ဒါကာ၊ ဂျူလာၚ် ၁၄
ပ္ဍဲဍုၚ်ဗဂႅလာဒေအ် ဟိုတ်နူဗြဲဂူရိုပ်ထတ်မံၚ် ဂၠိုၚ်ကဵုတ္ၚဲတုဲ အလုံမွဲဍုၚ် ပရေၚ်ဍာ်ဇၞော်ဗွဲသက်ခဏ၊ တိလာ်စှ်ေအာတံ က္တဵုဒှ်လဝ်တုဲ စဵုကဵုအခိၚ်ပြဟ်ဟ်ဏံမ္ဂး မၞိဟ် ၅၁ တၠ ချိုတ်အာလဝ်နွံတုဲ မၞိဟ် ၁ ပြကောဋိကိုတ်ပြၚ်တံလေဝ် ဒးဒုၚ်ဇီုကပိုက်မံၚ်ရောၚ် ညးတာလျိုၚ်တံ ဟီုရ။
ဟိုတ်နူဗြဲဂူမံၚ်ဆက်က်ဟွံပိုတ်တုဲ ဍုၚ်ဇၞော်မဟာ ဒါကာ ကေုာံ ပ္ဍဲဒေသဗွဲမဂၠိုၚ်တံဂှ် ပရေၚ်ဍာ်ဇၞော်တိုန် ကေုာံ တိလာ်စှ်ေတံ က္တဵုဒှ်လဝ်တုဲ လၟိဟ်မၞိဟ်ဂၠိုၚ်ကဵုလ္ၚီဗွဲမဂၠိုၚ်တံလေဝ် ဒးထောံလဝ်ဒၞာဲဝါဲသ္ၚိဌာန်တံတုဲ ဂြိပ်ပါဲမံၚ်အိုတ်ရ။
အပ္ဍဲညးချိုတ်အာ ၅၁ တၠမ္ဂး၂၈ တၠဂှ် ဒှ်လဝ်ခရိုၚ်ကအ်ဇ်ဗဇြာတုဲ၊ ဒေသတေံဂှ် ဒှ်ဒၞာဲဗဒိုပ်တၠဒဒိုက် ရိုဟေန်ဂျာ ဇၞော်အိုတ်ပ္ဍဲဂၠးတိ တၠဒဒိုက် ၁ ပြကောဋိကိုတ်ပြၚ် မံၚ်စံၚ်တန်တဴမံၚ် မဒှ်ရ။
အပ္ဍဲသတ္တဟ တုဲကၠုၚ်တေံလေဝ် ပ္ဍဲဘာဗတောန်လိက်မွဲဒၞာဲ ပ္ဍဲကဵုခရိုၚ်ကအ်ဇ်ဗဇြာဂှ် ဟိုတ်နူဍာ်ဇၞော်တုဲ ကောန်ကွးဘာတံကဵု အစာမွဲတၠ ချိုတ်အာလဝ် နွံကၠုၚ်လဝ်ကီုရ။
ဍုၚ်ဗဂႅလာဒေအ်ဝွံ ဒှ်မံၚ်ဒၞာဲ ဍုၚ်နိဂီုတိသဝ်မွဲတုဲ ဟိုတ်နူကြုၚ်တံဂၠိုၚ်တုဲ လၟေၚ်သၞာံ စိုပ်အခိၚ်ကာလ ဥတုရာသီမုတ်သုံမ္ဂး ဗြဲဂူရိုပ်ထတ်တုဲ ဒးဆဵုဂဗဇီုကပိုက်မံၚ်ကဵု ပရေၚ်ဍာ်ဇၞော်တိုန် မွဲဏှမွဲဏှလၟိုန်န်ရ။
ဆဂး ဟိုတ်နူရာသဳဥတုပြံၚ်လှာဲမံၚ်ကီု ပရေၚ်ဗြဲဂူတံဂှ် ဂၠိုၚ်ထတ်တိုန် နူအခိၚ်ကၠာတေံတုဲ လၟိဟ်အလန်လေဝ် ပဵုဂၠိုၚ်တိုန်မံၚ်ရောၚ် တၠပညာတံ ကဵုလဝ်သတိနွံရ။
ပရေၚ်ဗြဲဂူထတ်မံၚ်အလန်ဏံဝွံ စက္တဵုဒှ်ကၠုၚ်နူသတ္တဟပြၚ်ပြၚ်တေံတုဲ၊ ကြဴနူဂှ် ပဵုထတ်တိုန်အာတုဲ ပရေၚ်ဘဲအန္တရာဲဍာ်ဇၞော် တိလာ်စှ်ေအာတံ က္တဵုဒှ်အာမာန်ရောၚ် ညးတာလျိုၚ်တံ ကဵုမံၚ်သတိနွံရ။ သ္ၚိကၟိန်မံၚ်စံၚ်တန်တဴမံၚ် ပ္ဍဲဒၞာဲဘဲအန္တရာဲဂၠိုၚ်မံၚ်တံဂှ် ဆုဲပြံၚ်ကဵုဒၞာဲဂီုကၠီုတံတုဲ ပေါ်သှ်လိက်ဘာဗတောန်လိက် လ္ၚဵုတံဂှ်လေဝ် ဒးပဆုဲထောံအခိၚ်ရ။
ပ္ဍဲအခိၚ်ပြဟ်ဟ်ဏံ ညးဒးထောံဌာန်ဒၞာဲဝါဲသ္ၚိဌာန် မၞိဟ်ကဵုလ္ၚီဗွဲမဂၠိုၚ်တံဂှ် လုပ်စ္ၜုဲစ္ၜော်မံၚ်တဴမံၚ် ပ္ဍဲဗဒိုပ်ဟံၚ်ပြာ်မွဲခဏ အလဵုအသဳ ပံက်လဝ်ဂှ်ရ။
ပ္ဍဲဍုၚ်ဇၞော်မဟာ ဒါကာလေဝ် ဍာ်ဂၠံၚ်ဗွဲမဂၠိုၚ်တံ ဍာ်ဗၠိုက်မံၚ်တုဲ၊ ဒၞာဲလ္ၚဵုတံမ္ဂး ဍာ်သၠုၚ်တိုန်စဵုကဵု လ္တူတင်ၜံၚ်တုဲ ဂၠံၚ်ကတေၚ်ကွဳစက်တံ ဆိုအ်ကၟာတ်မံၚ်ရ နူကဵုဌာန်ပရိုၚ် BBC Bangla ချူထမံက်လဝ်ရ။
မဳဒဳယာအပ္ဍဲဍုၚ်လ္ၚဵုတံမ္ဂး အလဵုအသဳကၠာတေံ ဂစာန်ပလေဝ်လဝ် သၞောတ်ဍာ်မြံၚ် ဍုၚ်ဒါကာဂှ် ၜိုတ်လဵုစိုပ်မံၚ်တရဴရော သၟာန်သၟုက်မံၚ် အိုတ်ရ။
ပြဟ်ဟ်ဏံ ဗြဲမုတ်သုံဂှ် ဆက်ဇီုကပိုက်မံၚ် ပ္ဍဲဒေသလပါ်သၟဝ်ကျာ ကေုာံ လပါ်ဨသာန်တံဏီတုဲ ပ္ဍဲဒၞာဲလ္ၚဵုတံ ပရေၚ်ဍာ်ဇၞော်တိုန်တံ ထပ်က္တဵုဒှ်မာန်ဏီရောၚ် ကဵုလဝ်သတိနွံရ။
Ref:BBC