ၜၚ်ကံက်၊ ဂျူလာၚ် ၂
ကြဴနူပရေၚ်ခတိုဟ်ဗုမ် က္တဵုဒှ်လဝ်ဂၠိုၚ်ကဵုဝါ အပ္ဍဲတွဵုရးကြပ်ကဵု ပယျဵုမလေယှာ လပါ်သၠုၚ်ကျာဍုၚ်သေံဂှ် သ္ကိုပ်ဝန်ဇၞော်သေံ စဳဇန်လဝ် သွက်ဂွံအာသဳကၠဳကဵု က္ဍိုပ်သ္ကိုပ်မလေယှာတံ သွက်ဂွံသောၚ်ကလးအာ ပရေၚ်ကိစ္စတံဏံရ။
သွက်ဂွံ သောၚ်ကလးအာ နကဵုတင်နၚ်ခိုၚ်ၚ်ကၠိုက်က် လတူပရေၚ်က္တဵုဒှ်ကၠုၚ်လဝ် အခိၚ်ဗွဲလံလ အပ္ဍဲဒေသတေံဂှ် သ္ကိုပ်ဝန်ဇၞော်သေံ အနုတေန် ချာန်ဗဳရာကူလ် စဳဇန်လဝ် သွက်ဂွံအာသဳကၠဳကဵု က္ဍိုပ်သ္ကိုပ်မလေယှာတံ ပ္ဍဲဂျူလာၚ် ၉- ၁၀ ဏံ ရောၚ်။
ပ္ဍဲခရိုၚ်ယာလာ၊ ပါတ်တာနဳ ကေုာံ နရာသဳဝါတ်တံ စပ်ကဵုပရေၚ်ခတိုဟ်ဗုမ် က္တဵုဒှ်လဝ်အကြာဏံဂှ် လိက်တေၚ်စပ်တံ ဂွံဒုၚ်တဲလဝ်ရောၚ် ဒုသ္ကိုပ်ဝန်ဇၞော် ဖဳဖာတ် ရာတ်ချာကိတ်ပရာခါန် ဟီုလဝ်ရ။
ပ္ဍဲပရေၚ်ပလံၚ်ကဵုလဝ် ပရိုၚ်အဆံၚ်ကိုပ်ကၠာအိုတ်မ္ဂး ဗုမ်ခတိုဟ်လဝ် ဆၜိုတ်ၜါခရိုၚ်သၟးနွံမံၚ် သ္ဂးလဝ်ကီုလေဝ် ကြဴနူဂှ် ပ္ဍဲဒေသတတိယမွဲဒၞာဲဂှ်လေဝ် ပရေၚ်ခတိုဟ်ဗုမ် နွံကၠုၚ်လဝ်ရောၚ် ညးဟီုရ။
ပရေၚ်ခတိုဟ်လဝ်တံဏံဂှ် နကဵုဂကောံကဵုဂကောံတံ ကၠောန်မံၚ်ဒှ်တုဲ နူကဵုကံၚ်သဳပရေၚ်ဂီုကၠီုကောန်ဂကူသေံ သ္ကိုပ်ဝန်ဇၞော် ကေတ်လဝ်တာလျိုၚ် ဥက္ကဌဂှ် ပရေၚ်အကာဲအရာတံဏံ သွက်ဂွံသောၚ်ကလးအာ စွံဂရုတုဲ ဖန်ဖက်အာရောၚ်။
ပရေၚ်ဟွံညိၚ်ဝပ် ပ္ဍဲဒေသပယျဵုလပါ်သၠုၚ်ကျာတံကီု ပရေၚ်ဒးဒုၚ်ခတိုဟ်ဗုမ် ပ္ဍဲဆေၚ်သွံကၠေၚ် PT တံဂှ် ဆက်စပ်နွံမံၚ်ရောၚ် ညးတာလျိုၚ်သေံတံ တော်ခယျလဝ်ရ။
ဟိုတ်နူအကာဲအရာ ဒးဒုၚ်ခတိုဟ်ဗုမ် ဆေၚ်သွံကၠေၚ် အပ္ဍဲဒေသတေံဂှ် တုပ်သၟဟ်မံၚ်ကဵု အကာဲအရာကိုပ်ကၠာတေံတုဲ ဒှ်တၠတဲ ဂကောံကလာ်ကၟဵုဍုၚ်တံရောၚ် ညးစၟဳစၟတ်ဂၠိုက်ဂၠာဲတံ ပတှ်ေကေတ်လဝ်ရ။
ဆဂး ကၠာဟွံဂွံဖျေံသ္ဂုတ်သွာတ် အိုတ်ကၞောတ်ဏီမ္ဂး နူကဵုညးတာလျိုၚ်တံ ထပ်ဂၠာဲမံၚ် သက်သဳနာနာပၠန်ရောၚ် ဂွံတီကေတ်ရ။
အကြာဂျူလာၚ် ၉- ၁၀ မ္ဂး သ္ကိုပ်ဝန်ဇၞော်သေံ အနုတေန် အာမလေယှာတုဲ သွက်ဂွံပံၚ်တောဲသောၚ်ကလးအာ ပရေၚ်ကိစ္စတံဏံဂှ် ဂစာန်အာရောၚ် ဒုသ္ကိုပ်ဝန်ဇၞော် ဖဳဖာတ် ရာတ်ချာကိတ်ပရာခါန် ဟီုလဝ်ရ။
Ref:Bangkokpost