တိုကျို၊ နိုဝမ်ပါ၂၆
စပ်ကဵုပရေၚ်ထာဲဝါန် ဟိုတ်နူပရေၚ်လဟီုလ္ဂး သ္ကိုပ်ဝန်ဇၞော် ဂျပါန် တာကအဳချဳတုဲ ဒှ်အာပရေၚ်ကယျာန်ဓဝါတ်ကဵုဗေကျေန်တုဲ ပရောပရာပရေၚ်ဆက်ဆောံကြုက်ဂှ် သ္ကိုပ်ဝန်ဇၞော်ဂျပါန် ဆက်ဖုၚ်သဳကၠဳလဝ်ကဵု သမ္မတအမေရိကာန် ဒဝ်နေဝ် ထရ နကဵုအလန်ပထမ ပ္ဍဲနဝ်ဝမ်ပါ ၂၅ ရ။
ယဝ်ရကြုက် ဗတိုက်ထာဲဝါန်မ္ဂး သွက်ဍုၚ်ဂျပါန် ဂွံဆက်တန်တဴအာ အန္တရာဲက္တဵုဒှ်ကၠုၚ်မာန်တုဲ နကဵုပရေၚ်ပၞာန် ဂျပါန် ပါလုပ်ကၠုၚ်မာန်ရောၚ် သ္ကိုပ်ဝန်ဇၞော် ဂျပါန် တာကအဳချဳ ဟီုလဝ်ပ္ဍဲကဵု စၠတ်ဓဝ်နွံရ။
လ္တူညးဟီုလဝ်ဂှ် ကြုက်ကလေၚ်ပ္လန်ကဵုဏာ နကဵုဒေါသဇၞော်ဇၞော်တုဲ ကောန်ဍုၚ်ကြုက်တံ ညံၚ်ဟွံဂွံအာတရဴဝေၚ်ဍုၚ်ဂျပါန်ဂှ် ဗတိုက်ဖအောဝ်လဝ်ရ။
ထာဲဝါန်ဂှ် ညးတံပိုၚ်ပြဳလဝ်ရောၚ် ကြုက်တံစၟတ်ကေတ်လဝ်တုဲ သွက်ဂွံကလေၚ်စိုပ်သၟဝ်ပရေၚ်အုပ်ဓုပ်ညးတံဂှ် ယဝ်ရပၟိက်နွံကၠုၚ်မ္ဂး စကာအာဇြဟတ်ပၞာန်ရောၚ် ဟီုလဝ်ရ။
နနဲပရၚ်ဒဳမဝ်ကရေသဳ ပရေၚ်ပရေၚ်ပိုင်ပြဳကုဇကု ထာဲဝါန်အုပ်ဓုပ်မံၚ်ဂှ် တးပါဲထောံ လဟီုလ္ဂး ဗေကျေန်တုဲ သွက်အနာဂတ်ဇကုတံဂှ် ညးဍုၚ်ကွာန်ဇကုတံဟေၚ် ကဵုအာသ္ဂုတ်သွာတ်ရောၚ် ကလေၚ်ပ္လန်ဟီုလဝ်ရ။
ဍုၚ်ထာဲဝါန် သွက်ဂွံပြံၚ်ကဵုတဲကြုက်ဂှ် ဒှ်ပရေၚ်လညာတ်ဂၠးကဝ်ကြုက် မွဲသ္ကုတ်မွဲသ္ကူဏောၚ် သမ္မတကြုက်ယှဳကျေအ်ဖျေန် ဟီုဂးလဝ်ကဵု ထရ နကဵုဖုၚ် ပ္ဍဲနဝ်ဝမ်ပါ ၂၄ တေံရ။
တၚ်သဳကၠဳ ပရေၚ်ကူသာန်ဗၞိက်ကဵုကြုက်တံ အကာဲအရာပရေၚ်တဴတက်နွံမံၚ် ထရ ဟီုကီုလေဝ် စပ်ကဵုပရေၚ်ထာဲဝါန်ဂှ် ဟီုပတိတ်လဝ်ဟၟဲဏီ။
သွက်ဂွံကလေၚ်အာသၟဝ်တဲကြုက်ပၠန်ဂှ် အရၚ်ညးဍုၚ်ကွာန် ၂၃ ပြကောတိကိုတ်တံ သွက်ဂွံရုဲစှ်ဟွံသေၚ်ပုဟ် သ္ကိုပ်ဝန်ဇၞော် ထာဲဝါန် ချိုဂျောန်တိုၚ် ဟီုလဝ် ပ္ဍဲနဝ်ဝမ်ပါ ၂၅ မဒှ်ရ။
ပရေၚ်ဆက်ဆောံ အမေရိကာန်-ကြုက် ဂွံညိၚ်ဝပ်ဂှ် သွက်ဂျပါန်ကီု ပွဳပွူဍုၚ်ဂၠးကဝ်တံကီု ကိစ္စဇၞော်မံၚ်ကွေံကွေံရောၚ် ဝန်ဇၞော်ဂျပါန် မဳနိုရူ ခဳဟာရာ ဟီုလဝ်ပ္ဍဲပေါဲသောၚ်ကလးပရိုၚ်လၟေၚ်ဍာံ နိုဝမ်ပါ ၂၅ ဂှ်ရ။
ဒှ်ပရေၚ်ကယျာန်ထဝါတ်ကဵုဂျပါန်ဂှ် ကြုက်ပတိုန်ထ္ၜးလဝ်ကဵု ကုလသမဂ္ဂတုဲ ပရေၚ်ဟီုဂးဂၠာဲမံၚ်သၞတံ ညံၚ်ဂွံဒေါအ်ထောံ ဗတိုက်လဝ်ကဵု တိုကျိုရ။
ပ္ဍဲကရပ်တ္ကအ်ထာဲဝါန် ဂျပါန်စဳဇန်လဝ် သွက်ဂွံဖျေံစွံအာ ကမ်သၠောဝ်တံရောၚ် ပရိုၚ်ဂျပါန်တံ ချူမံၚ်ရ။
Ref:Reuters