ၜံၚ်ကံက်၊ နိုဝမ်ပါ ၅
ပ္ဍဲကဵုဍုၚ်ဗမာ ဂိုဏ်လီသြန်အန်လိုၚ် “ကျာဖျ”ယၟုလီုအိုတ်မွဲ ဒးဒုၚ်ပလီုသရိုဟ်ထောံဂှ် ပြဟ်ဟ်ဏံ ထပ်ဗက်ဂၠာဲမံၚ် သၟာကမၠောန်တၟိနွံမံၚ်တုဲ ရဲဂြိပ်ကၠုၚ်နူကမၠောန်ကျာဖျတံဂှ် ဗက်အာပၠုၚ်မံၚ်စရၚ် ပ္ဍဲကဵုဒၞာဲကမၠောန်ကျာဖျကြပ်အိုတ်တံနွံ သာ်ဝွံ တၠပညာတံကဵု ညးနွံအပ္ဍဲတံ ဟီုလဝ်ကဵုဌာန်ပရိုၚ် AFP ရ။
ညံၚ်ရဴပတိုဟ် ကမၠောန်ကျာဖျ မံက်မံၚ်ပ္ဍဲကဵု ဒေသအဂၞဲအာယှဝွံ အလုံဂၠးကဝ် လ္တူညးဟၟဲကဵုသံသယတံဂှ် နနဲကဵုဖျုန်ပရေၚ်ပိုန်ဒြပ်ကီု ညံၚ်ရဴကဝေၚ်သ္ဍိုက်ဆာန် ပတောအ်လဝ်တုဲ လီဠာန်ကေတ်မံၚ် သြန်ဒဝ်ဠာ မၞုံကဵု ဗဳလဳယာန် မဒှ်ရ။
ရဲသၟာကမၠောန်ကျာဖျ ဗွဲမဂၠိုၚ်တံမ္ဂး နနဲဗီုပြၚ်ကူသာန်မၞိဟ် စိုပ်ကၠုၚ်ကီုလေဝ် နကဵုအလိုက်စိုတ်ဇကု မၞိဟ်ကၠုၚ်ကၠောန်မံၚ်ကမၠောန် နွံမံၚ်ဗွဲမဂၠိုၚ်ကီုရောၚ် တၠပညာစီုသကီုပရေၚ်တံဏံ ဟီုရ။
တုဲကၠုၚ်ကၞောတ်ဂိတုအံက်တဝ်ပါဏံ ပ္ဍဲကဵုပယျဵုဗၟာ ဒၞာဲရုၚ်ကမၠောန်ကျာဖျကောံကလောအ်မံၚ် KK Park ဟိုတ်နူဒးဒုၚ်သီဏာဂှ် ကောန်ဍုၚ်မ္ၚး ၁၅၀၀ ပြၚ် ဂြိပ်လုပ်အာ လပါ်တိသေံကီုလေဝ် ညးဂြိပ်ပါဲဒဴမံၚ်တံဂှ် ဂစာန်ထပ်အာလုပ်မံၚ် ပ္ဍဲကဵုဗွဝ်ဖျာဒမၠုတံပၠန်ရ။
ရဲသၟာကမၠောန်ဂြိပ်ပါဲတိတ်အာနူကဵု KK Park တံဂှ် ရဲကမၠောန်ကျာဖျ နွံမံၚ်ဗ္ဒာဲဗ္ဒာဲတံ ကဵုမံၚ်သြန်ဂိတုသွက်မွဲမွဲဂိတု စဵုကဵုဒဝ်လာ ၁၄၀၀ ကော်မံၚ်နွံရောၚ် သၟာကမၠောန်ကျာဖျကောန်ဍုၚ်ကြုက်မွဲတၠ ဟီုရ။
ကမၠောန်ကျာဖျ နွံမံၚ်ဒေသပယျဵုသေံ-ဗမာတံဂှ် ဒပ်ပၞာန်ဗမာ ပလီုသရိုဟ်ထ္ၜးမံၚ်ကီုလေဝ် ကမၠောန်ကျာဖျ နွံမံၚ်ပ္ဍဲဒၞာဲတၞဟ်တံဂှ် ဆက်ဗဂေတ်ကၠောန်မံၚ်ကမၠောန် ခိုဟ်ဟ်မာန်ဏီရ။
နကဵုသၟာကမၠောန် ဂြိပ်တိတ်ကၠုၚ်တံ လုပ်ကၠောန်ဒၞာဲကမၠောန်တၟိတံဂှ် တၠကမၠောန် ကဵုသြန်ဂိတုခိုဟ် ဆက်ဆောံခိုဟ်လေဝ်နွံ တၠကမၠောန် ဆက်ဆောံ ပရေအ်လေဝ်နွံ ဒးဆဵုဂဗမံၚ်ရောၚ် နကဵုပရေၚ်ဂီုကၠီု ကောန်ဍုၚ်ကြုက် ဟွံမိက်ယၟုမွဲတၠဂှ် ဟီုရ။
အပ္ဍဲသၞာံ ၂၀၂၃ တေံမ္ဂး ပ္ဍဲအဂၞဲအာယှကဵု ဗၟံက်အာယှဝွံ ညးဒးဒုၚ်လီဠာန်ဂမၠိုၚ် ပရေၚ်ဒးဆောံလေၚ်အာလဝ် ဒဝ်လာ ၃၇ ဗဳလဳယာန်နွံမံၚ် ကုလသမဂ္ဂ ဟီုလဝ်ရ။
ပ္ဍဲကဵုဍုၚ်ဗမာ ပၞာန်အပ္ဍဲဍုၚ်ဒှ်မံၚ်တုဲ ပ္ဍဲဒေသပယျဵုတံ ဟိုတ်နူဇြဟတ်ပရေၚ်အုပ်ဓုပ် ဍိုန်လျမံၚ်ဂှ် ကမၠောန်ကျာဖျတံ အတိုၚ်နွံပၟိက် ဂေတ်မာန်မံၚ်ရောၚ် ညးစီုသကီုတံ ထံက်ထ္ၜးလဝ်ရ။
ပ္ဍဲသၞာံ ၂၀၂၁ နူကဵုဒပ်ပၞာန်ဗမာသီအဝဵု ထၜေက်မတ် ကဵုလဝ်အခေါၚ်ကဵု ကမၠောန်ကျာဖျတံတုဲ ဂကောံရပ်လွဟ်မဟာမိတ်ဍေံတံ သွက်သ္ဂောံသြန်ဂၠိုၚ်ၚ်မာန် ကဵုမံၚ်အရီုဗၚ်ရောၚ် ညးလ္ၚတ်တံ ဟီုရ။
ကောန်ဍုၚ်မ္ၚး ရဲဂြိပ်တိတ်အာနူကမၠောန်ကျာဖျဗမာတံဂှ် ကောန်ဍုၚ်အေန္ဒိယကဵု ဖိလေတ်ပိုၚ်တံ နွံဂၠိုၚ်အိုတ် ဂွံဆဵုရ။
Ref:AFP