မာန္တလေဝ်၊ ဂျူလာၚ် ၈
အပ္ဍဲဗွဝ်ဖျာမတ်တၟအ် မာန္တလေဝ် ရးဒေသအဒေါဝ်ဍုၚ်ဗၟာဂှ် ၚုဟ်မးမတ်တၟအ်တံ ယအ်စှ်ေမံၚ်တုဲ ဒှ်ကၠုၚ်ဗီုပြၚ်တၠုၚ်လအာ ဆေၚ်စပ်မံၚ်ကဵု ပရေၚ်ပိုန်ဒြပ်ဍုၚ်ကြုက် အိင်ဇိင်အာမံၚ် ကေုာံ ပရေၚ်ဗတိုက်သရိုဟ်ကမၠောန်ကျာဖျတံရောၚ် သၟာဗၞိက်တံ ဟီုရ။
ကြဴနူပရေၚ်ဗတိုက်သရိုဟ်ကမၠောန်ကျာဖျတံ မံက်ကၠုၚ်တုဲ သၞောတ်ဗ္ၜတ် ပရေၚ်ဗုတ်သ္အးသြန် ဂကောံဒုဟ်စရိုဟ်ဂၠးကဝ် ဆေၚ်စပ်မံၚ်ကဵုကြုက်တံ ယအ်စှ်ေအာတုဲ မွဲဒမြိပ်ဓဝ်ဂှ်ဟေၚ် ဇြဟတ်ရာန်မတ်တၟအ် ညးတံလေဝ် ယအ်စှ်ေအာကီုရ။
ဟိုတ်နူ ပရေၚ်ဇြဟတ်ရာန် နူဍုၚ်သအာၚ်ခိုဟ်တုဲ အပ္ဍဲဗွဝ်ဖျာ အာမံၚ်ပြေပြေပြံၚ်ၚ် ဍာ်ဇမၠိၚ်တေံဂှ် လၟုဟ်မ္ဂး လၟိဟ်ပရေၚ်သွံရာန်ကီု သီုၚုဟ်မးတံ ယအ်စှ်ေမံၚ်တုဲ သၟာဗၞိက်မတ်တၟအ်တံ ဒးဒုၚ်ဇီုကပိုက်မံၚ်ရ။
တွဵုရးကချေၚ် လပါ်သၟဝ်ကျာဍုၚ်ဗၟာဂှ် ဒှ်ဒေသမိုၚ်မတ်တၟအ် နွံကဵုၚုဟ်မးသၠုၚ်အိုတ် ကေုာံ ဂွံပရဲဂၠိုၚ်အိုတ် အပ္ဍဲဂၠးတိတုဲ၊ မာန္တလေဝ်ဂှ်မ္ဂး သွက်ပရေၚ်သွံရာန်၊ ပရေၚ်ပလေဝ်စ သွက်ဂွံပတိုန်ဗွဝ်ဖျာတံဂှ် ဒှ်ဒၞာဲဝါဲ အဓိကမွဲ မဒှ်ရ။
မတ်တၟအ်ဂှ် ဟွံတုပ်ကဵု ဗီုပြၚ်ၚုဟ်ထဝ် ခုတ်စၟတ်ပိုၚ်ခြာကဵုမံၚ်ဇၟာပ်တ္ၚဲတံတုဲ ၚုဟ်မးစၟတ်ပိုၚ်ခြာသၞောတ်ဗ္ၜတ်ဂၠးကဝ်ဟၟဲ ဒှ်မံၚ်ရ။
အဇာၚုဟ်မးသၞောတ်ဗ္ၜတ်ဂှ် ၚုဟ်မးမတ်တၟအ်ဝွံ တန်တဴမံၚ်လတူ ပရေၚ်ကဵုသ္ဂုတ်သွာတ်ၚုဟ်မးညးမွဲမွဲ ဒုၚ်သ္ဇိုၚ်ကဵုအသာ်အရံၚ် တၟးကၠးသ္အး မတ်တၟအ်မွဲမွဲမတံ မဒှ်ရ။
ဟိုတ်ဂှ်တုဲ ပရေၚ်သွံရာန်မတ်တၟအ်ဂှ် တန်တဴလတူပရေၚ်ပ္ညဳပ္ညပ်ကေတ်ၚုဟ်မး အကြာသွံညးရာန် ကေုာံ ပရေၚ်တော်ဍာ်ဒကေဝ်မတ်တၟအ်တုဲ စၟတ်ပိုၚ်ခြာမံၚ် ၚုဟ်မးတံရ။
အပ္ဍဲအခိၚ်လဒေါဝ်ဂိတုမေ အာလ္ၚတ်လဝ်ပ္ဍဲဗွဝ်ဖျာဂှ်မ္ဂး မတ်တၟအ်အရိုၚ်တံဂှ် ညးစအကြာတံ စၟဳစၟတ်မံၚ်ဍာ်ဒကေဝ်ဂှ် ဆဵုကေတ်မာန်ရ ဌာန်ပရိုၚ် Bangkok Post ချူထမံက်ထ္ၜးလဝ်ရ။
ၚုဟ်မးမတ်တၟအ် အဆံၚ်အလဒေါဝ်တံဂှ် ပ္ဍဲအကြာသၞာံ ၂၀၂၁-၂၀၂၃ တေံ သၠုၚ်တိုန်လဝ်တုဲ ကြဴစနူသၞာံ ၂၀၂၄ တုဲ ဆက်ယအ်စှ်ေမံၚ် အဆက်ဟွံပိုတ်ရောၚ် သၟာဗၞိက်မတ်တၟအ်တံ ဟီုရ။
သၞောတ်ပရေၚ်သွံရာန် ဗွဝ်ဖျာမတ်တၟအ်ဍုၚ်ဗၟာဝွံ ဟိုတ်နူတန်တဴမံၚ် လတူကောန်ညးဍုၚ်ကြုက် ကေုာံ ဂကောံဒုဟ်စရိုဟ် မိက်ဂွံဗုတ်သ္အးသြန်တံတုဲ ပ္ဍဲအခိၚ်အကာဲအရာဟွံကိတ်ညဳဂှ်မ္ဂး ပရေၚ်ဗွဝ်ဖျာ ဒှ်ကၠုၚ်အကာဲအရာဗီုဏံရောၚ် သၟာစအကြာ ဗွဝ်ဖျာမာန္တလေဝ်တံ ဟီုရ။
Ref:Bangkokpost