ၜၚ်ကံက်၊ ဂျာန်နဝါရဳ ၃၀
ပေါဲရုဲမာဲဍုၚ်ဗမာတုဲအာဂှ် စၟဳစလဝ် သွက်ဂွံဒှ်အာ ပရေၚ်စအပြံၚ်လှာဲဇရေၚ်ၜိုဟ်လလမ်ရောၚ် ဝန်ဇၞော်ဍုၚ်သ္အာၚ်သေံ ဟီုလဝ်ပ္ဍဲဂျာန်နဝါရဳ ၂၉ ရ။
ပေါဲရုဲမာဲအလီရောၚ် ရဲဂကောံအခေါၚ်အရာမၞိဟ်တံ ပျုတ်ဗဒေက်ဟီုမံၚ်ဂှ် ဗော်သ္ပစၞးဒပ်ပၞာန် ပျဳခိုၚ်ဖျိုဝ် ဂွံလဝ်ဇၞး လလောၚ်တြးလဝ်ရ။
ဒပ်ပၞာန်သီကေတ်အဝဵု ပ္ဍဲသၞာံ ၂၀၂၁ တုဲ အဝဵုဍေံတံကေမ်ဇျှာပ်လဝ် သွက်ဂွံဆက်တန်ကြန်အာမာန် ကၠောန်လဝ်ပေါဲရုဲမာဲရောၚ် ညးပါ်ပါဲတံ ဟီုဂးရ။
ပ္ဍဲကဵုမ္ၚးဝိုင်ပေါဲကောံဓရီု အာသဳယာန် ကၠောန်လဝ်ပ္ဍဲဍုၚ်ဖိလေတ်ပိုၚ်ဂှ် ပေါဲရုဲမာဲဍုၚ်ဗမာဂှ် စၟဳစလဝ် ဒှ်အကာဲအရာလဂါံဂတ ပရေၚ်ၜိုဟ်လလမ် တန်ကြန်ဍာ်ဇမၠိၚ် ဒှ်မာန်ရောၚ် ဝန်ဇၞော်ဍုၚ်သ္အာၚ်သေံ ဟီုရ။
ပေါဲရုဲမာဲက္ဍိုပ်သ္ကိုပ်ပၞာန်တံကၠောန်လဝ်ဏံ ဍိုက်ပေၚ်ဟွံသေၚ်ကီုလေဝ် သွက်ပရေၚ်အပြံၚ်အလှာဲဂတတေံ ဒှ်ကၠုၚ်အစမွဲမာန် စၟဳစလဝ်ရောၚ် ဝန်ဇၞော် သဳဟာဆက် ဖူအာန်ခက်ကွေ ဟီုလဝ်ကဵုအစာပရိုၚ်တံရ။
နူကဵုသေံ ဗလးလဝ်ညံၚ်လ္ရတ်ရံၚ်ပေါဲရုဲမာဲတုဲ ဆက်မၚ်ရံၚ်အာ ပရေၚ်သဳကၠဳ၊ အရာပညဳပညပ်လၟေၚ်ကမၠောန်ပရေၚ်ၜိုဟ်လလမ်ပၠန်ရေၚ် ညးဟီုထပေၚ်လဝ်ရ။
ဝန်ဇၞော်ဍုၚ်သ္အာၚ် ဂကောံအာသဳယာန် ၁၁ ဍုၚ်တံ တ္ၚဲကၠာကိုပ်ကၠာအိုတ်ဂှ် စပ်ကဵုပရေၚ်ပၞာန်အပ္ဍဲဍုၚ်ဗမာ သဳကၠဳလဝ်တုဲ ဝန်ဇၞော်ဍုၚ်သ္အာၚ်သေံ ဟီုလဝ်အတိုၚ်ဏံ မဒှ်ရ။
သွက်ဂွံသောၚ်ကလးအာ ပြဿနာပရေၚ်ဍုၚ်ဗမာ အာသဳယာန်ဖျေံစွံလဝ် ဘုံတင်တုပ်စိုတ် ၅ တၚ်ကီုလေဝ် ဂွံဆဵုညာတ်လဝ်သတ်ပၟဝ်ဇဝ်ပကဴတံ ညိညဓဝ်ရ။
ဂကောံအလဵုအသဳတၟိဍုၚ်ဗမာမံက်တိုန်ဏံ ကၠာဟွံစိုပ်အခိၚ်မ္ဂး အာသဳယာန်သ္ပစၟတ်သမ္တီလုပ်သၞောဝ်ဟွံသေၚ်ရောၚ် သ္ကိုပ်ဝန်ဇၞော်မလေဝ်ယှာ အာန်ဝါ အေဗရာဟေၚ် ဟီုလဝ်ရ။
ပ္ဍဲကဵုဂိတုမာတ်ချ်ဏံ ကော်စၠတ်ဓဝ်တုဲ ပြံၚ်သၠာဲပအပ်ကဵုအဝဵု ဇရေၚ်အလဵုအသဳတၟိရောၚ် က္ဍိုပ်သ္ကိုပ်ပၞာန် မေန်အံၚ်လှိုၚ် ဟီုလဝ်ရ။
Ref:AFP