မဝ်သကို၊ ဂျူလာၚ် ၁၀
ပ္ဍဲဍုၚ်တူရကဳ ပ္ဍဲပေါဲသဳကၠဳက္ဍိုပ်သ္ကိုပ်အဆံၚ်သၠုၚ် ကၠောန်ဗဒှ်လဝ် ပ္ဍဲဂျူလာၚ် ၈ ဂှ် ရတ်ယှာ ပျုတ်ဗဒက် တင်သ္ဂုတ်သွာတ် ဂကောံနေတိုဝ်တုဲ၊ ဟိုတ်နူ ပရေၚ်သ္ဂုတ်သွာတ်တံဏံဂှ် အကာဲအရာအဆက် သွက်ပရေံပရေံတံ က္တဵုဒှ်ကၠုၚ်မာန်ရောၚ် ဟီုလဝ်ရ။
ဂကောံမဟာမိတ်နေတိုဝ် လလောၚ်တြး ဆက်ကဵုအာ ပရေၚ်အရီုဗၚ်ပၞာန် သွက်ယူခရုၚ်တုဲ၊ ဍုၚ်ကောန်ဂကောံတံ ကဵုလဝ်ကတိ သွက်ပရေၚ်ပံၚ်ကောံစဵုဒၞာဂှ်လေဝ် ထပ်သ္ပလဝ်ဒတန်အိုတ်ရ။
ပရေၚ်ကေၚ်ကာ ကဵုဖျုန် ဂကောံနေတိုဝ်တံ ရီုဗၚ်အာဂှ် ဟွံပြံၚ်လှာဲ၊ ဆက်နွံအာမံၚ် အတိုၚ်ဗီုတြေံတေံရောၚ် ညးဗြဴအခေါၚ်ဟီုဂးနွံ ဌာနပရေၚ်ဍုၚ်သအာၚ်ရတ်ယှာ မာရဳယာ ဇာခါရဝ်ဗာ ဟီုရ။
ပွမဖန်ဗဒှ်ပၠုပ်ဏာလဝ် ဗီုပြၚ်ပရေၚ်ပၞာန် ပ္ဍဲတိုက်ယူရောပ်ကီု၊ ပတဝ်အာရီု သွက်ဂွံသၠုၚ်ပတိုန်အာ ဍာ်ဒကေဝ်အစောံစရာဲ ပရေၚ်စဵုဒၞာကီု၊ ပရေၚ်ဒစးဒုၚ် ပလေဝ်စကိုပ်ကၠာ သွက်ပဋိပက္ခရပ်လွဟ် ကဵုရတ်ယှာ ကေုာံ ပရေၚ်ကဵုမံၚ်အရီုဗၚ် ယူခရုၚ်တံဂှ် ဒှ်မံၚ်ပရေၚ်ကိစ္စ ဂကောံနေတိုဝ် ကဵုလဝ်ဖျုန်တုဲ ဆက်နွံမံၚ် အတိုၚ်ဗီုတြေံရောၚ် သာ်ဝွံ ညးဟီုလဝ်ရ။
ယဝ်ရညးလးဖျေံမံၚ် မဟာဗျူဟာ ဂကောံနေတိုဝ်တံ ဒေါအ်တုဲ ချပ်ဗ္စာအာ မွဲခဏမာန်မ္ဂး၊ နူလပါ်ညးတံ တၚ်သ္ဂုတ်သွာတ် ဟၟဲကဵုပရေၚ်ဒုၚ်တာလျိုၚ်သာ်ဏံဂှ် ဖျေံဏာဟွံသေၚ်ပုဟ် ညးသ္ဂးရ။
ဟိုတ်နူတင်သ္ဂုတ်သွာတ်တံဏံတုဲ ၜိုတ်ဂကောံမဟာမိတ်နေတိုဝ်တံသၟး ဟွံသေၚ်ဏီ၊ သီုအလုံမွဲဂၠးကဝ်တံလဝ် သွက်ဂွံပတဝ်အာက္ဍိုပ် ဇရေၚ်ပြသၞာ တောဲဆက်ကၠုၚ်ပရေံပရေံတံကီုရောၚ် မာရဳယာ ဇာခါရဝ်ဗာ ကလေၚ်သှ်ခၠေဝ် ဟီုလဝ်နွံရ။
ဍုၚ်ကောန်ဂကောံနေတိုဝ်တံ ကဵုလဝ်ကတိ ပ္ဍဲပေါဲသဳကၠဳက္ဍိုပ်သ္ကိုပ်အဆံၚ်သၠုၚ်ဂှ် ပ္ဍဲသၞာံ ၂၀၂၆ မ္ဂး ကဵုအာအရီုပရေၚ်ဗၚ်ပၞာန် သွက်ယူခရုၚ် သြန်ယူရို ၇၀ ဗဳလဳယာန် (ဒဝ်လာအေမေရိကာန် ၈၀ ဗဳလဳယာန်) ရောၚ်။
ပ္ဍဲလိက်လလောၚ်တြး ပေါဲသဳကၠဳက္ဍိုပ်သ္ကိုပ်အဆံၚ်သၠုၚ်ဂှ် အတိုၚ်တၚ်စၟတ်ပိုၚ်ခြာ ဂကောံမဟာမိတ် ၝောံပိုဒ် ၅ မ္ဂး၊ ကဵုလဝ်ကတိ ပရေၚ်ပံၚ်ကောံစဵုဒၞာ ခြိုၚ်ဇာနှိက်ပသဲဂှ် ထပ်သ္ပလဝ်ဒတန်တုဲ၊ တၚ်တုပ်စိုတ် ဆေၚ်စပ်ကဵုလွဟ် ၚုဟ်မးဒဝ်လာအေမေရိကာန် ၅၀ ဗဳလဳယာန်တံဂှ်လေဝ် ချူထမံက်ထ္ၜးလဝ်ကီုရောၚ်။
ပ္ဍဲအကာဲအရာဏံမ္ဂး လတူဂကောံနေတိုဝ် ပရေၚ်အမေရိကာန် စိုတ်လီုမံၚ်ဂှ်လေဝ် ဟွံပၞုက်ဗ္ဒန်လဝ်ပုဟ် မာရဳယာ ချူလဝ် ပ္ဍဲဝက်ဘ်သိုက် ဌာနဝန်ဇၞော်ပရေၚ်ဍုၚ်သအာၚ်ရ။
ပြသၞာဂရေၚ်လန်ဂှ် ညံၚ်ဂွံကိတ်ညဳကဵု ပရေၚ်ရန်တၟအ်အနာဂတ် အမေရိကာန်ဂှ် သောၚ်ကလးကဵုဟွံမာန်ဏီတုဲ၊ ဍုၚ်ကောန်ဂကောံ မဟာမိတ်တံဂှ် အတိုၚ်ဗီုပြၚ်ပၟိက် သွက်အမေရိကာန် ပရေၚ်ထံက်ပၚ်ရီုဗၚ်လဝ် ညးတံဂှ် ကၠောန်ကဵုလဝ်ဟၟဲပုဟ် နူဝါယှေန်တာန် သ္ၚဳဂၠိပ်ညာတ်လဝ်ဂှ်လေဝ် မာရဳယာ ချူလဝ်ရ။
ဒှ်ပရေၚ်ကယျာန်ဓဝါတ် အကြာ သမ္မတအမေရိကာန် ကေုာံ က္ဍိုပ်သ္ကိုပ်နေတိုဝ်တၞဟ်တံဂှ် ထမံက်ထ္ၜးမံၚ် ပရေၚ်ဒဳမဝ်ကရေဇြဳ ဂကောံနေတိုဝ် ဇြဟတ်ထတ်မံၚ်တုဲ၊ သွက်သမ္မတရတ်ယှာ ပူတေန်ဂှ် ထေက်ကဵုဒးကေတ်အာခန်လ္ၚတ်မွဲရောၚ် ညးအုပ်ကာနာနာနေတိုဝ် မက်ရူတဳ ဟီုရ။
Ref:Reuters