ဝါယှေန်တန်၊ ဒဳဇြမ်ပါ ၄
စပ်ကဵုပရေၚ်ဂီုကၠီုကောန်ဂကူ၊ ညးဍုၚ်ကွာန်ဂွံဗၠးဘဲဒဏ်တံဂှ် ထ္ၜးဟိုတ်ပရေၚ်ဒှ်ဒွိၚ်တုဲ သွက်ဂွံပတိတ်ကဵုကာတ်အရံၚ်ဍီုကီု ညံၚ်ဂွံဒှ်ကောန်ဍုၚ်အမေရိကာန်ကီု ညးဆုဲပြံၚ်ကၠုၚ် နူကဵု ၁၉ ဍုၚ် ဍုၚ်ယူရောပ်ဟွံသေၚ်တံ တၚ်ဂမြၚ်ဗတီအာတ်မိက် ပွမဆုဲပြံၚ်မံၚ်စံၚ်အိုဿီုတံဂှ် အလဵုအသဳထရ ဒေါအ်ရောၚ် ပ္ဍဲဒဳဇြမ်ပါ ၂ ဟီုရ။
ပရေၚ်အာတရဴတံ နူကဵုဂိတုဂျောန်တေံ ဒေါအ်ကၠုၚ်လဝ်မွဲသ္ကုတ်သ္ကူဂှ် မၞိဟ် ၁၉ ဍုၚ်ဏံလေဝ်လုပ်အဝေါၚ်တုဲ စပ်ကဵုပရေၚ်မံၚ်စံၚ်ဆုဲပြံၚ်ဂှ် ထပ်ခုတ်စၟတ်ပိုၚ်ခြာဏာပၠန် မဒှ်ရ။
ပ္ဍဲစရၚ်ဏံမ္ဂး ဗမာ၊ အာဖဂါန်နေတ်သတာန် ကေုာံ သိုဝ်မာလဳယာတံ ပါလုပ်ရ။
ပ္ဍဲသတ္တဟတုဲကၠုၚ် စပ်ကဵုပရေၚ်ပန်လဝ် ကောန်ဂကောံဒပ်မၚ်မွဲကောန်ဂကူတုဲ ပ္ဍဲတၚ်လလောၚ်ဏံ စုတ်ဏာလဝ် မူဝါဒတၟိ မဒှ်ရ။
သွက်ပရေၚ်ပန်ဗတိုက်လဝ်ဏံ ရပ်ဂွံလဝ် ကောန်ဍုၚ်အာဖဂါန်နေတ်သတာန်မွဲတၠ နကဵုသံသယတုဲ စဳဇန်မံၚ် သွက်ဂွံပတိုန်အမှုဂစိုတ်မၞိဟ်ရ။
ပ္ဍဲကဵု ပရေၚ်ပန်ဗတိုက်လဝ်ဏံဂှ် ကောန်ဂကောံဒပ်မၚ်မွဲကောန်ဂကူမွဲတၠ ချိုတ်အာ၊ မွဲတၠပၠန်ဂှ် ဒးလဝ်ဘဲဝပ် ဇၞော်ကဵုဇြဟတ်ရ။
ကောန်ဍုၚ်သိုဝ်မာလဳယာတံဂှ် ဒှ်မံၚ်ဟမိက်သုၚ်စောဲဟွံဂွံတုဲ ဒှ်မံၚ်မၞိဟ်ဍုၚ်ဇကုတံဟၟဲပၟိက်ရောၚ် ခြာဟွံလံ ထရ ဟီုလဝ်နွံမံၚ်ရ။
နူဂိတုဂျာန်နဝါရဳ စိုပ်ကၠုၚ်သ္ၚိဗတာၚ်တုဲ ဥပဒေစပ်ကဵုပရေၚ်ဆုဲပြံၚ်မံၚ်စံၚ်တံဂှ် ထရ ကရေပ်ဓရတ်လဝ်၊ ဂကောံပရေၚ်ဂီုကၠီုအေဂျေၚ်သဳဖိတ်ဒရေဝ်ဗွဲမဂၠိုၚ်တံဂှ် ပလံၚ်ဗစိုပ်ဏာ ဍုၚ်ဇၞော်အမေရိကာန်၊ ညးအာတ်မိက်မံၚ်စံၚ် ပ္ဍဲကဵုပယျဵု အမေရိကာန်-မက္ကသဳကိုတံဂှ် ထဍေၚ်ပတိတ်မံၚ်ရ။
ပ္ဍဲကဵုဍုၚ်စရၚ်ဒၞာတာလဝ်ဏံမ္ဂး အာဖဂါန်နေတ်သတာန်၊ ဗမာ၊ ချက်၊ ကၟိန်ဍုၚ်ကောန်ဂို၊ အဳကွေတိုရဳယာ ဂဳနဳယာ၊ အဳထရဳယာ၊ ဟေတဳ၊ လေတ်ဗျာ၊ သိုဝ်မာလဳယာ၊ သူဒါန်ကဵု ဍုၚ်ယဳမေၚ်တံပါလုပ်တုဲ ဗွဲမဂၠိုၚ်ဂှ်တှ်ေ ဍုၚ်ဒးဒုၚ်တာဒၞာလဝ် ပရေၚ်ဆုဲပြံၚ်မံၚ်စံၚ် နူကဵုဂိတုဂျောန်တေံ မဒှ်ရ။
ပ္ဍဲကဵု ၁၉ ဍုၚ် မွဲသ္ကုတ်မွဲသ္ကူ စရၚ်ဒးဒုၚ်တာဒၞာလဝ်ဂှ် ဗူရမ်ဒဳ၊ ကျူဗာ၊ လာအို၊ သဳရဳယာ လဳယောန်၊ တောန်ဂို၊ တက်ခမာန်နေတ်သတာန်ကေုာံ ဍုၚ်ဗေန်နဳဇဲလာတံ မဒှ်ရ။
Ref:Reuters