ကွာလာလာန်ပူ၊ နိုဝမ်ပါ၂၅
စနူကဵုသၞာံဂတးတေံတုဲ အလဵုအသဳ မလေဝ်ယှာစဳဇန်လဝ် သွက်ဂွံဒၞာတာအာ သၟဝ်အယုက် ၁၆ သၞာံတံ စကာမဳဒဳယာပရေၚ်မၞိဟ်ဝွံ စပ်ကဵုပွမဒှ်ဒွိၚ်ပရေၚ်ဘဲအန္တရာဲကောန်ၚာ်တံမ္ဂး ဒှ်ကၠုၚ်ဍုၚ်ထိၚ်ချုက် မဳဒဳယာပရေၚ်မၞိဟ်မွဲရောၚ်။
စပ်ကဵုယန္တရာအပိုၚ်အခြာအယုက် သွက်အခေါၚ်စကာမဳဒဳယာပရေၚ်မၞိဟ် နူကဵုဍုၚ်အဝ်သတေလျကဵု ဍုၚ်တၞဟ်ဟ်တံဂှ် အလဵုအသဳ လ္ၚတ်မံၚ်ရောၚ် ဝန်ဇၞော်ပရေၚ်ဆက်စၠောံမလေဝ်ယှာ ဖဟာမဳ ပဇဳလ် ဟီုလဝ် ပ္ဍဲနဝ်ဝမ်ပါ ၂၃ ရ။
သွက်ကောန်ၚာ်တံ ညံၚ်ဂွံစဵုဒၞာအာကဵု ပရေၚ်သ္ပမာန်ဍဵုဍိုက်အန်လိုၚ်၊ ပရေၚ်လီသြန်ကဵု ပတိတ်ပရဲလိၚ်နူကောန်ၚာ်တံဂှ် ဒှ်အရာကိစ္စဇၞော်ကွေံရောၚ် ဝန်ဇၞော် ဖဟာမဳ ဟီုရ။
အတိုၚ်အလဵုအသဳဖျေံလဝ်သွာတ် အခိၚ်စပံက်ဏာအကံက် မဳဒဳယာပရေၚ်မၞိဟ်မ္ဂး သွက်ဂွံတာဒၞာလဝ် အဝဲအယုက် ၁၆ သၞာံတံဂှ် စနူသၞာံဂတတေံတုဲ ကာန်ပနဳမဳဒဳယာပရေၚ်မၞိဟ်တံ ဒဂေတ်ဗက်အာရောၚ် ဝန်ဇၞော် ဖဟာဖဳ သ္ဂးရ။
ဟိုတ်နူကဵုမဳဒဳယာပရေၚ်မၞိဟ်တုဲ ပရေၚ်ဇီုကပါ် ဘဲအန္တရာဲပရေၚ်ထတ်ယုက်လ္တူကောန်ၚာ်တံဂှ် ဒှ်မံၚ်အရာပရေၚ်ဒွိဒွာဲအရာဂၠးကဝ်မွဲကီုတုဲ ကာန်ပနဳပိုၚ်ပြဳလဝ် TikTok၊ Snapchat၊ Google၊ Meta တံ မပ္တံကဵု Facebook၊ Instagram၊ WhatsApp တံဝွံ ဟိုတ်နူကဵုပရေၚ်ထတ်ယုက် ညံၚ်ဂွံယုက်ဒေက်အာ ဖန်ဖက်မံၚ်ဂးတုဲ ပ္ဍဲကဵုဍုၚ်အမေရိကာန် ဒးဒုၚ်စောဲအမှုရ။
ပ္ဍဲဍုၚ်အဝ်သတေလျမ္ဂး အဝဲအယုက်သၟဝ် ၁၆ တံ ပံက်လဝ်အကံက်နွံမံၚ်တံဂှ် စနူဂိတုဂတတေံတုဲ နူကဵုမဳဒဳယာ ပရေၚ်မၞိဟ်တံ ဒးမာတ်ကဵုရောၚ် မဒှ်ရ။
ညးမၚ်ရံၚ်ပရေၚ်ကောပ်ကာဲသၞောဝ်ဥပဒေ အလုံဂၠးကဝ်တံ မၚ်လ္ၚတ်ရံၚ်မံၚ် ပရေၚ်တာဒၞာဗီုတံဏံဂှ်ရ။
ပ္ဍဲကဵုဍုၚ်ပြၚ်သေတ်၊ သပုၚ်၊ အဳတလဳ၊ ဒိၚ်မာတ် ကဵု ဂရိတံကီုလေဝ် Software သွက်ဂွံသ္ပဒတန်အယုက်မွဲနဲမွဲဗီုမာန်ဂှ် ပံၚ်တောဲစမ်ၜတ်မံၚ်ကီုရ။
ပ္ဍဲကဵုဍုၚ်အေန်ဒိုနဳယှာ ဇိုၚ်ဝုတ်ဒိုဟ် မလေဝ်ယှာကီုလေဝ် စကာမံၚ်မဳဒဳယာပရေၚ်မၞိဟ်ဂၠိုၚ်မံၚ်တုဲ သွက်ဂွံတာဒၞာအယုက်ဍောတ်အိုတ်ဂှ် စဳဇန်မံၚ်ရောၚ် ဟီုလဝ်နူကဵုဂိတုဂျာန်နဝါရဳတေံကီုလေဝ် ဗွဲကြဴ ယှအ်ပတိတ်ကၠုၚ်ဥပဒေနွံရ။
အတိုၚ်ဥပဒေတၟိမ္ဂး ပ္ဍဲဂိတုဂျာန်နဝါရဳဏံ ညးစကာမဳဒဳယာပရေၚ်မၞိဟ် ဍုၚ်မလေဝ်ယှာတံ သွက်ဂွံပလံၚ်မက်သေဗ် ညးစကာမံၚ် မဳဒဳယာပရေၚ်မၞိဟ် ၈ ပြကောတိကိုဋ်တံဂှ် သွက်ဂွံဒးအာတ်အခေါၚ် နွံကၠုၚ်မာန်ရောၚ် မဒှ်ရ။
Ref:Reuters