ၜံၚ်ကံက်၊ ဒီဇင်ဘာ ၇
သွက်ပေါဲရုဲမာဲ ပ္ဍဲကဵုရုၚ်ကလုတ်ဗမာဍုၚ်ၜံၚ်ကံက် ကောန်ဍုၚ်ဗမာညိညလ္ၚဵုတံ ကၠုၚ်ကဵုမာဲဒစးဒုၚ် ပ္ဍဲကဵုဒဳဇြမ်ပါ ၆ ဂှ် လၟိဟ်ဗွဲမအောန်ကွေံရ။
ဒပ်ပၞာန်သီအဝဵု ပ္ဍဲသၞာံ ၂၀၂၁ တုဲ ပ္ဍဲကဵုဍုၚ်ဗမာပၞာန်အပ္ဍဲဍုၚ်က္တဵုဒှ်မံၚ်တုဲ ဒပ်ပၠန်ဂတးတံ ၜိုန်ရသီဂွံလဝ် ဒၞာဲဗွိုၚ်တိဍာ်ဗွဲမဂၠိုၚ်ကီုလေဝ် ပေါဲရုဲမာဲဏံ ဂွံပရေၚ်ၜိုဟ်လလမ်ကဵု ဒဳမဝ်ကရေသဳမာန်ရောၚ် ကဝ်မယှေန်ပၞာန် ကဵုလဝ်ကတိရ။
ပ္ဍဲဒေသလ္ၚဵု စနူဒဳဇြမ်ပါ ၂၈ ကၠောန်အာပေါဲရုဲမာဲသ္ကုတ်ကဵုသ္ကုတ်ကီုလေဝ် ပ္ဍဲဟံၚ်ကံၚ်၊ သေၚ်ကာပူ၊ ဇင်မာဲကဵု ဍုၚ်ၜံၚ်ကံက်တံ ကဵုလဝ်အခေါၚ်ကဵု ကောန်ဍုၚ်ဗမာတံ သွက်ဂွံကဵုမာဲဒစးဒုၚ် မဒှ်ရ။
ပ္ဍဲဒဳဇြမ်ပါ ၆ ဂှ် သၠုၚ်လဝ်ပရေၚ်ဂီုကၠီု ဒၞာဲကဵုရုၚ်ကလုတ်ၜံၚ်ကံက်တုဲ အခိၚ်စကဵုမာဲ ပထမပွိုၚ်ၜါနာဍဳမ္ဂး မၞိဟ်ကၠုၚ်ကဵုမာဲ နွံဆၜိုတ် ၂၅ တၠဂွံဆဵုလဝ် အစာပရိုၚ် AFP ဟီုလဝ်ရ။
မၞိဟ်ကဵုလဝ်မာဲဗွဲမဂၠိုၚ်တံ ညိဟွံဟီုလဴဆန္ဒညးတံမွဲသာ်ပုဟ် အစာပရိုၚ်တံ ဟီုရ။
ပ္ဍဲကဵုဍုၚ်ၜံၚ်ကံက် ကောန်ဍုၚ်ဗမာၜိုတ် ၅ ကိုတ် နွံမံၚ်ကဵုတၞးလိက်အခေါၚ်မံၚ်စံၚ်တန်တဴရောၚ် ဂွံတီလူကဵု စရၚ်ဝန်ဇၞော်သၟာကမၠောန်သေံတံ လလောၚ်တြးလဝ်ရ။
ပ္ဍဲဍုၚ်သေံ ကောန်ဍုၚ်ဗမာ ၄ ဒဿမ ၁ ပြကောတိကိုတ်နွံမံၚ် ဗွဲမဂၠိုၚ်တံမ္ဂး ဟိုတ်နူကဵုပၞာန်အပ္ဍဲဍုၚ် ဂြိပ်ပါဲဒဴစိုပ်ကၠုၚ်လဝ်တုဲ ညးဟၟဲကဵုလိက်ထံက်ဂလာန်ပရေၚ်မံၚ်စံၚ်တန်တဴ နွံမံၚ်ဗွဲမဂၠိုၚ်ရောၚ် ဂကောံဆုဲပြံၚ်ဂၠးကဝ်တံ လ္ၚတ်ဂွံလဝ်ရ။
သွက်ဂွံကဵုစရၚ်မာဲဒစးဒုၚ်ဂှ် စၟတ်စွံလဝ်ဂိတုအံက်တဝ်ပါ ၁၅ တေံကီုလေဝ် ညးပတိုန်လဝ်စရၚ်စၟတ်သမ္တီသွက်ဂွံကဵုမာဲ နွံမူစိတၠ ညးတံဟွံတီပုဟ် ညးတာလျိုၚ်ရုၚ်ကလုတ်ဗမာတံ ဟီုလဝ်ကဵုဌာန်ပရိုၚ် AFP ရ။
အဝဵုပၞာန်ဗမာတံ ညံၚ်ဂွံဆက်တန်ကြန်အာ နနဲဗီုပြၚ်မွဲဗီု ကၠောန်အာပေါဲရုဲမာဲအလီမဒှ်ရောၚ် ကုလသမဂ္ဂကဵု ဍုၚ်ဒဳမဝ်ကရေသဳတံ ပျုတ်ဗ္ဒေက်ဟီုဂးမံၚ်အိုတ်ရ။
ပ္ဍဲကဵုကဝ်မယှေန်ပၞာန် ချူခၞံလဝ်သၞောဝ်တၟိ ဥပဒေသွက်ဂွံစဵုဒၞာဲပေါဲရုဲမာဲမ္ဂး ညးပါ်ပါဲပေါဲရုဲမာဲတံ ညးပလီုပထုဲတံ ထံၚ်နူကဵု ၇ သၞာံ ဒဵုကဵုအမိၚ်ဂစိုတ် ဖျေံအာမာန်ရောၚ်။
နကဵုအခေါၚ် တန်တဴမံၚ်စံၚ်အခေါၚ်လၟိုန်ဟွံသေၚ်တုဲ ယဝ်ရဟွံကဵုလဝ်မာဲမ္ဂး အခိၚ်အာဆက်အယုက်တံဂှ် ဒးဒုၚ်ဂၠာဲပြဿနာပရောပရာဒှ်ကၠုၚ်မာန်ရောၚ် အကြာကောန်ဍုၚ်ဗမာ စိုပ်ဍုၚ်မ္ၚးတံ ဂွိၚ်ဂွာဲမံၚ်နွံကီု ဂွံတီရ။
Ref:AFP