ကေန်သာယှာ၊ ဒဳဇြမ်ပါ ၁
သွက်သ္ဂောံဂွံပရေၚ်ၜိုဟ်လလမ် ပ္ဍဲဗၟံက်ဍုၚ်ကောန်ဂိုတုဲ သမ္မတဖဳလေတ် တဳသဳကဒဳကဵု သမ္မတရဝါန်ဒါတံ အာထပက်စၟတ်တဲ ပ္ဍဲဝါယှေန်တန်ရောၚ် အလဵုအသဳကောန်ဂို ဟီုလဝ် ပ္ဍဲနဝ်ဝမ်ပါ ၂၈ ရ။
ဂိတုဗွဲမဂၠိုၚ် ပရေၚ်ဂိုတ်ဂစာန် အမာတ်ကလုတ် သမ္မတအမေရိကာန် ဒဝ်နေဝ်ထရတံ တုဲဒှ်အာတုဲ ပရိုၚ်ဏံ မံက်တိတ်ကၠုၚ် မဒှ်ရ။
တန်တဴမံၚ်ကဵုအကာဲအရာ ရဝန်ဒါဒေါအ်ထောံအထံက်ပၚ်ကု ဂကောံရပ်လွဟ် M23 ဒှ်မံၚ်ပေါဲဗတိုက် အပ္ဍဲဗၟံက်ဍုၚ်ဂှ်တုဲ အလဵုအသဳကောန်ဂို ဒှ်ထပက်စၟတ်တဲ ပရေၚ်တုပ်စိုတ်ရောၚ် ဟီုမံၚ်မွဲဏှမွဲဏှရ။
စပ်ကဵုတင်တုပ်စိုတ်ဏံတုဲ သမ္မတရဝါန်ဒါ ပဝ်လ်ကာဂါမဳ ညာတ်တၠုၚ်လအာခိုဟ်ဂးတုဲ သမ္မတကောန်ဂို တဳသဳကဒဳ သ္ပဒတန်သွက်ဂွံထပက်အာစၟတ်သမ္တီ ပ္ဍဲကဵုဒဳဇြမ်ပါ ၄ ဏံ မံက်ကၠုၚ်မဒှ်ရ။
ဆဂး တၚ်ရန်တၟံညံၚ်ဂွံအံၚ်ဇၞး ညးတိုက်ရိုက်ဆေင်စပ်တံ စွံအာကတိကဝတ်မှ ပ္ဍဲကဵုဒေသကောန်ဂိုဗၟံက် ပရေၚ်ၜိုဟ်လမ်ဍာ်ဇမၠိၚ် တန်တဴမာန်ရောၚ် သမ္မတ တဳသဳကတဳ ဟီုရ။
ပ္ဍဲဒေသဗၟံက်ကောန်ဂို အကြာဒပ်ပၞာန်အလဵုအသဳကဵု ဂကောံရပ်လွဟ်ၜိုတ် ၁၀၀ ဂကောံတံ ဒှ်မံၚ်ပေါဲဗတိုက်ဂှ် ဂကောံရဝါန်ဒါကဵုလဝ်အထံက်ပၚ် M23 ဇြဟတ်ခိုဟ်တဴအိုတ် မဒှ်ရ။
ပဋိပက္ခတံ အပ္ဍဲသၞာံဏံ အသိၚ်သၠုၚ်တိုန်တုဲ ဂကောံရပ်လွဟ် M23 သီကေတ်လဝ်ဒေသအဓိက ဍုၚ်ဂိုမာကဵု ဗူကာဗူဂှ် ပြဿနာ ပရောဒဒှ်ပရေၚ်ဗ္စာရဏာမၞိဟ်ပဵုပရေအ်အိုတ်မွဲ ပ္ဍဲဂၠးကဝ်ဏံ က္တဵုဒှ်မံၚ်ရ။
နူကဵုအလဵုအသဳ ရဝါန်ဒါ ဖျေံလဝ်ဇြဟတ်ဒပ် အပ္ဍဲကဵုဒေသဗၟံက်ဏံ ကရောံဂကောံရပ်လွဟ် M23 နွံမံၚ်အကြာ ၃၀၀၀ ကဵု ၄၀၀၀ ရောၚ် ညးစီုသကီုကုလသမဂ္ဂတံ ဟီုရ။
ပရေၚ်ရီုဗၚ်ဗီုတံဏံဟၟဲပုဟ် ရဝါန်ဒါ ဟီုမံၚ်ကီုလေဝ် သွက်ဂွံစဵုဒၞာပၞောန်ပယျဵုညးတံ ပ္ဍဲပဋိပက္ခ ရပ်စပ်ရေၚ်တၠုၚ်လဝ်နွံမံၚ် ဟီုမံၚ်ကီုရ။
အတိုၚ် ဝန်ဇၞော်ဍုၚ်သ္အာၚ် ကောန်ဂိုကဵု ရဝါန်ဒါ ပ္ဍဲကဵုတၚ်တုပ်စိုတ်ဂိတုဂျောန်တေံဂှ် ဒပ်ရဝါန်ဒါတံ သွက်ဂွံကလေၚ်ဆုတ် တုပ်လဝ်စိုတ်တုဲတုဲ မဒှ်ရ။
ပ္ဍဲကဵုစဳဇန်လဝ် ပရေၚ်ထပက်စၟတ်တဲတင်တုပ်စိုတ်ဏံဂှ် သၟာဗတိုက် M23 တံ ညံၚ်ဟွံဂွံပါလုပ်ကၠုၚ် ညးအခေါၚ်ဟီုဂးနွံ ရုၚ်သမ္မတကောန်ဂို တဳနာ သာလာမာ ဟီုလဝ်ရ။
Ref:AP