ပရေၚ်အမေရိကာန်-ကိုဝ်ရဳယာသၠုၚ်ကျာသဳကၠဳ ကိုဝ်ရဳယာသၟဝ်ကျာ ပျုတ်ဗ္ဒေက်

သိုဝ်၊ နိုဝမ်ပါ ၁၀

စပ်ကဵုၜၚ်ဖ္ဍိုက်ၜၚ်ကျာအမေရိကာန် စိုပ်ကၠုၚ်ကိုဝ်ရဳယာသၠုၚ်ကျာ၊ အကြာအမေရိကာန်ကဵု သိုဝ်တံ သဳကၠဳပရေၚ်ဂီုကၠီုတံဂှ် ဝန်ဇၞော်ပရေၚ်စဵုဒၞာ ကိုဝ်ရဳယာသၟဝ်ကျာ နိုကောန်ချို တၚ်ဒုဟ်ပျုတ်ဗ္ဒေက်တုဲ ဆက်ကၠောန်ထပဵုအာ ပရေၚ်ဗတိုက်တံရောၚ် ပ္ဍဲနဝ်ဝမ်ပါ ၈ ဟီုဂးဘပဠလဝ်ရ။ 

ကောန်ဍုၚ်ကိုဝ်ရဳယာသၟဝ်ကျာ ပါလုပ်မံၚ် ပ္ဍဲကဵုကမၠောန်သ္အးသြန် ဆက်စပ်မံၚ်ကဵုသိုက်ဖာတံ သွက်ဂွံတာဒၞာမာတ်ဆိုအ်အာ နူကဵုဝါယှေန်တန် ဟီုဂးလဝ်ဝွံ ပ္ဍဲနဝ်ဝမ်ပါ ၆ ကိုဝ်ရဳယာသၟဝ်ကျာ တၚ်ဒုဟ်ပျုတ်ဗ္ဒေက်ဏာတုဲ ဗွဲကြဴမွဲတ္ၚဲဂှ် ပန်ပလံၚ်ဏာ ကမ်သၠောဝ်သၠသၞေဝ်ထိၚ်မွဲမ ပ္ဍဲကဵုဇုက်ဍာ်မ္ၚး သင်ဗလးၜဳဗၟံက်တေံရ။ 

ကိုဝ်ရဳယာသၟဝ်ကျာ ပါ်ပါဲဟီုဂး ပရေၚ်အမေရိကာန်-ကိုဝ်ရဳယာသၠုၚ်ကျာ သဳကၠဳမံင်ဂှ် စိုတ်ဒးလီုကွေံ နူဌာနဝန်ဇၞော်ပရေၚ်စဵုဒၞာ ကိုဝ်ရဳယာသၠုၚ်ကျာ ဟီုဏာပ္ဍဲနဝ်ဝမ်ပါ ၈ တုဲ သီုကဵု တၚ်ဒုဟ်ပျုတ်ဗ္ဒေက် ပရေၚ်ပန်လဝ် ကမ်သၠောဝ်သၠသၞေဝ်ထိၚ်ကီုရ။ 

ကမၠောန်ပွတံဏံမ္ဂး သွက်ဂွံတာဒၞာ ကိုဝ်ရဳယာသၟဝ်ကျာ သၠုၚ်အသိၚ်ချပ်ဖန်မံၚ်တုဲ ပရေၚ်ဂိုတ်ဂစာန် ဒပ်ဓမ္မတာကဵု ဒပ်နျူကလဳယာတံ ဂွံပံၚ်ကၠောန်အာမဒှ်ရောၚ် ဝန်ဇၞော် နိုဟီုရ။ 

အဓိကတင်ရန်တၟံ ကၠောန်သ္ပမဟာမိတ်ကဵုသိုဝ်ဂှ် သွက်အရာတာဒၞာ ကိုဝ်ရဳယာသၟဝ်ကျာရောၚ် ဝန်ဇၞော်ပရေၚ်ပၞာန် အမေရိကာန် ပိက်ချ် ဟာတ်သေချ် ဟီုရ။ 

သွက်တာဒၞာအာ ပရေၚ်ဘပဠ အပ္ဍဲကဵုဒေသတံ ပ္ဍဲကိုဝ်ရဳယာသၠုၚ်ကျာ ဗီုပြၚ်ဖျေံစွံလဝ်ဒပ် အမေရိကာန် ပြံၚ်လှာဲဗီုပြၚ်လောဲလောဲဂှ် ဆက်လ္ၚတ်အာရောၚ် ညးဆက်ဟီုရ။ 

ပရေၚ်ပံၚ်တောဲခန်လ္ၚတ်ပၞာန်ကျာ အမေရိကာန်-ကိုဝ်ရဳယာသၠုၚ်ကျာတံ ကၠောန်တုဲအာတုဲ ဇရေၚ်သၞေဟ်ၜၚ် ဗူသာန် ကိုဝ်ရဳယာသၠုၚ်ကျာ လပါ်ဒေသအဂၞဲ ပရေၚ်ၜၚ်နျူကလဳယာဖ္ဍိုက်ၜၚ်ကျာအမေရိကာန် ဂျအ်ဝါယှေန်တန် စိုပ်ကၠုၚ်ပ္ဍဲသတ္တဟဏံဂှ် ပ္ဍဲကဵုဒေသၚာၚ်ကအ် ဍုၚ်ဇကုတံ ဒှ်အာကမၠောန် သွက်ပရေၚ်ကြံၚ်မ္ၚိုဟ်ညးသ္ကံရောၚ်  ဝန်ဇၞော်နို ဟီုရ။ 

သွက်ဂွံကလေၚ်ထပေၚ် ကပေါတ်ထံက်ပၚ်ကီု သွက်သၞာဲဒါဂမၠိုၚ် သွက်သ္ဂောံဂွံ အခေါၚ်တ္ၚဲဇူကီု ၜၚ်ဖ္ဍိုက်ၜၚ်ကျာဏံ စိုပ်ကၠုၚ်ရောၚ် ဒပ်ဍာ်ကိုဝ်ရဳယာသၠုၚ်ကျာ ဟီုရ။ 

မိက်ဂွံဆဵုဂဗကဵု က္ဍိုပ်သ္ကိုပ်ကိုဝ်ရဳယာသၟဝ်ကျာ ကေန်ဂျုၚ်အာန်ကီု သတ္တဟတုဲဏံ ပ္ဍဲကဵုတရဴ သမ္မတအမေရိကာန် ကၠုၚ်စိုပ်လဝ် ကိုဝ်ရဳယာသၠုၚ်ကျာဂှ် ဟီုဂးလဝ်ကီုလေဝ် အစဳဇန်ဏံ ဟွံအံၚ်ဇၞးကၠုၚ်ပုဟ်။ 

ဆဂး သွက်ဂွံဆဵုဂဗ ကေန်ဂျုၚ်အာန် ညးကလေၚ်ကၠုၚ်စိုပ် ဒေသဏံမွဲဝါပၠန်ရောၚ် ဟီုဂးလဝ်ရ။ 

Ref:Reuters

Leave a Reply

Your email address will not be published. Required fields are marked *