ဗေဂျေၚ်၊ ဖေဖဝ်ဝါရဳ ၃
အပ္ဍဲကဵုဂကောံမာဖဳယာဍုၚ်ဗမာ ဒယှ်တှ်မံၚ်တံဂှ် အလဵုအသဳကြုက် ထပ်ဂစိုတ်ထောံ ညးက္ဍိုပ်ဂိုဏ်ကျာဖျဗမာ ကောန်သ္ၚိကၟိန် “ပေဝ်” ပန်တၠ နူကဵုမဳဒဳယာဍုၚ်ကြုက် ချူလဝ်ရ။
နူကဵုရုၚ်သၞောဝ်ဓဝ်ကြုက် တွဵုရးဂွန်ဒံၚ် ဖျေံအမိၚ်ဂစိုတ် ကောန်သ္ၚိကၟိန် “ပေဝ်” ၂၁ တၠတံ နကဵု ပွမလီဠာန်၊ ဂစိုတ်မၞိဟ်၊ ကဵုဒးလဝ်ဘဲဝပ်၊ အမှုရာဇဝတ်တၞဟ်ဟ်တံဂှ် မၞိဟ်ပန်တၠဏံ ပါလုပ်မံၚ်ရ။
ဒးဒုၚ်ရပ်တုဲ ဟိုတ်နူအကာဲအရာပရေၚ်ထတ်ယုက်ဟွံခိုဟ်ဂှ် ညးက္ဍိုပ် “ပေဝ်သံက်ချိၚ်” ချိုတ်အာလဝ်ကီု သီုကဵုကောန်သ္ၚိကၟိန်ညးတံ ၅ တၠဂှ် ပ္ဍဲဂဵတုနဝ်ဝမ်ပါ နူကဵုရုၚ်သၞောဝ်ဓဝ် ဖျေံလဝ်အမိၚ်ဂစိုတ်ရ။
အလဵုအသဳကြုက် ဖျေံအမိၚ်တုဲ ဂစိုတ်လဝ်ကောန်သ္ၚိကၟိန် “မျဳ” ၁၁ တၠ ကောန်လဝ်အရေဝ် ဂကောံဂီုလီဠာန်အန်လိုၚ် နွံမံၚ်ရးအဂၞဴတံရ။
ပ္ဍဲကဵုဍုၚ်လံက်ကိုၚ် ဒေသပယျဵုဍုၚ်ဗမာဂှ် ကောန်သ္ၚိကၟိန်အိန်ထံၚ်တံဏံ အုပ်ဓလီုက္ဍိုက်ပ် ကၠောန်လဝ်ပွ ကမၠောန်ကာသဳနို၊ ကမၠောန်ဗြဴစရာဲဍုၚ်၊ လီဠာန်သြန်အန်လိုၚ် သၞာံဗွဲမလံလရ။
ကမၠောန်ကာသဳနို၊ လီဠာန်သြန်အန်လိုၚ် ဒုၚ်တဲကၠောန်လဝ်ကၠအ် ၄၁ ဒၞာဲ သီုကဵုဂကောံရပ်လွဟ်တံ ပံက်လဝ်ဂှ် ကောန်ဍုၚ်ကြုက်ဒးချိုတ်အာလဝ် ၆ တၠ၊ မွဲတၠဂှ် ဘဲဒဏ်နကဵုဗီုပြၚ်ဂစိုတ်လဝ်ဇကုဇကုနွံမံၚ် ရုၚ်သၞောဝ်ဓရ်ကြုက် ဟီုရ။
ပ္ဍဲဍုၚ်ဗမာကဵု ဒေသအဂၞဲဒၞာဲတၞဟ်ဟ်တံ သွက်ကၠောန်ကမၠောန်လီဠာန်သြန်အန်လိုၚ်မာန် တံၚ်ရပ်မၞိဟ်ဓရတ်အာလဝ်သြန် မၞိဟ်လၟိဟ်ကဵုကၠံပြၚ်တုဲ ကဵုကၠောန်လဝ်ကမၠောန် စကာနနဲအဓ္ဓမရ။
ပ္ဍဲကဵုပရေၚ်ဏံ ကောန်ဍုၚ်ကြုက်တံ ပါမံၚ်မၞိဟ်ကဵုလ္ၚီကီု၊ လီဠာန်လဝ်ကောန်ဍုၚ်ကြုက်တံတုဲ မွဲသၞာံမ္ဂး ဂွံလဝ်သြန်ဒဝ်ဠာဗဳလဳယာန်ဗွဲမဂၠိုၚ် မဒှ်ရ။
ပ္ဍဲတ္ၚဲအကြာတံဏံပၠန် ပ္ဍဲဍုၚ်ခမေန်လေဝ် လုပ်ရပ်ရုၚ်ကမၠောန်လီအန်လိုၚ်ဂှ် ရပ်ဂွံလဝ်ကောန်ဍုၚ်ကြုက် ၜိုတ် ၁၈၀၀ ကီုရ။
အပ္ဍဲကဵုဒေသပယျဵုသေံ ဍုၚ်ဗမာ ကမၠောန်လီအန်လိုၚ်တံဂှ် ကံၚ်သဳပၞာန်ကဵု ဂကောံမဟာမိတ်ဍေံတံ စဵုဒၞာကဵုမံၚ်တုဲ လီမံၚ်သြန်နူအလုံဂၠးကဝ်ရ။
ဒပ်ပၞာန်ဗမာ ၜိုန်ရရပ်ထ္ၜးမံၚ် ကမၠောန်အန်လိုၚ်လီသြန်ကီုလေဝ် ပြံၚ်ဒၞာဲတၞဟ်ဟ်တုဲ ဆက်ကၠောန်မံၚ်ဖိုအ်ဏီရောၚ်။
Ref:BBC