ယဳလန်၊ ဒီဇြမ်ပါ ၃
စပ်ကဵုပရေၚ်ဂီုကၠီုဍုၚ်နိဂီုမ္ဂး အရာသွက်ဂွံပ္ညဳပ္ညပ်ဟၟဲရောၚ် သမ္မတထာဲဝါန် လိုၚ်ချေၚ်တဳ ပ္ဍဲကဵုဒဳဇြမ်ပါ ၂ ဂှ် ဟီုဏာကဵု ဒပ်ပၞာန်အရန်တံရ။
ဒုၚ်လဝ်သ္ဇိုၚ်ပရေၚ်စွံၚုဟ်မး မုလေဝ်ဟွံဆေၚ်စပ်ကဵု ပွမဒးကယျာန်ဓဝါတ် ဆေင်စပ်ကဵု လညာတ်လချပ် အခေါၚ်ဗၠးဗၠးၜးၜးကဵု ဒဳမဝ်ကရေသဳရောၚ် သမ္မတထာဲဝါန် ဟီုရ။
ထပ်ထပဵုစကာသုၚ်စောဲအာ ဗါတ်ဂျက်ဘဏ္ဍာပရေၚ်စဵုဒၞာ ဒဝ်လာအမေရိကာန် ၄၀ ဗဳလဳယာန်ရောၚ် တုဲကၠုၚ်သတ္တဟတေံ အတိုၚ်လဳချေၚ်တံ လလောၚ်တြးလဝ်မ္ဂး နူကဵုပရေၚ်ဘပဠကြုက်တံ ပဵုကြီုမံၚ်တံ နအလဵုကုဇကုထာဲဝါန် အရၚ်ဂွံစဵုဒၞာအာကေတ်တ်ဂှ် ဖျေံလဝ်သ္ဂုတ်သွာတ်ရောၚ် ထ္ၜးလဝ်ကၠးမးမံၚ်ရ။
ဍုၚ်ထာဲဝါန် နကဵုနဲဒဳမဝ်ကရေသဳ ပရေၚ်အုပ်ဓုပ်ကုဇကုဝွံ နကဵုဒေသကြုက်တံ ပိုၚ်ပြဳရောၚ် ခုတ်စၟတ်လဝ်တုဲ သွက်ဂွံစွံသၟဝ်ပရေၚ်အုပ်ဓုပ်ဍေံတံ ခါရဒးသုၚ်စောဲဇြဟတ်မ္ဂး သုၚ်စောဲအာရောၚ် ဟီုလဝ်ရ။
ပ္ဍဲကဵုဒေသယဳလန် ဒိုဟ်ဧသာန် လဳချေၚ်တဳ အာဟီုလဝ်ကဵု ဒပ်ပၞာန်အရန်တံဂှ် အခိၚ်ဒးဇီုကပါ်မံၚ်ကဵု ပရေၚ်ကြုက်တံကရေပ်ဓရတ်၊ ဟဍိုက်ဟရိုက်မံၚ်ဏံ သွက်ပရေၚ်စဵုဒၞာမ္ဂး နကဵုအလဵုအသဳဇကု ထပ်ထပဵုစကာသုၚ်စောဲအာသြန်မဒှ်တုဲ အကာဲအရာမ္ဒးတတ်ကၠောံအာပရေအ်အိုတ်တံဂှ် သွက်ဂွံပဵုခိုဟ်တိုန် ဒးပလေဝ်စလဝ်ရောၚ် ဟီုရ။
သွက်သ္ဂောံဂွံပရေၚ်ၜိုဟ်လလမ်ဍာံဍာံမာန် နကဵုထာဲဝါန် သ္ဒးသ္ပပဓာန်လဝ်ကဵု ဇြဟတ်ရောၚ် လဳချေၚ်တဳ ဟီုရ။
ပရေၚ်ၜိုဟ်လလမ်ဟီုဂှ် နူကဵုတၞးလိက်တၚ်တုပ်စိုတ်ပရေၚ်ၜိုဟ်လလမ်မွဲအဆံၚ် ဂွံမာန်ဟွံသေၚ်။ ဗက်စကဵု အတိုၚ်ပၟိက်ညးဂၠာဲသၞဂှ်လေဝ် ကေတ်ဂွံဟွံမာန်ရောၚ် ညးထပ်ဟီုလဝ်ရ။
ပရေၚ်အထံက်ပၚ်ဇြဟတ် ရုံရုံဂပ်ပ် ဟွံဂွံမွဲသာ် ကၠောန်အရာဒက်ပတန်ပရေၚ်ညဳသာဟီုဂှ် စိုပ်လအိတ်မ္ဂး ကဵုပယျရဒှ်ကၠုၚ်မာန်ရောၚ် လိုၚ်ချေၚ်တဳ ဟီုရ။
ပ္ဍဲထာဲဝါန် အခိၚ်ယိုက်ဝန်ပၞာန်ဂှ် ကိုပ်ကၠာတေံ ပန်ဂိတုဟေၚ် စၟတ်လဝ်ကီုလေဝ် ခြာဟွံလံဏံ ထပဵုတိုန်ပွိုၚ်မွဲသၞာံတုဲ သွက်ခန်လ္ၚတ်ဒပ်ပၞာန်အရန်တံဂှ် အစဳဇန်ဗတိုက်၊ ပန်တံလေဝ် စၟတ်စုတ်လဝ်ကီုရ။
ဇြဟတ်ကၠောန်ပတိတ်လွဟ်အပ္ဍဲဍုၚ် ဇြဟတ်ညံၚ်ဂွံပဵုခိုဟ်ဂှ် ထာဲဝါန်ကၠောန်လဝ်ကီုလေဝ် ဂကူလွဟ်အဆံၚ်သၠုၚ် ၜၚ်ကျာပၞာန်တံမ္ဂး ဒးပတေဟ်စယီုမံၚ်ကဵု အမေရိကာန် ဟၟဲကဵုပရေၚ်ဆက်စၠောံအမာတ်ကလုတ် လုပ်ဗဗွဲဓဝ်ဟွံသေၚ်ဏီရ။
ပ္ဍဲအရာဒပ်ပၞာန်ထာဲဝါန် ကတ်လ္ၚတ်ဗတောန်မံၚ်ဂှ်လေဝ် အမေရိကာန် ရီုဗၚ်ကဵုမံၚ်ရ။
ပွမဟီုဂးမံၚ် ကြုက်တံပိုၚ်ပြဳလဝ် လ္တူထာဲဝန်ဂှ် လိုၚ်ချေၚ်တဳ တးပါဲလဝ်တုဲ သွက်အနာဂတ်ဇကုတံဂှ် ညးဍုၚ်ကွာန်ထာဲဝါန်တံဟေၚ် ကဵုသ္ဂုတ်သွာတ်မာန်ရောၚ် ဟီုလဝ်ရ။
Ref:Reuters