ဟာဗာဏာ၊ ဂျူလာၚ် ၈
ဟိုတ်နူ ပရေၚ်ကၟာတ်ဆိုအ်ကၠေၚ်ဍေၚ်အမေရိကာန် လံကၠုၚ်ပွိုၚ် ၆ ဂိတုတုဲ ညးဍုၚ်ကွာန်ကျူဘာ ပြကောဋိကိုတ်ပြၚ်တံ အခိၚ်ဟွံဂွံ ဓာတ်လလဳက္တဵုဒှ်မံၚ်ဏံ ကၠောန်ပေါဲထ္ၜးဆန္ဒ ပ္ဍဲကဵုဍုၚ်ဟာဗာဏာ သဝ်တ္ၚဲ ဂျူလာၚ် ၇ ဂှ် ညးဒေသတံ တက်ၜုၚ်ထၟာဲဒါန်တံ ဍဵုဟန်ကွဳစက်တံတုဲ ကရေဲကညာၚ်အာတ်မံၚ် ညံၚ်ဂွံကလေၚ်ကဵုပၟတ်ရ။
အပ္ဍဲသၞာံဏံ ဂျူလာၚ် ၆ ဂှ် ပ္ဍဲဍုၚ်ကျူဘာ ဓာတ်လလဳအလုံမွဲဍုၚ် ပိုတ်အာလဝ် အလန်တတိယရ။
ဆဂး သွက်ဒေသဗွဲမဂၠိုၚ်တံမ္ဂး အခိၚ်သဝ်တ္ၚဲ ဂျူလာၚ် ၇ ဂှ် ကလေၚ်ဆက်စၠောံလဝ်ကဵု လာၚ်ဓာတ်လလဳဍုၚ်တုဲရောၚ် ညးတာလျိုၚ်တံ ဟီုရ။
ဆဂး အပ္ဍဲဍုၚ်တ္ကအ်ကျူဘာဏံ ဟိုတ်နူကၠေၚ်ဍေၚ်ဟွံရုံဂပ်တုဲ ပ္ဍဲဒေသဗွဲမဂၠိုၚ်တံဂှ် ဆက်ဂၠုမံၚ်ဖိုဟ်ရ။
စနူပလိုတ်ကျူဘာအိုတ် ပဳဏာဒေဝ်ရဳယော စဵုကဵုဗမံက်အိုတ် ဟိုလ်ဂူအေၚ်တံဂှ် ဇုက်လာၚ်ဓာတ်လလဳတံ ကလေၚ်ဆက်စၠောံလဝ်တုဲဒှ်မံၚ်ရ ကာန်ပဏဳကဵုဓာတ်လလဳနိဂီုဍုၚ် UNE ဟီုလဝ်ရ။
ဍုၚ်ဇၞော်ဒုတိယကျူပါ သာန်တဳယာဂို ဒဳ ကျူဘာဂှ်မ္ဂး ဟွံကလေၚ်ဆက်ကဵုလာၚ် ဇုက်ဓာတ်လလဳဏီတုဲ ဆက်စွံလဝ်အတိုၚ်ဏံ ရ။
သွက်ပရေၚ်ထံက်ပၚ် ဓါတ်ဇြဟတ်ကၠေၚ်ဍေၚ်ကျူဘာဂှ် နူအမေရိကာန် ကုတ်ထပိုတ်လဝ် နူကဵုဂိတုဂျာန်နဝါရဳတေံတုဲ ဟိုတ်နူထပ်ကၠောန်လဝ်ပရေၚ်ကၟာတ်ဆိုအ်တၟိတံတုဲ ကမၠောန်ပရေၚ်ပိုန်ဒြပ်ဍုၚ်သအာၚ်ဗွဲမဂၠိုၚ်တံ နုက်စဴကလေၚ်တိတ်အာလဝ် နူကျူဘာအိုတ်ရ။
ညံၚ်အလဵုအသဳကျူဘာ ဂွံစိုပ်ကၠုၚ် လတူခုၚ်ပ္ညဳပ္ညပ်ဂှ် နူအမေရိကာန် ကဵုမံၚ်ဇြဟတ်ဟရိုဟ်တုဲ ပရေၚ်ကဏ္ဍကၟုဲအာတရဴဂၠးကဝ် ကျူဘာဂှ်လေဝ် ကြပ်ဒေါမ်လီုစှ်ေအာဖအိုတ် ဒှ်မံၚ်ရောၚ်။
ညံၚ်အလဵုအသဳကောန်မျူနေတ်ကျူဘာ ဂွံအိုတ်ကၠေံကၠက်အာဂှ် ဂစာန်မံၚ်တုဲ သွက်ဂွံကၠောန်ဗဒှ်အာ ပရေၚ်ပေါဲရုဲမာဲဒဳမဝ်ကရေဇြဳ ကေုာံ သွက်ဂွံဗလးကဵု ကောန်ထံၚ်ပရေၚ်ဍုၚ်ကွာန်တံဂှ်လေဝ် အာတ်မိက်လဝ်ရ။
ပရေၚ်ကၟာတ်ဆိုအ် သမ္မတအမေရိကာန် ဒဝ်နေဝ် ထရတံဂှ် ဒှ်အရာပလီုပလာ် ဥပဒေဂၠးကဝ်ရောၚ် နူကျူဘာကဵု ကုလသမဂ္ဂတံ ဟီုလဝ်တုဲ ဒှ်အရာပရေၚ်ပလီုပလာ်အခေါၚ်အရာမၞိဟ် လတူကောန်ဍုၚ်ကျူဘာတံရောၚ် သ္ဂးရ။
ညးဒေသဟာဗာဏာလ္ၚဵုတံ အခိၚ်ဗ္တံဟိုတ်နူဂမ္တဴလောန်ကာဲတုဲ ညးတိတ်မံၚ်လတူဂၠံၚ် ကေုာံ ညးစှ်ေမံၚ်ဇိုၚ်ကၞိန်တံလေဝ် နွံမံၚ်ရောၚ် ဂွံတီရ။
ပရေၚ်သဳကၠဳ အကြာကျူဘာကဵု အမေရိကာန်တံ ဆက်အာဂတဟွံဂွံဒှ်မံၚ်ရောၚ် ညးတာလျိုၚ်သီုၜါလပါ်တံ ဟီုလဝ်ရ။
Ref:Reuters