ဝါယှေန်တန်၊ နိုဝမ်ပါ ၄
အကြာဗၚ်နဳဇဲဠာကဵု အမေရိကာန် တၠလအာဘိုအ်ဂွံဒှ်ပၞာန်မာန်ဂှ် သံသယနွံမံၚ်တုဲ သွက်အရၚ် သမ္မတ ဗၚ်နဳဇဲဠာ မာဒူရိုဂှ် အဝဵုအပိုၚ်အခြာတ္ၚဲ နွံကၠုၚ်မံၚ်ယျ သမ္မတအမေရိကာန် ဒဝ်နေဝ် ထရဟီုရ။
ဗၚ်နဳဇဲဠာကဵု အမေရိကာန် ဒှ်ပၞာန်မာန်ဟာ သၟာန်နူကဵုဌာန်ပရိုၚ် CBS ဂှ် ထရ ကလေၚ်သွဟ်ကဵုအာ အတိုၚ်ဏံတုဲ ဗၚ်နဳဇဲဠာဂှ် လ္တူဍုၚ်ပိုဲ ကၠောန်မံၚ်ကြာန်န်ပရေအ်ပရေအ်ရောၚ် ဟီုဏာရ။
ပ္ဍဲကာရေဗဳယာန် အခိၚ်အမေရိကာန် သၠုၚ်အသိၚ် ဗတိုက်မံၚ်ၜၚ် ဖ္ဍိုက်ကူသာန်ဂဥုဲၜူမာဲတံဂှ် ဂလာန်သမ္မတထရ ဟီုတိတ်ကၠုၚ်လဝ် အတိုၚ်ဏံရ။
သွက်ဂွံစဵုဒၞာအာ ပရေၚ်ဂဥုဲၜူမာဲ လုပ်ကၠုၚ်မံၚ် ဍုၚ်အမေရိကာန်ဂှ် မ္ဒးကၠောန်အာ ပရေၚ်ဗတိုက်ဗီုပြၚ်တံဏံရောၚ် အလဵုအသဳထရ ဟီုဂးလဝ်ရ။
ပရေၚ်ကမၠောန်အမေရိကာန်တံဝွံ သွက်ဂွံကၠောန်အာ ပရေၚ်ဗတိုက်သရိုဟ် ဂဥုဲၜူမာဲလုပ်ကၠုၚ်မံၚ်ဟွံသေၚ်၊ ရန်တၟံလဝ် သွက်ဂွံဖျေံအဝဵု ညးစဵုစးလဝ်ကဵု ထရဍာ်ဇမၠိၚ်ရောၚ် လဟီုသ္ဂးဗီုဏံဂှ် ထရတးပါဲတုဲ ပရေၚ်ပေါဲဗတိုက်ပိုဲတံဝွံ ဆက်စပ်မံၚ်ကဵု ပရေၚ်ကိစ္စဗွဲမဂၠိုၚ်နွံမံၚ်ရောၚ် သ္ဂးရ။
စနူဂိတုသိပ်တမ်ပါမံက်ကၠုၚ်တေံ ပ္ဍဲကာရေဗဳယာန်ကဵု ပသိဖိတ်ဗၟံက်တံဝွံ ဟိုတ်နူအမေရိကာန်ဗတိုက်လဝ်ဂှ် မၞိဟ်ဟွံအောန်နူ ၆၄ တၠ ချိုတ်လဝ်တုဲ မဒှ်ရ။
ဂဥုဲၜူမာဲ ဖ္ဍိုက်ပၠုပ်နၚ်ကဵု လ္တူၜၚ်တံဏံ ယဝ်ရစိုပ်ကၠုၚ်အပ္ဍဲဍုၚ်အမေရိကာန်မ္ဂး မၞိဟ်တံ ကၟိန်အိန်ထံၚ်သ္ၚိဌာန်တံ လၟိဟ်ဂၠိုၚ်ကဵုနူဏံ ဘိုအ်ဂွံချိုတ်ရောၚ် ထရ ဟီုလဝ်ရ။
ပရေၚ်ဗတိုက်ဗလးတိ ကုဗၚ်နဳဇဲဠာ ကၠောန်အာကီုဟာ သၟာန်ဏံဂှ် ထရးဟွံတးပါဲကီုလေဝ် စပ်ကဵုပရေၚ် လ္တူဗၚ်နဳဇဲဠာ မုကၠောန်အာ မုဟွံကၠောန်အာတံဂှ် ဟွံမိက်ဟီု ကဵုလဝ်သွဟ်ရ။
ဟိုတ်နူဝါယှေန်တန် မိက်ဂွံဗတိုက် ပိုဲတုဲ ထ္ၜးလဝ်ဟိုတ် ပရေၚ်ဂဥုဲၜူမာဲရောၚ် မာဒူရို စောဲစပ်တုဲ အမေရိကာန်တံ သွက်ဂွံအုပ်ဓလီု လက်တေန် အမေရိကမာန် ကၠောန်မံၚ်ပရေၚ်ပေါဲဗတိုက် ဗီုတံဏံရောၚ် သမ္မတ ကိုလာန်ဗဳယာ ဂက်သ်သတာဗို ပက်ထရို ဟီုလဝ်ရ။
ဍုၚ်ဂိုဏ်ရာဇဝတ် ပရေအ်အိုတ် ပ္ဍဲဂၠးကဝ်ဏံဂှ် ဒှ်မံၚ် ဗၚ်နဳဇဲဠာရောၚ် ထရ သ္ဂးရ။
နကဵုဇကုတံ ပၟိက်မိက်ဂွံ ပလှ်ဖျေံအလဵုအသဳ မာဒူရို ပ္ဍဲဗၚ်နဳဇဲဠာတုဲ ကၠောန်မံၚ်ပေါဲဗတိုက်တံဏံ ဟွံသေၚ်ပုဟ် ထရ ဟီုမံၚ်ကီုလေဝ် စၟတ်အပိုၚ်အခြာအယုက်သမ္မတ မာဒူရိုၚ် နွံကၠုၚ်မံၚ်ယျ ဟီုလဝ်ရ။
Ref:BBC