တဳဟဳရာန်၊ ဂျူလာၚ် ၄
သွက်ပေါဲဖျေံကမ္မဌာန် က္ဍိုပ်သ္ကိုပ်အဆံၚ်သၠုၚ်အဳရာန် အယာတဝ်လာ အလဳ ခါမေနဳ ဂှ် ပလံၚ်ဗ္စိုပ်လဝ် ဇွညး ပ္ဍဲစမြိုၚ်ဒၞာဲပရေၚ်ဘာသာ ဍုၚ်တဳဟဳရာန် အခိၚ်နူဂယး ဂျူလာၚ် ၃ ဂှ်တုဲ ပ္ဍဲအခန်ကၞာဖျေံကမ္မဌာန်ဏံ မၞိဟ်မၞုံကဵုပြကောဋိကိုတ်ပြၚ်တံ တိုန်စိုပ်မာန် စၟဳစလဝ်ရောၚ် ဌာနပရိုၚ်ဂါဒဳယာန် ချူထမံက်ထ္ၜးလဝ်ရ။
ပ္ဍဲကၞောတ်ဂိတုဖေဖဝ်ဝါရဳတေံ အမေရိကာန် ကဵု အေဿရေတံ စဗတိုက်အဳရာန်တုဲ ခြာဟွံလံ အလဳခါမေနဳ ချိုတ်အာလဝ်ရ။
ကြဴနူညးချိုတ်အာ ၄ ဂိတုပြၚ်တုဲမှ ဖန်ဇန်သွက်ဖျေံအာကမ္မဌာန်တုဲ တ္ၚဲပွမအောန်စိုတ်လုပ်သၞောဝ် စကၠောန်အာမံၚ်ယျ။
ပလံၚ်ဗ္စိုပ်လဝ် ရုပ်ကလာပ်ဇွညး ပ္ဍဲစမြိုၚ်ပရေၚ်သာသနာ Grand Mosalla ဍုၚ်တဳဟဳရာန်တုဲ၊ စိုပ်ဂျူလာၚ် ၉ ဏံမ္ဂး သွက်ဂွံတိုပ် ပ္ဍဲဍုၚ်မက်ယှ်ဟက် ဌာန်ဇာတိဍုၚ်ညးရောၚ်။
ဒှ်ပေါဲဖျေံကမ္မဌာန် ဗွိုၚ်မွဲဗွဝ်ကၠမ်သၞာံဏံ ဇၞော်မြဟ်ပြာကတ်အိုတ်တုဲ မၞိဟ်အကြာပွဳပွူ ၁၂ ပြကောဋိကိုတ် စဵုကဵု ၂၀ ပြကောဋိကိုတ် တိုန်စိုပ်မာန် စၟဳစလဝ်ရောၚ် ညးတာလျိုၚ်အဳရာန်တံ ဟီုလဝ်ရ ။
သွက်ဂွံဒေါအ်အာပရေၚ်ပေါဲဗတိုက် အကြာအဳရာန် ကဵု အမေရိကာန်တံ ပ္ဍဲဂိတုဂျောန် ထ္ပက်လဝ်စၟတ်တဲ တၚ်တုပ်စိုတ်အဆံၚ်ကိုပ်ကၠာတုဲ ၜိုန်ရဒေါအ်လဝ်ပန်ပှော်လဝ်ကီုလေဝ် ဟွံချိုတ်ပၠိုတ်ဏီပုဟ်။
အခန်ကၞာဖျေံကမ္မဌာန် ကၠောန်အာပွိုၚ် ၆ တ္ၚဲဂှ် စနူဂျူလာၚ် ၄ တုဲ သွက်ညးကၠုၚ်ရှ်ေသှ်ေသ္ပဂါရဝတံဂှ် စနူဂျူလာၚ် ၅ အခိၚ်လဒေါဝ်တ္ၚဲမ္ဂး စတိုန်စိုပ်မာန်ရောၚ်။
ခိုၚ်ကဠာဇွညး စွံပ္တိုန်လဝ်လတူစင်သၠုၚ်မွဲတုဲ ကုကၟုဲညးကၠုၚ်တံမ္ဂး ကဵုအခေါၚ်လုပ်ပွိုၚ် ၁၅ မိနေတ် စဵုကဵု ၂၀ မိနေတ်ရ ညးတာလျိုၚ်အဳရာန်တံ ဟီုရ။
ဇွခါမေနဳဂှ် ပ္ဍဲစမြိုၚ်ပရေၚ်သာသနာညးတံ မွဲကရောံကုဇွသ္ၚိကၟိန်အိန်ထံၚ်ညးတံမွဲစွံဂှ် စွံပ္တန်အာ ပွိုၚ် ၃ တ္ၚဲရောၚ်။
Ref:Guardian/BBC