ရဳယာဒ်၊ ဂျာန်နဝါရဳ ၂၉
သွက်ဂွံဗတိုက် ကေတ်အရေဝ်အဳရာန် နကဵုပရေၚ်ပၞာန်ဂှ် ကဵုအခေါၚ်စကာအာ ဗွိုၚ်ဗလးကျာဇကုတံ ဟွံသေၚ်ရောၚ် ကောန်သၟိၚ်သဝ်ဒဳ မိုဟာမက် ဗၚ် သဝ်လ်မာန် ဟီုလဝ်ကဵု သမ္မတအဳရာန် မာသံက် ပဳဇက်ခဳယာန် ရ။
အပ္ဍဲဒေသ ပရေၚ်ဂီုကၠီုကေုာံ ပွမညိၚ်ဝပ် ဇြဟတ်ဂွံခိုဟ်တိုန်မာန် နူကဵုပရေၚ်သဳကၠဳတံမွဲအဆံၚ် ညံၚ်ဂွံသောၚ်ကလးအာ ပရေၚ်လညာတ်ပါ်ခြာမံၚ် အရာသီဖအိုတ်တံဂှ် သဝ်ဒဳအာရေဗဳယာ ထံက်ဂလာန်ရောၚ် ကောန်သၟိၚ်သဝ်ဒဳ တက်လဝ်ကျာဖုၚ်ဟီုလဝ်ကဵု သမ္မတအဳရာန်ရ။
ပရေၚ်တာဒၞာပေါဲပၞာန် နူသၟဝ်ဗွိုၚ်ဥပဒေဂၠးကဝ်တံဂှ် တဳဟဳရာန်ဒုၚ်တၠုၚ်ရောၚ် သမ္မတ ပဳဇက်ခဳယာန် ဟီုလဝ်ကဵု ကောန်သၟိၚ် ဗၚ်သဝ်လ်မာန်ဂှ် လိက်ပရိုၚ်အဳရာန် ချူလဝ်ရ။
ပရူပရာ သမ္မတအဳရာန်ကဵု ကောန်သၟိၚ်တံ ကော်ဖုၚ်တက်လဝ်ကျာတံဂှ် နူကဵုဌာန်ပရိုၚ်ဍုၚ် သဝ်ဒဳအာရေဗဳယာပိုၚ် SPA ချူလဝ်ပ္ဍဲဂျာန်နဝါရဳ ၂၇ ရ။
ယဝ်ရဗတိုက်ကၠုၚ်အဳရာန်မ္ဂး ကၟိန်ဍုၚ်စောနာဲအာရပ် (UAE) လေဝ် ကဵုအခေါၚ်စကာအာ ဗွိုၚ်ဗလးကျာညးတံဟွံသေၚ်ရောၚ် လလောၚ်တြးလဝ်တုဲ ဍုၚ်သဝ်ဒဳအာရေဗဳယာလေဝ် ဟီုဂးကၠုၚ်ဗီုဏံရ။
ၜၚ်ဖ္ဍိုက်ၜၚ်ကျာအေမရိကာန်ကေုာံ ၜၚ်ထံက်ပၞာန်တံ စိုပ်မံၚ်ဗလးဍာ်ဗၟံက်လဒေါဝ်တုဲ ဗၞတ်သ္ၚောဲခြာစိုပ်မံၚ်ဗွိုၚ်ဗတိုက် အဳရာန်တံမာန်ရ။
ယဝ်ရ ဗတိုက်ကၠုၚ်ဍုၚ်ဇကုမ္ဂး ပ္ဍဲအလုံဒေသ ပွန်အမေရိကာန် ၜိုတ်နွံမံၚ်တံဂှ် ဗတိတ်ဇြဟတ် ကလေၚ်ဗတိုက်အာရောၚ် အဳရာန် ကြဴဇာလဝ်ရ။
ကၠာဟွံစိုပ်အခိၚ်ဏံ အဳရာန် ဂစိုတ်သမ္မတ အမေရိကာန် ဒဝ်နဝ်ထရရောၚ် ဘပဠလဝ်ရ။
ယဝ်ရ ထရဒှ်အာမွဲမွဲသာ်မ္ဂး ဍုၚ်အဳရာန် ကၠေံအာနူကဵုဂၠးကဝ်ရောၚ် ညးတေံ ကလေၚ်ကဵုလဝ် သတိရ။
ပ္ဍဲအဳရာန် ပရေၚ်သြန်ဖောဝ်ကေုာံ ဟိုတ်နူပြဿနာပရေၚ်ပိုန်ဒြပ်တံဂှ် ပေါဲထ္ၜးဆန္ဒဒစဵုဒစးအလဵုအသဳအလုံဍုၚ်မွဲ က္တဵုဒှ်မံၚ်တုဲ ဟိုတ်နူဒပ်ပရေၚ်ဂီုကၠီုတံ ရပ်စပ်ကၠောန်မံၚ်ပကီုပရာတ်ကြာန်န်တုဲ မၞိဟ်တံလၟိဟ်ကဵုလ္ၚီ ချိုတ်အာရ။
ဇြဟတ်ပၞာန်အမေရိကာန် ထပဵုသၠုၚ်လဝ်ပ္ဍဲဒေသဗၟံက်လဒေါဝ်တုဲဂှ် သွက်သ္ဂောံဂွံတၚ်တုပ်စိုတ်ကဵု အမေရိကာန် နူကဵုအဳရာန် ကေတ်ကၠုၚ်လဝ်အဆက်အလန်ကဵုအလန်နွံမံၚ် ထရ ဟီုလဝ်ရ။
Ref:Reuters