တဳဗလဳသဳ၊ ဒဳဇြမ်ပါ ၂
ပ္ဍဲကဵုသၞာံအာတေံ လ္တူညးထ္ၜးဆန္ဒတံ အလဵုအသဳဂျဝ်ဂျဳယာ စကာလဝ်လွဟ်ဓါတု နူကဵုခေတ်ပၞာန်ဂၠးကဝ်ပထမတေံရောၚ် ဌာန်ပရိုၚ် BBC ထမံက်ပတိတ်လဝ်ရ။
ညးထ္ၜးလဝ်ဆန္ဒ လ္တူဂၠံၚ်ဍုၚ်တဳဗလဳသဳတံ အခိၚ်ဒးဒုၚ်ပက်လဝ်ကဵု ပိုက်ဍာ်ပလိုတ်ပၟတ်တံဂှ် ညံၚ်ရဴတူပၟတ် ဒးဒုၚ်စသိုၚ်လဝ် ညးထ္ၜးဆန္ဒမွဲတၠ ဟီုရ။
လ္တူအလဵုအသဳဂျဝ်ဂျဳယာ ဒေါအ်ထောံလဝ် ပရေၚ်ဂစာန်လုပ်ဂကောံ သမဂ္ဂယူရောပ်ဂှ်တုဲ ညးထ္ၜးဆန္ဒတံ လက်ျှန် ယီုဝါတ်၊ ဟဍက်ကဵု ဟအှ်တံ သတ္တဟဗွဲမဂၠိုၚ် ဒးဒုၚ်စသိုၚ်လဝ်ရ။
နူကဵု BBC World Service သၟာန်သဳကၠဳလဝ်ကဵု တၠပညာလွဟ်ဓါတုတံ ညးပံက်ဟီုလဴကဵုပရိုၚ်ဒပ်ဗၠာဲသၟိၚ် ဂျဝ်ဂျဳယာတံ၊ အစာသဝ်တံဂှ် သက်သဳစကာသုၚ်စောဲလဝ် ဒြပ်ပံၚ်ကာမိုက် ယၟုဒပ်ပၞာန်ပြၚ်သေတ်တံ ကဵုလဝ်ယၟုဂှ် နွံမံၚ်ရောၚ်။
ပရေၚ်ဌာနပရိုၚ် BBC ဂၠိုက်ဂၠာဲထမံက်ပတိတ်ဏံဂှ် အဓိပ္ပါယ်ဟၟဲပုဟ် ညးတာလျိုၚ်ဂျဝ်ဂျဳယာတံ ဟီုလဝ်တုဲ ပ္ဍဲကဵုအရာကလေၚ်ပ္လန် ရဲရာဇဝတ်ဟွံလုပ်သၞောဝ်တံဂှ် ဒပ်ဗၠာဲသၟိၚ်ကၠောန်သ္ပဏာ ဗွဲမလုပ်သၞောဝ်ရောၚ် ဟီုလဝ်ရ။
ဒြပ်ပံၚ်ကာမိုက်ဂှ် ပ္ဍဲပၞာန်ဂၠးကဝ်အလန်ပထမ ကာလပြၚ်သေတ် ဗတိုက်လဝ်ဂျာမဏီ စကာလဝ်မဒှ်ရ။
စပ်ကဵုပရေၚ်စကာလဝ် လွဟ်ဓါတ်ဓါတုတုဲ တၚ်စၟတ်သမ္တီသှ်ေမံၚ်ညိညကီုလေဝ် ဂွိၚ်ဖေက်တၚ်ယုတ်ဒေက်ပရေၚ်အဓါန်ဂတတုဲ ပ္ဍဲကဵု ၁၉၃၀ တေံ ဒေါအ်လဝ်ပရေၚ်ပတိတ်လဝ်ဓါတ်ဏံရ။
စၞးဏံ ဓါတ်ဍာ်ရမတ်ဓဇူ ကော်ခဴစ CS တံ ဗွဲကြဴ စကာကၠုၚ်လဝ်ရ။
တၚ်ရန်တၟံသွက်ဂွံဒှ်ကောန်ဂကောံ ယူရောပ် ပ္ဍဲကဵုသ္ဇိုၚ်သၞောဝ်ယူရောပ် စၟတ်သမ္တီထမံက်လဝ်ကီုလေဝ် ပရေၚ်သွက်ဂွံဒှ်ကောန်ဂကောံ ယူရောပ်ဂှ် ဒေါအ်လဝ်ရောၚ် ဗော်ဂွံအဝဵုလလောၚ်တြးတုဲ ပ္ဍဲကဵု ၂၀၂၄ သၞာံ ဂိတုနဝ်ဝမ်ပါ ၂၈ ဂှ် ပေါဲထ္ၜးဆန္ဒ ပ္ဍဲကဵုဂျဝ်ဂျဳယာ စက္တဵုဒှ်ကၠုၚ် မဒှ်ရ။
ဒပ်ဗၠာဲသၟိၚ်ဂျဝ်ဂျဳယာတံဂှ် စကာပိုက်ဍာ်ပလိုတ်ပၟတ်၊ ဂဥုဲမြေက်ခမေက် ကဵု ဓါတ်သၟု CS တံတုဲ နဲကဲနာနာ ဍိုက်ပလီုလဝ် ပရေၚ်ကလိုက်ကၟဵုတံရ။
အစာသဝ်ပါလုပ်လဝ် ပ္ဍဲကဵုပေါဲထ္ၜးဆန္ဒဏံ ဒးဒုၚ်ပက်ကဵု ပိုက်ဍာ်ပလိုတ်ပၟတ်ဂှ် ဒးဒုၚ်စသိုၚ် ယဲစၞာံဇကု ဟွံဗၠးလောဲလောဲတုဲ ဗက်ကံက်ရံၚ်တၚ်နၚ်အန်လိုၚ်ဂှ် ညးဒးဒုၚ်လဝ်ဝေဒနာဗီုညးတေံ မၞိဟ်နွံမံၚ်လၟိဟ်ကဵုကၠမ် ဂွံဆဵုလဝ်ရ။
ပေါဲထ္ၜးဆန္ဒကြပ်ဇၟာပ်ဗ္တံ ပ္ဍဲသၞာံအာတေံ ဒှ်လဝ်တုဲ အာတ်မိက် အလဵုအသဳညံၚ်ဂွံနုက်တိတ်ကဵု တင်စောဲစပ်လဝ် ပရေၚ်လီဠာန်ပေါဲရုဲမာဲတံရ။
အလဵုအသဳတံ ကၠောန်မံၚ်ကဵုသွက်ဖဵုဂုဏ်ရတ်ယှာရောၚ် ညးဍုၚ်ကွာန်ဂျဝ်ဂျဳဗွဲမဂၠိုၚ်စောဲစပ်ကီုလေဝ် ဗော်လ္ပံညာတ်ဂျဝ်ဂျဳယာ ဂွံလဝ်အဝဵု တးပါဲလဝ်ရ။
Ref:BBC