ဗရာတ်သေဝ်လ်၊ ဂျူလာၚ် ၅
အတိုၚ်တၚ်တုပ်စိုတ် ၝောံပိုဒ် ၅ ဂကောံမဟာမိတ်နေတိုဝ်မ္ဂး စိုပ်သတ္တဟဂတးဏံ သွက်ဂွံကၠောန်ဗဒှ်အာ ပေါဲသဳကၠဳက္ဍိုပ်သ္ကိုပ် အဆံၚ်သၠုၚ် ပ္ဍဲဍုၚ်အန်ကာရာ သမ္မတအမေရိကာန် ဒဝ်နယ်ထရ ကဵု က္ဍိုပ်သ္ကိုပ်နေတိုဝ်တံ သ္ပအာဒတန် ကတိကဝတ် ပရေၚ်ပံၚ်ကောံစဵုဒၞာ ခြိုၚ်ဇာနှိက်ပသဲရောၚ် ဂွံတီရ။
ပ္ဍဲကဵုလိက်လလောၚ် အမာတ်ကလုတ် ဂကောံနေတိုဝ်တံ ပတိတ် သ္ပလဝ်ဒတန် ပ္ဍဲဂျူလာၚ် ၃ ဂှ် ချူထမံက်ထ္ၜးလဝ် အတိုၚ်ဏံရ။
ဍုၚ်ကောန်ဂကောံနေတိုဝ်တံ ကတိသွက်ဂွံကဵုအထံက်ပၚ်ပၞာန် ကုယူကရုၚ် သွက်သၞာံ ၂၀၂၆ သြန်ဒဝ်လာ ၈၀ ဗဳလဳယာန် (သြန်ယူရို ၇၀ ဗဳလဳယာန်) ဂှ် သွက်ဂွံသ္ပအာဒတန် နွံမံၚ်ရ။
ပ္ဍဲသၞာံ ၂၀၂၇ လေဝ် နကဵုပမာဏလၟိန်သြန် ကြပ်တုပ်ပ်ဏံဂှ် ဍုၚ်ကောန်ဂကောံနေတိုဝ်တံ ထံက်ပၚ်ရီုဗၚ်အာ ယူကရုၚ်ပၠန်ရောၚ် ဂွံတီကေတ် အတိုၚ်လိက်လလောၚ်တြး ဂှ်ရ။
ပ္ဍဲပေါဲသဳကၠဳက္ဍိုပ်သ္ကိုပ်အဆံၚ်သၠုၚ်ဏံ သွက်ဂွံသ္ပအာဒတန် လိက်လလောၚ်တြး လက်ကရဴအိုတ် နွံမံၚ်ဏီရ။
သ္ဇိုၚ်မူပရေၚ်ပံၚ်ကောံစဵုဒၞာ ဂကောံနေတိုဝ်ဂှ် ထရ ကဵု က္ဍိုပ်သ္ကိုပ်သီုဖအိုတ်တံ ဆက်ကဵုမံၚ်ကတိဖိုဟ်ရောၚ် Euronews ချူထမံက်ထ္ၜးလဝ်ရ။
ပ္ဍဲလိက်လလောၚ်တြးဏံမ္ဂး ဍုၚ်အဳရာန် ညိလေဝ်ညံၚ်ဟွံဂွံပိုၚ်ပြဳ လွဟ်နျူကလဳယျာလးလးဂှ် ဍုၚ်ကောန်ဂကောံတံ တုပ်လဝ်စိုတ်သီုဖအိုတ်ရ။
ပ္ဍဲပေါဲသဳကၠဳက္ဍိုပ်သ္ကိုပ်အဆံၚ်သၠုၚ် အန်ကာရာ ဂျူလာၚ် ၈ ဏံဂှ် က္ဍိုပ်သ္ကိုပ်တံ ယဝ်ရတုပ်စိုတ်တုဲမ္ဂး ပတိတ်အာလိက်လလောၚ်တြးရောၚ် ညးအခေါင်ဟီုဂး ဂကောံနေတိုဝ် ဟီုရ၊ ။
အတိုၚ်သ္ဇိုၚ်မူဂကောံနေတိုဝ်မ္ဂး ယဝ်ရကောန်ဂကောံမွဲမွဲဍုၚ် ဒးဒုၚ်ဗတိုက်မ္ဂး သ္ပလစွံစိုတ် ဒဒှ်ရဒးဒုၚ်ဗတိုက် အလုံမွဲဂကောံရောၚ် မဒှ်ရ။
ဍုၚ်ကောန်ဂကောံနေတိုဝ်တံ ယဝ်ရဟွံကဵုလဝ် လၟိဟ်သြန်အတိုၚ်ထေက်ကဵုဒးကဵု သွက်ပရေၚ်ဂီုကၠီုကဵု ပရေၚ်စဵုဒၞာမ္ဂး အခိၚ်ဍုၚ်မွဲမွဲဒးဒုၚ်ဗတိုက်ဂှ်တှ်ေ အမေရိကာန် ရီုဗၚ်ကဵုဟာ ဟွံကဵုဟာဂှ် ထရဟီုဂးလဝ် ညံၚ်ဂွံဒှ်အာသၠေဟ်ပၟာနွံရောၚ်။
ပ္ဍဲကဵု အမေရိကာန် ဗတိုက်အဳရာန်ဂှ် မဟာမိတ်နေတိုဝ်တံ ထောံလဝ် အမေရိကာန်ရောၚ် ညး စောဲစပ်လဝ်ကီုရ။
နူကဵုအေမေရိကာန် ဆက်ဆောံမံၚ် ဂကောံနေတိုဝ် မွဲလပါ်ဓဝ်မ္ဂး ဒှ်အရာပရေၚ်ဟၟဲကဵု အဓိပ္ပါယ်ရောၚ် ထရ ဟီုလဝ်ရ။
Ref:Reuters/Euronews