ပါ ၂
စပ်ကဵုပရေၚ်လလောၚ်တြးလဝ် ဒစဵုဒစးပရေၚ်အကံက်အခေါန်တုဲ ဒုၚ်လဝ်ဂုဏ် သမ္မတအမေရိကာန် ဒဝ်နေဝ် ထရ တုဲအာကီု ပရေၚ်လလောၚ်တြးဏံလေဝ် လ္ပထပ်ထ္ၜးညိ ဟီုလဝ်ကဵု သ္ကိုပ်ဝန်ဇၞော် အောန်တာရဳယော ဒံက်ဖိုအ် သာ်ဝွံ သ္ကိုပ်ဝန်ဇၞော်ခါနေတာ မက်ကာနေ ဟီုဏာပ္ဍဲနဝ်ဝမ်ပါ ၁ ရ။
ပ္ဍဲကဝ်ရဳယာသၠုၚ်ကျာ တိုန်စိုပ်လဝ် သဘၚ်သဳကၠဳ အာယှ-ဖသိဖိတ်တုဲ ပ္ဍဲကဵု သမ္မတကဝ်ရဳယာသၠုၚ်ကျာဒုၚ်ကၟုဲ ပေါဲစပုၚ်ဗ္တံ အံက်တဝ်ပါ ၂၉ ဂှ် နူကဵုသ္ကိုပ်ဝန်ဇၞော် ကာနေ ဒုၚ်လဝ်ဂုဏ်ထရ ဗွဲတၞဟ်ခြာ တုဲဒှ်အာယျ ဟီုလဝ်ကဵုအစာပရိုၚ်တံရ။
နူကၠာဟွံပတိတ် လလောၚ်တြးဏံဂှ် မွဲကရောံကဵု သ္ကိုပ်ဝန်ဇၞော် ဖိုအ်ကီု ကလေၚ်သ္ၚဳဂၠိပ်လဝ်တုဲ ဒစဵုဒစးလဝ် ပရေၚ်ဏံရောၚ် သ္ကိုပ်ဝန်ဇၞော် ကာနေ သ္ပလဝ်ဒတန်ရ။
လဆောဝ်လဆောဝ် ဒးဒုၚ်ၜတ်ကၞာတ်ညံၚ်ရဴထရကီု သၟာပရေၚ်ဍုၚ်ကွာန်ကန်သာဗေတေတ် မေတ်သတာဖိုအ် စဳဇန်လဝ် ပ္ဍဲကဵုလလောၚ်တြးဏံဂှ်တှ်ေ မအရေဝ်ဂလာန် သမ္မတအမေရိကာန်တြေံဒယှ်တှ် ရဝ်နေဝ်ရဳဂေန် ဟီုလဝ် “အခေါန်တံဂှ် ညံၚ်ဂွံဒှ်ပေါဲပၞာန်ပရေၚ်ကူသာန်ဗၞိက်ကဵု ဘဲအန္တရာဲပရေၚ်ပိုန်ဒြပ်မာန်” ဂှ် ကံက်စကာလဝ် မဒှ်ရ။
ဗီုပြၚ်ကလေၚ်ပလန်ဏာ ဂလာန်ဏံဂှ်တှ်ေ သၠုၚ်ကံက်အခေါန် ခါနေတာရောၚ် ထရ လလောၚ်တြးတုဲ ပရေၚ်သဳကၠဳကူသာန်ဗၞိက်ကဵု ခါနေတာဂှ်လေဝ် ဒေါအ်ထောံလဝ်ရ။
နူကဵုကဝ်ရဳယာသၠုၚ်ကျာ တိတ်ကၠုၚ်လဝ်တုဲ ပ္ဍဲကဵုပေါဲစပုၚ်ဗ္တံဂှ် ဟီုဂးသဳကၠဳကဵု သ္ကိုပ်ဝန်ဇၞော် ကာနေ ခိုဟ်ကွေံကွေံရောၚ် ထရဟီုကီုလေဝ် တၚ်နၚ်သောဲသောဲဗြောဲဗြောဲတံဂှ် ဟွံဟီုရ။
စဵုကဵုစိုပ်အံက်တဝ် ၃၁ ဂှ် ပရေၚ်သဳကၠဳကူသာန်ဗၞိက် အမေရိကာန်ကဵု ခါနေတာ ကလေၚ်စမာန်ဟွံသေၚ်ဏီ ထရဟီုလဝ်ရ။
ပ္ဍဲအခိၚ်ဏံ သ္ကိုပ်ဝန်ဇၞော်ခါနေတာ ကာနေ သွက်ဂွံကၠုၚ်ဍုၚ်ကြုက် သမ္မတယှဳကျေအ်ဖျေၚ် ဘိက်ကော်လဝ်ရ။
သၞာံဗွဲမလံလ ကြံၚ်မ္ၚိုဟ်ကၠုၚ်မံၚ်ကီုလေဝ် ပ္ဍဲအံက်တဝ်ပါ ၃၀ ဂှ် ပရေၚ်သဳကၠဳလဝ်ကဵု သမ္မတကြုက် ယှဳကျေအ်ဖျေၚ်ဝွံ ဒှ်ကၠုၚ်အပြံၚ်အလှာဲ ပရေၚ်ဆက်ဆောံမာန်ရောၚ် ကာနေ ဟီုလဝ်ရ။
က္ဍိုပ်သ္ကိုပ် ခါနေတာကဵုကြုက် အလန်လက်ကရဴအိုတ် သၞာံ ၂၀၁၇ ပ္ဍဲဍုၚ်သာန်ဖရာန်သေတ်သကို ဆဵုဂဗလဝ်တုဲ ပ္ဍဲအခိၚ်တေံ သ္ကိုပ်ဝန်ဇၞော် ထရူဒိုဝ်ကဵု ယှဳကျေအ်ဖျေၚ်တံ ဆဵုဂဗလဝ် မဒှ်ရ။
တၚ်စောဲစပ် ပ္ဍဲကဵုပေါဲရုဲမာဲခါနေတာ ကြုက်တံလုပ်ပထုဲအကြာ၊ ပ္ဍဲဍုၚ်ကြုက် ကောန်ဍုၚ်ခါနေတာတံ ဒးဒုၚ်ရပ်လဝ် စပ်ကဵုပရေၚ်တံဏံတုဲ အကြာၜါဍုၚ် ပရေၚ်ဆက်ဆောံကြံၚ်မ္ၚိုဟ်လဝ်လအ်ကွေံရ။
လၟေၚ်တရဴအာယှဝွံ ပရေၚ်ခါနေတာ ဒးဗ္ဒးဗ္ဒာဲမံၚ် အမေရိကာန် သွက်ဂွံယှအ်ဖျေံအာ ဒှ်ပရေၚ်ဂစာန်လွဳ မွဲသ္ကုတ်မွဲသ္ကူဒှ်ရောၚ် နူကဵုသ္ကိုပ်ဝန်ဇၞော် ကာနေ ဟီုလဝ်ရ။
Ref:Reuters