မနဳလာ၊ ဗၚ်ကံက်၊ ဂျူလာၚ် ၁၁
ဝန်ဇၞော်ဍုၚ်သအာၚ်အာသဳယာန်တံကဵု ဝန်ဇၞော်ပရေၚ်ဍုၚ်သအာၚ်ဗၟာ ဆဵုဂဗ ပ္ဍဲဍုၚ်ၜၚ်ကံက်တုဲ သွက်ဂွံသဳကၠဳအာ ပရေၚ်တာဒၞာ ပေါဲပၞာန်အပ္ဍဲဍုၚ် ကေုာံ အကာဲအရာပရေၚ်ဆက်ဆောံ ကုအာသဳယာန် ၜိုဟ်ဂံက်မံၚ် ပွိုၚ် ၅ သၞာံတံရောၚ် ပ္ဍဲဂျူလာၚ် ၁၀ ဂှ် နူကဵုဖိလေတ်ပိုၚ် ဟီုကၠုၚ်ရ။
ပ္ဍဲဂျူလာၚ် ၁၂ မ္ဂး ဥက္ကဌ ဂကောံအာသဳယာန် ဖိလေတ်ပိုၚ် သ္ကိုပ်သ္ကပၠတရဴအာ ကောံဓရီု ကောန်ဂကောံ ၁၁ ဍုၚ်တံရောၚ်။
ပရေၚ်ဏံဝွံ ကြဴနူပၞာန်သီအဝဵုတုဲ ကုဝန်ဇၞော်ပရေၚ်ဍုၚ်သအာၚ်ဗၟာဂှ် ဒှ်ပရေၚ်ဆဵုဂဗ နတဲ အလန်ကၠာအိုတ်ရောၚ်။
ဟိုတ်နူပရေၚ်သီအဝဵု ပေါဲပၞာန်အပ္ဍဲဍုၚ်က္တဵုဒှ်ကၠုၚ်တုဲ သ္ကိုပ်ပၞာန်ဗၟာတံ ဒးဒုၚ်ကၟာတ်လဝ်အခေါၚ်တိုန်စိုပ် ကောံဓရီုက္ဍိုပ်သ္ကိုပ်အဆံၚ်သၠုၚ် အာသဳယာန်တံရ။
အပ္ဍဲကဵုပေါဲပၞာန်အပ္ဍဲဍုၚ် မၞိဟ် ၁ ကိုတ်ပြၚ် ချိုတ်အာနွံတုဲ လၟိဟ်ပြကောဋိကိုတ်ပြၚ် အဟိန်ဒးဂြိပ်ပါဲဒဴမံၚ်ဏံဂှ် ဒပ်ပၞာန်ဗၟာ ကၠောန်ဗဒှ်လဝ် ပရေၚ်ဖံက်ပကဝ်အခေါၚ်အရာမၞိဟ် ဗွဲမလှဲလး ကေုာံ ပရေၚ်ဒုစရိုတ်ပၞာန်တံရောၚ် ဒးဒုၚ်စောဲစပ်လဝ်နွံရ။
တၚ်စောဲစပ်တံဏံဂှ် ဒပ်ပၞာန်ဗၟာတံ ကလေၚ်တးပါဲလဝ်တုဲ အခိၚ်လၟုဟ်မ္ဂး အလဵုအသဳကောန်အရာပ် သမ္မတ မေန်အံၚ်လှိုၚ် သ္ကိုပ်သ္ကလဝ်ဂှ် ကွာ်ဂါံအာမံၚ် လတူဂၠံၚ်တရဴဒဳမဝ်ကရေဇြဳယျ သာ်ဝွံ ဟီုလဝ်ရ။
ဍုၚ်ဗၟာဝွံ နဒဒှ်သ္ကုတ်ပွမပါ်ခြာပတိတ် နူဂကောံအာသဳယာန်ဟွံဂွံ ဆက်နွံအာမံၚ်တုဲ ပ္ဍဲဂျူလာၚ် ၁၂ ဂှ် ဒှ်ပရေၚ်ဆဵုဂဗဗွဲပလးမွဲရောၚ် ဌာနဝန်ဇၞော်ပရေၚ်ဍုၚ်သအာၚ် ဖိလေတ်ပိုၚ် ချူထမံက်ဟီုလဝ်ရ။
ဒှ်ပရေၚ်ကဵုအခေါၚ်အရာ သွက်ဝန်ဇၞော်ပရေၚ်ဍုၚ်သအာၚ်ဗၟာ ဂွံသောင်ကလးအာ အကာဲအရာအပ္ဍဲဍုၚ် ကုဇရေၚ်ဝန်ဇၞော်ပရေၚ်ဍုၚ်သအာၚ်အာသဳယာန်တံရောၚ် ဖိလေတ်ပိုၚ် ဟီုလဝ်ရ။
စပ်ကဵုပရေၚ်ပ္ညဳပ္ညပ် ဍုၚ်ဗၟာ ကေုာံ အကြာအာသဳယာန်တံတုဲ ဝန်ဇၞော်ပရေၚ်ဍုၚ်သအာၚ်တံ ပါ်ပရအ်သၠာဲဂတးအာလညာတ် စပ်ကဵုပရေၚ်ဒှ်ဒွိၚ် သွက်ဂွံဒေါအ်ထောံ ပရေၚ်ပကီုပရာတ်တံဂှ် နူကဵုဗၟာ သောင်ကလးမာန်ရောၚ် ဌာနဝန်ဇၞော်ပရေၚ်ဍုၚ်သအာၚ် ဖိလေတ်ပိုၚ် ဟီုရ။
ညံၚ်ဂွံဒှ်အာ ပရေၚ်သဳကၠဳလပါ်လညာတ်ခိုဟ် အကြာဂကောံဆေၚ်စပ်တံ ကေုာံ ကေၚ်ကာပရေၚ်ကဵုအရီုဗၚ် ပရေၚ်ဓရ်ဗ္စာရဏာမၞိဟ်တံဂှ်လေဝ် သဳကၠဳမာန်ရောၚ် ဖိလေတ်ပိုၚ် ဟီုလဝ်ရ။
သွက်ဂွံဗဒေါအ်ထောံ ပရေၚ်အကာဲအရာ လုပ်အကြာဗွိုၚ်အာသဳယာန်ဟွံဂွံ ဒှ်မံၚ်တံဏံဂှ်တုဲ ဥူမေန်အံၚ်လှိုၚ် အလန်ကၠာအိုတ် အာလဝ်ဍုၚ်လဴ ကောန်ဂကောံအာသဳယာန်ရ။
Ref:Reuters