ၜံၚ်ကံက်၊ ဒဳဇြမ်ပါ ၅
သွက်လၟေၚ်တရဴယာန်ကျာဍုၚ်ဂၠးကဝ် ကေုာံ ညးအာတရဴတိတ်ဍုၚ်မ္ၚးတံ အကံက်သၞေဟ်ၜၚ်ကျာ စရိတ်ၚုဟ်မးရေၚ်တၠုၚ်တံ သွက်ဂွံထပဵုကံက်အာ ၅၃% ဂှ် ဂကောံဗုက်ပရေၚ်ပဝ်ယာန်ကျာသေံ တုပ်စိုတ်ကဵုအခေါၚ်ရ။
စရိတ်ၚုဟ်မးရေၚ်တၠုၚ် သွက်လၟေၚ်တရဴဂၠးကဝ်တံ နူကဵု ၇၃၀ ၜါတ်ဂှ် သွက်ဂွံသၠုၚ်ပတိုန်ကံက်အာ ၁၁၂၀ ၜါတ် အတိုၚ်ကာန်ပနဳဂကောံကမၠောန်သၞေဟ်ၜၚ်ကျာသေံ (AOT) အာတ်မိက်ပတိုန်ထ္ၜးလဝ်ဂှ် နူကဵု ဂကောံဗုက်ကဵုအခေါၚ်ယျ သာ်ဝွံညးက္ဍိုပ်ဂကောံဗုက် ဝန်ဇၞော်ပရေၚ်ပလံၚ်ဗစိုပ်သေံ ဖဳဖာတ် ရာတ်ချာကေတ်ပရာခါန် ဟီုရ။
အခိၚ်ရာန်လဝ်စၟတ်တဲၜၚ်ဂှ် စရိတ်ၚုဟ်မးရေၚ်တၠုၚ်သၞေဟ်ၜၚ်ကျာ ပါမံၚ်တုဲတုဲမဒှ်ဂှ်ရ နူကဵုသေံ အာတရဴဍုၚ်ဂၠးကဝ်တံမ္ဂး ၚုဟ်မးစၟတ်တဲၜၚ်ကျာတံ သၠုၚ်တိုန်ရောၚ်။
စရိတ်ၚုဟ်မးရေၚ်တၠုၚ်ညးအာတရဴ သၠုၚ်လဝ်ဏံ ပ္ဍဲကဵုသၞာံတၟိမံက်ဏံမ္ဂး လမျီုစလုပ်ကၠုၚ်မာန် စၟဳလဝ်ရ။
စရိတ်ၚုဟ်မးရေၚ်တၠုၚ်ညးအာတရဴအပ္ဍဲဍုၚ်တံဂှ် ဟွံပြံၚ်သၠာဲ ဒးကဵု ၁၃၀ ၜါတ် အတိုၚ်ကၠာကၠာတေံပၠန်ရ။
နူကဵု AOT သ္ကိပ်သ္ကလဝ် သုဝဏ္ဏဘုံမိ၊ ဒွောန်မံၚ်၊ ဖူကိတ်၊ ဇၚ်မာဲ၊ ဟာတ်ယာဲကဵု ချေန်ရာဲ သၞေဟ်ၜၚ်ကျာအဓိက ၆ ဒၞာဲ မဒှ်ရ။
စပ်ကဵုအစဳဇန်ဏံ ဂကောံကမၠောန်ကာန်ပနဳ (AOT) ကေတ်လဝ်ဆန္ဒညးဂမၠိုၚ်တုဲ သွက်ဂွံသၠုၚ်ပတိုန်ကံက်အာစရိတ် ဗွဲမဇိပ်ဂၠိပ်ပတိုန်ထ္ၜးကုဇရေၚ် ဝန်ဇၞော်ပရေၚ်ပလံၚ်ဗစိုပ်ဂှ် ဗွဲကြဴအိုတ် ထပ်သ္ပအာဒတန်ပၠန်ရောၚ်။
တုဲပၠန် နူကၠာဟွံကံက်စရိတ်ၚုဟ်မးတၟိဏံ ဒစးဒုၚ်ပွိုၚ်ပန်ဂိတုတုဲ သွက်ညးမၠိုၚ်သ္ဂောံတီ ဒးလလောၚ်တြးအာရောၚ်။
ယဝ်ရ AOT သၠုၚ်ပတိုန်အကံက် သၞေဟ်ၜၚ်ကျာမ္ဂး နူကဵုသၞေဟ်ၜၚ်ကျာ ၆ ဒၞာဲဏံ ညးအာတရဴတတ်ကၠောံမံၚ် လၟေၚ်သၞာံခြောံလဝ် ၃၅ ပြကောဋိကိုတ်တံဂှ် ဒုၚ်သ္ဇိုၚ်တုဲ မွဲသၞာံမ္ဂး သြန်ထပ်လုပ် ပွဳပွူ ၁၀ ဗဳလဳယာန်ၜါတ် ဂွံမာန်ရောၚ်။
ဟိုတ်နူကံက်ထပဵုတိုန် စရိတ်ၚုဟ်မးဂှ် ပ္ဍဲအရာကမၠောန်ရေၚ်တၠုၚ်သၞေဟ်ၜၚ်ကျာတံကီု ပရေၚ်ဘဲအန္တရာဲဗၠးၜးတံကီု ဇြဟတ်ပဵုခိုဟ်တိုန်မာန်ရောၚ် ဂကောံဗုက်တရဴယာန်ကျာလပါ်အရာပ်တံ ဟီုရ။
လ္တူဂွံကၠုၚ်သြန်တံဏံ သွက်ညးအာတရဴတံ ပရေၚ်ညံၚ်ဂွံပြေပြံၚ်အာမာန် ထပ်ဓလိုက်တမ်ရိုဟ် ပ္ဍဲကမၠောန်ရေၚ်တၠုၚ်တံမာန်ရောၚ် ဂကောံဗုက် ဟီုဂးလဝ်ရ။
Ref:Bangkokpost