ဝါယှေန်တာန်၊ အေဗရာ ၁
ဍုၚ်သဝ်ဒဳအာရေဝ်ဗဳယာ ကေုာံ ယူအေအဳ ပၠတရဴမံၚ် ဂကောံမဟာမိတ်အမေရိကာန် ပ္ၚံက်ၜဳတံ ဗ္တိုက်ဖ္အောဝ်လဝ် သမ္မတ ဒဝ်နယ်ထရ သွက်ဂွံဆက်ဍိုက်ဗတိုက်အာ အဳရာန်ဂှ် ညးတာလျိုၚ် အမေရိကာန်၊ ပ္ၚံက်ၜဳ ကေုာံ အေဿရေတံ ဟီုလဝ်တုဲ ဂွံတီကေတ်ရ။
ဟိုတ်နူပရေၚ်ဗတိုက်ဗလးကျာ အမေရိကာန် လံကၠုၚ်ဂိတုကီုလေဝ် ဇြဟတ်အဳရာန် ဟွံယအ်စှ်ေအာ မွဲအဆံၚ် ဏီပုဟ် ဂကောံမဟာမိတ်ပ္ၚံက်ၜဳ အမေရိကာန်တံ ဟီုရ။
အမေရိကာန် ကေုာံ အေဿရေတံ ဗတိုက်အဳရာန်ဏောၚ် ဟိုတ်နူ ဟွံကဵုလဝ်သမ္တီညးသ္ကံကၠာတုဲ ပ္ဍဲအစပေါဲပၞာန်ဂှ် ဒှ်ကၠုၚ်စောဒကညးသ္ကံတုဲ ယဝ်ရပေါဲပၞာန်ကတဵုဒှ်မ္ဂး ဘဲဒဏ်ပရေအ်ပရေအ် တောဲဗက်ကၠုၚ် လပါ်လက်ကရဴ နာနာသာ်တံ ပ္ဍဲအလုံမွဲဒေသဂှ် သ္ကာတ်ထတ်တိုန်မာန်ရောၚ် အရာမကဵုကၠုၚ်လဝ်သတိတံဂှ် အမေရိကာန် သ္ပလဝ် မတ်ဇျှဟ်ရောၚ် မဟာမိတ်ပ္ၚံက်ၜဳတံ ဟီုဂးကၠုၚ်အိုတ်ရ။
ပ္ဍဲအခိၚ်လၟုဟ်ဝွံ သၞောတ်ပရေၚ်အုပ်ဓုပ် က္ဍိုပ်သ္ကိုပ်ဘာသာအဳရာန် ဂွံအိုတ်ကၠက်အာဂှ် သွက်ဂွံကၠောန်အာ မွဲအလန်ဓဝ်ကဵုလၟိုန်ဂှ် ဂွံဆဵုဂဗမံၚ်ကဵု အခေါၚ်အရာ လုပ်ဝၚ်ရောၚ် မဟာမိတ်ပ္ၚံက်ၜဳလ္ၚဵုတံ ဟီုလဝ်ကု သ္ၚိဗတာၚ်ရ။
စဵုကဵုက္ဍိုပ်သ္ကိုပ်အဳရာန်တံ ဟွံပြံၚ်သၠာဲကၠးကၠးမးမးဏီ၊ စဵုကဵုဒဂေတ်ပဋိပတ်အဳရာန်တံ ဟွံပြံၚ်သၠာဲဏီမ္ဂး လဝေၚ်ပၞာန်အမေရိကာန်တံ ညံၚ်ဟွံဂွံဒေါအ်အာ ညးတာလျိုၚ် သဝ်ဒဳအာရေဝ်ဗဳယာ၊ ယူအေအဳ၊ ကူဝိက်၊ ဘာရုၚ်တံ ဗ္တိုက်ဖ္အောဝ်ဟီုလဝ်ကုထရ ဗွဲတၞဟ်ခြာရောၚ် ဂွံတီကေတ်ရ။
ယဝ်ရက္ဍိုပ်သ္ကိုပ်အဳရာန်တံ ဟွံဒုၚ်တဲတၚ်တုပ်စိုပ်မ္ဂး ဆက်တုဲသၠုၚ်ပတိုန်အာ အသိၚ်ပေါဲပၞာန်ရောၚ် အခိၚ်ထရ ဘပဠဂှ်ဟေၚ် ပရေၚ်ဗ္တိုက်ဖ္အောဝ်ဟီုဂး မဟာမိတ်ပ္ၚံက်ၜဳတံ မံက်တိတ်ကၠုၚ်ရောၚ်။
ဆေၚ်စပ်ကဵု ပရေၚ်ပေါဲပၞာန်အဳရာန်ဂှ် မၞိဟ် ၃၀၀၀ ပြၚ် ချိုတ်အာ ပ္ဍဲဒေသလဒေါဝ်ဗၟံက် ကေုာံ ပရေၚ်ပိုန်ဒြပ် ဂၠးကဝ်တံ ဂရံက်ဂရိုက်အာလဝ်အိုတ်တုဲ သွက်ထရဂှ် ဇြဟတ်ပရေၚ်ထံက်ဂလာန်အပ္ဍဲဍုၚ် အောန်မံၚ်ရ။
နူကဵု သဝ်ဒဳအာရေဝ်ဗဳယာ၊ ယူအေအဳ၊ ကူဝိက်၊ ဘာရုၚ်တံ နကဵုဇြဟတ်ခိုၚ်ၚ်ကၠိုက်က် ကလေၚ်ဗတိုက်မံၚ်တုဲ လ္တူပရေၚ်လဝေၚ်ပၞာန်အမေရိကာန်တံဂှ် မဟာမိတ်ဒေသလဒေါဝ်ဗၟံက်တံ ထံက်ဂလာန်မံၚ်ခိုၚ်ၚ်ဗိုန်န်ရောၚ် ထရ ဟီုကဵုအစာပရိုၚ်တံရ။
ဍုၚ်ပ္ၚံက်ၜဳတံဝွံ ၜိုန်ရဒုၚ်တဲစွံလဝ် ဗဒိုပ်သ္ဇိုၚ်ပၞာန်အမေရိကာန်တံကီုလေဝ် ပ္ဍဲအရာဗတိုက်အဳရာန်ဂှ် ပံၚ်တောဲ ပါလုပ်လဝ် ဟွံမွဲပုဟ်။
နူကဵုဗဒိုပ်သ္ဇိုၚ်ပၞာန် ပ္ၚံက်ၜဳတံဂှ်ဟေၚ် အမေရိကာန် ဗတိုက်မံၚ်အဳရာန်ရ။
အဓိကမ္ဂး လ္တူအဳရာန်ဂှ် ညံၚ်ဂွံထပ်ဍိုက်ကဵုဇြဟတ်ပၞာန် သဝ်ဒဳအာရေဝ်ဗဳယာကေုာံ ယူအေအဳတံ ဗ္တိုက်ဖ္အောဝ်လဝ် အမေရိကာန်ရောၚ် ညးတာလျိုၚ်ကလုတ် ဒေသလဒေါဝ်ဗၟံက်မွဲတၠ ဟီုရ။
Ref:AP