သွက်ဂွံကၠောန်ပတိတ် ကမ်သၞောဝ်ထိၚ်သၞေဝ် Patriot  ကာန်ပနဳမေတ်သူဗဳယှဳ ဂျပါန် ညံၚ်ဂွံပံၚ်တောဲအာ ယူခရုၚ်စဳဇန်

ကိဗ်၊ ဂျူလာၚ် ၁၂

ကြဴနူအေမေရိကာန် ကဵုအခေါၚ်ကၠောန်ပတိတ် လွဟ်အဆံၚ်သၠုၚ် ကုယူခရုၚ်တုဲ သွက်ဂွံကေတ်အရီုဗၚ် ကၠောန်ပတိတ်အာ သၞောတ်ပရေၚ်စဵုဒၞာဗလးကျာ Patriot ဂှ် နူကဵုယူခရုၚ် ရန်လဝ် သွက်ဂွံအာတ်အရီုဗၚ် ကုကာန်ပနဳ ဂျပါန် မေတ်သူဗဳယှဳရောၚ် ဂွံတီကေတ်ရ။

ပ္ဍဲသတ္တဟဏံ သမ္မတယူခရုၚ် ဗိုလိုဒဳမာ ဇာလန်သကဳ ဟီုလဝ် ဒဒှ်ရ စိုတ်မိက်ဂွံပံၚ်တောဲကၠောန်ကမၠောန် ကုကာန်ပနဳ မေတ်သူဗဳယှဳ ဒှ်ကာန်ပနဳ ဂွံလဝ်လိုင်သေန်ပတိတ်ကၠောန် ကမ်သၞောဝ်ထိၚ်သၞေဝ် Patriot ဂှ်ရ။

ဟိုတ်နူရတ်ယှာ ဗတိုက်မံၚ်တုဲ သွက်ယူခရုၚ်မ္ဂး လွဟ်သွက်ဂွံစဵုဒၞာဗလးကျာတံ နွံမံၚ်ပၟိက် ဇၞော်ကဵုဇြဟတ်ရောၚ်ဂှ် ဇာလန်သကဳ ဟီုကၠုၚ်မံၚ် လံလရ။

ကမၠောန်ကာန်ပနဳမေတ်သူဗဳယှဳ ကၠောန်ပတိတ်မံၚ်တံဂှ် ညးတံတီမံၚ်တုဲ ပ္ဍဲအရာကၠောန်ပတိတ် သၞောတ်ကမ်သၠောဝ် ထိၚ်သၞေဝ် Patriot ဂှ် ကာန်ပနဳဏံဂှ် ဒှ်ကာန်ပနဳ ထိၚ်လဝ်ဍာ်ဒကေဝ် သၞောတ်ဗ္ၜတ်သၠုၚ်မွဲရောၚ်  ဇာလန်သကဳ ဟီုလဝ် ပ္ဍဲဂျူလာၚ် ၉ ရ။

ဟိုတ်နူဂွံလဝ်အခေါၚ် နူအမေရိကာန်တုဲတုဲဒှ်မံၚ်တုဲ နကဵုကာန်ပနဳမွဲ သၞောတ်ပရေၚ်စဵုဒၞာ ကမ်သၠောဝ်ထိၚ်သၞေဝ် အလဵုဇကု ကၠောန်ပတိတ်အာမာန်ရောၚ် သမ္မတယူခရုၚ် သ္ဂးရ။

ပရေၚ်ကၠောန်ပတိတ် ဗီုပြၚ်သၞောတ်လွဟ်သာ်ဏံ ညးတံမိက်ဂွံဆဵု ပ္ဍဲကဵုယူခရုၚ်ကီုလေဝ် တန်တဴမံၚ်လတူပၟိက်ဆန္ဒ ဂျပါန်ဟေၚ် ဇာလန်သကဳ ဟီုရ။

ပ္ဍဲကောံဓရီုက္ဍိုပ်သ္ကိုပ်နေတိုဝ် ကၠောန်လဝ် ဍုၚ်အန်ကာရာဂှ် သမ္မတအေမေရိကာန် ဒဝ်နေဝ် ထရ ကဵုလဝ်အခေါၚ် ကၠောန်ပတိတ် ကမ်သၠောဝ်ဗဇဵုသၠေက် Patriot ကုယူခရုၚ်ရောၚ်။

နူညးတံ ကဵုအခေါၚ်ပတိတ်ကၠောန် ကမ်သၠောဝ်ထိၚ်သၞေဝ် Patriot ဂှ်ရ ဟွံကဵုလဝ် ရုံရုံဂပ်ပ်ပုဟ် ဗီုဏံဂှ် ပရေၚ်စောဒက ဟီုဟွံထေက်ပုဟ် ထရ ဟီုလဝ်ရ။

ဆဂး က္ဍိုပ်သ္ကိုပ်အမေရိကာန် ဟွံဟီုလဴ ပရူဗွဲဇိပ်ပ်ဂၠိပ်ပ်ဏီတုဲ ပရေၚ်တၚ်ကော်ဆောနာနာတံလေဝ် ဆက်နွံမံၚ်အာ ဗွဲမဂၠိုၚ်ဏီရောၚ်။

သၞောတ်ပရေၚ်စဵုဒၞာ ကမ်သၠောဝ်ထိၚ်သၞေဝ် Patriot အမေရိကာန် ပလံၚ်လဝ်ကဵု ယူခရုၚ်တံဂှ် ရတ်ယှာဗတိုက် ပဵုဂၠိုၚ်တိုန်မံၚ်တုဲ သွက်ယူခရုၚ်မ္ဂး ဒှ်သၞောတ်ပရေၚ်စဵုဒၞာမွဲရောၚ်။

ဆဂး သွက်ဂွံပတိတ်ကၠောန်အာ သၞောတ်ပရေၚ်စဵုဒၞာဗလးကျာသာ်ဏံဂှ် သွက်ယူခရုၚ် ဒးကေတ်အာ အခိၚ်ၜိုတ်မွဲပွဳပွူသၞာံ ဒှ်မာန်ရောၚ် တၠပညာပရေၚ်ပၞာန်တံ သ္ဂးရ။

သၞောတ်ပရေၚ်စဵုဒၞာဗလးကျာဏံ ကၠောန်ပတိတ်လဝ် အပ္ဍဲဍုၚ်ဂျာမနဳတုဲတုဲဂှ် ရီုဗၚ်ကဵုအာ ယူခရုၚ်မာန်ရောၚ် ညးမၚ်ရံၚ်လ္ၚတ်ပရေၚ်ပၞာန်တံ သ္ၚဳဂၠိပ်လဝ်ရ။

ယူခရုၚ် ရန်လဝ် အပ္ဍဲပွိုၚ်မွဲမွဲသၞာံ သွက်ဂွံပတိတ်အာ ကမ်သၠောဝ်ထိၚ်သၞေဝ် Patriot ၃၀ မ ကီုလေဝ် ကဏ္ဍဂျပါန် ဗီုလဵုပါလုပ်အာဂှ် ဟွံဂွံတီဏီပုဟ်။

Ref:Reuters