ၜၚ်ကံက်၊ ဒဳဇြမ်ပါ ၁၀
ပေါဲရုဲမာဲကဝ်မယှေန်ပၞာန်ဏံ ပတေဟ်စဟွံဂွံတုဲ ဗီုပြၚ်ဂွံသ္ပစၟတ်သမ္တီမာန်ဟၟဲပုဟ် အခိၚ်စဴကၠုၚ်နူကဵု နေပျဳတဝ်ဂှ် ဝန်ဇၞော်ဍုၚ်သ္အာၚ်သေံဟီုလဝ် ပ္ဍဲဍုၚ်ၜၚ်ကံက်ရ။
ပေါဲရုဲမာဲတုဲမ္ဂး သွက်ဂွံသၠောဲပြံၚ်ပအပ်ကဵုအဝဵု ၜိုဟ်ဟ်သြိုဟ်ဟ်မာန် ဗတိုက်ဖအောဝ်လဝ်ကဵု က္ဍိုပ်သ္ကိုပ်ပၞာန်ဂှ်လေဝ် ဝန်ဇၞော်ဍုၚ်သ္အာၚ်သေံ သဳဟာသက် ဖျူအာန်ခါတ်ကွေ ဟီုလဝ်ကဵု အစာပရိုၚ်တံ ပ္ဍဲဒဳဇြမ်ပါ ၈ ရ။
ဟိုတ်နူသီအဝဵု ပ္ဍဲ ၂၀၂၁ သၞာံဂှ် ပၞာန်အပ္ဍဲဍုၚ်ဒှ်မံၚ်ကီုလေဝ် ပေါဲရုဲမာဲဂှ် ဒှ်အစဳဇန် သွက်ဂွံကလေၚ်အာ ပရေၚ်ၜိုဟ်လလမ်ကဵု သၞောတ်ဒဳမဝ်ကရေသဳရောၚ် က္ဍိုပ်သ္ကိုပ်ပၞာန်တံ ကဵုလဝ်ကတိရ။
ကၠာဟွံစိုပ်ပေါဲရုဲမာဲဏီ ဒပ်ပၞာန်ရပ်စပ်ကေတ်မံၚ်အရေဝ် ညးဒစဵုဒစးတံဂှ် ဂကောံမံၚ်ရံၚ်အခေါၚ်အရာမၞိဟ်တံ ဟီုမံၚ်တုဲ ပေါဲရုဲမာဲဏံဂှ် ဒှ်ကသပ် သွက်အဝဵုက္ဍိုပ်သ္ကိုပ်ပၞာန်တံ ဂွံဆန်တန်ကြန်အာရောၚ် ညးလ္ၚတ်တံ ဟီုလဝ်ရ။
ပ္ဍဲကဵုဒၞာဲဒေသ ကဝ်မယှေန်ပၞာန် ထိၚ်ချုက်မာန်ဂှ်ရ ကၠောန်ပေါဲရုဲမာဲမာန်တုဲ ဒၞာဲဒေသကၠောန်ဗ္ဒျ်ပေါဲရုဲမာဲဟွံမာန်ဂှ် နွံမံၚ်တၟာဂလိုၚ်၊ ဗော်ပရေၚ်ဍုၚ်ကွာန် ဒပ်ပၞာန်ဟွံဒးစိုတ်ဂှ် ပလီုထောံ၊ ဟွံကဵုအခေါၚ်လုပ်ပြိုၚ်မာဲရ။
မေတ်သတာ သဳဟာသက် ကၠုၚ်ဆဵုဂဗလဝ်ကု က္ဍိုပ်သ္ကိုပ်ပၞာန် မေန်အံၚ်လှိုၚ် ပ္ဍဲကဵုနေပျဳ ဒဳဇြမ်ပါ ၇ ဂှ်လေဝ် သီုကဵုၜါဍုၚ် လလောၚ်တြးလဝ် ပ္ဍဲကဵုဒဳဇြမ်ပါ ၈ ဂှ်ရ။
ပေါဲရုဲမာဲဍုၚ်ဗမာဂှ် ပရေၚ်သၠးပွးဓရ်ယာဟၟဲ ဂွံပတေဟ်စလေဝ်ဟွံဂွံတုဲ နကဵုဍုၚ်သေံ ဗီုပြၚ်သွက်ဂွံသ္ပကဵုစၟတ်သမ္တီ ဒှ်ဟွံမာန်ပုဟ် မေတ်သတာ သဳဟာသက် ကၠာတေံလေဝ် ကေၚ်ဟီုလဝ်နွံရ။
ဆဂး ပေါဲရုဲမာဲဏံဂှ် ညံၚ်ဂွံဒှ်အာ အရာပြံၚ်စၠောံပရေၚ်ဍုၚ်ကွာန် ကေုာံ ညံၚ်ဂွံဒှ်ကၠုၚ် ကမၠောန်ပရေၚ်ၜိုဟ်လလမ်သၠဲလးတံ မွဲသ္ကုတ်မာန်ကီု သေံစၟဳစလဝ်ရောၚ် သဳဟာသက် ဟီုလဝ်ကဵု မေန်အံၚ်လှိုၚ်ဂှ် ပ္ဍဲကဵုလိက်လလောၚ်တြး ဌာနဝန်ဇၞော်ပရေၚ်ဍုၚ်သ္အာၚ်သေံ ချူလဝ်ရ။
ဆဂး ပ္ဍဲကဵုတရဴဝန်ဇၞော်ဍုၚ်သ္အာၚ်သေံ အာလဝ်နေပျဳတဝ် ဒဳဇြမ်ပါ ၇ တေံဂှ်တှ်ေ အတိုၚ်အကာဲအရာလၟုဟ်ဏံမ္ဂး အခန်ပၠတရဴပရေၚ်ဍုၚ်ကွာန်ဂှ် ဒပ်ပၞာန်ဟေၚ် ဆက်ထိၚ်အာရောၚ် ပ္ဍဲကဵုလိက်ပရိုၚ်ဗမာတံ ချူလဝ်ရ။
အခိၚ်ဒပ်ကောန်ဍုၚ်ရပ်လွဟ်တံဟၟဲမှ ပ္ဍဲဍုၚ်ဗမာ စိုပ်ကၠုၚ်အခိၚ်ဇြဟတ်ဒဳမဝ်ကရေသဳခိုဟ်တိုန်မှ ဒပ်ပၞာန်ကေတ်လဝ်ဒၞာဲ ပ္ဍဲကဵုစၠတ်ဓဝ်တံဂှ် ယှအ်ဖျေံအာအိၚ်ၚ်ရောၚ် က္ဍိုပ်သ္ကိုပ်ပၞာန်မေန်အံၚ်လှိုၚ် ဟီုလဝ်ဂှ် လိက်ပရိုၚ် “မြန်မာ့အလင်း” ချူလဝ်ရ။
Ref: AFP