ဗာလင်၊ ဂျူလာၚ် ၁၅
ကာန်ပနဳကၠောန်ပတိတ်ကွဳစက် Volkswagen Group ဒယှ်တှ်ပြာကတ်ဒၟံၚ် ပ္ဍဲကဵုဂၠးတိ နူဍုၚ်ဂျာမနဳဂှ် ချပ်ဗ္စာမံၚ် အစဳအဇန် သွက်ဂွံယှအ်ဖျေံအာ လၟိဟ်ကမၠောန် ပ္ဍဲအလုံဂၠးကဝ် ၁ ကိုတ်ဂှ် သ္ကိုပ်ရေၚ်တၠုၚ်ကေၚ်ကာ ကာန်ပနဳ အဝ်လဳဗာ ဗလန် သ္ပဒတန်ရ။
ကိုပ်ကၠာတေံ စိုပ်သၞာံ ၂၀၃၀ မ္ဂး ကာန်ပနဳ Volkswagen Group အပ္ဍဲဍုၚ်ဂျာမနဳ သွက်ဂွံယှအ်ဖျေံအာကမၠောန် ၜိုတ်ပွဳပွူ ၅ လက် လလောၚ်တြးလဝ်ကီုလေဝ် ပြဟ်ဟ်ဏံမ္ဂး လၟိဟ်ပဵုတိုန်ၜါဆ ကြပ်စိုပ် ၁ ကိုတ် ယှအ်ဖျေံအာမာန်ရောၚ် ဟီုပတိတ်ကၠုၚ်ရ။
အပ္ဍဲ Volkswagen Group ဂှ် ပါဲနူတဆိပ် Volkswagen တုဲ တဆိပ်ကွဳစက် ပြာကတ်ဒၟံၚ်တံ Porsche, Audi, Seat ကေုာံ Skoda တံလေဝ် ပါလုပ်ကီုရောၚ်။
ကာန်ပနဳ Volkswagen ဝွံ အပ္ဍဲသၞာံတုဲကၠုၚ်တံဏံ သြန်ပရဲယအ်စှ်ေအာ ဗွဲမဂၠိုၚ်ရ။ ဟိုတ်အဓိကဂှ်မ္ဂး အပ္ဍဲဗွဝ်ဖျာအဓိကတံ လၟိဟ်ဇြဟတ်ပရေၚ်သွံရာန်ယအ်စှ်ေအာ ကေုာံ ကာန်ပနဳကွဳစက်ကြုက်တံ လုပ်ပြိုၚ်ပကာန်မံၚ် ပ္ဍဲဗွဝ်ဖျာယူရောပ် နကဵုဇြဟတ်ထတ်တ်ရောၚ်။
သြန်အိုတ် သွက်ပ္ဍဲပရေၚ်ပတိတ်ကပေါတ် Volkswagen ဂှ် ယဝ်ရၜတ်ကဵုကာန်ပနဳပြိုၚ်ပကာန်တံမ္ဂး သၠုၚ်မံၚ်ပွဳပွူ ၂၀ က္ဍိုပ်ကၠံရောၚ် အပ္ဍဲလိက်စၟတ်သမ္တီ ပလံၚ်ဗ္စိုပ်လဝ် ကုကောန်ကမၠောန်တံဂှ် အဝ်လဳဗာ ဗလန် သ္ဂးလဝ်ရ။
ဟိုတ်ဂှ်တုဲ သြန်အိုတ် ကာန်ပနဳတံဂှ် ဒးထပ်ယှအ်ဖျေံဟေၚ် ဟီုလဴကၠုၚ်တုဲ ယဝ်ရဖန်ဖက်ရေၚ်တၠုၚ်အာ အတိုၚ်ဗီုဏံမ္ဂး ပ္ဍဲအလုံဂၠးကဝ် ကမၠောန်ပွဳပွူ ၅ လက် ဒးထပ်ယှအ်ဖျေံအာရောၚ် သောင်ကလးလဝ်ရ။
ပ္ဍဲသတ္တဟ တုဲကၠုၚ်တေံ ကၠာဟွံစိုပ်ကောံဓရီု ဂကောံဗုက်ပရေၚ်ကောပ်ကာဲ Volkswagen ဂှ် ပ္ဍဲရုၚ်စက် Volkswagen အလုံမွဲဍုၚ်ဂျာမနဳဂှ် သၟာကမၠောန်တံ ထ္ၜးကၠုၚ်ဆန္ဒအိုတ်ရ။
ဆဂး ညးလ္ၚတ်ပရေၚ်ကမၠောန်ကွတ်စက်လ္ၚဵုတံ သ္ၚဳဂၠိပ်လဝ် ဒဒှ်ရ လၟိဟ်မဂၞန် ယှအ်ဖျေံကမၠောန် ၁ ကိုတ်ဏံဂှ် နူလပါ် Volkswagen သွက်ဂွံကေတ်စေဝ်လ္တူ ပ္ဍဲပရေၚ်ပ္ညဳပ္ညပ် ကုသမဂ္ဂသၟာကမၠောန်တံတုဲ ရန်တၟအ် ပတိတ်လလောၚ်တြးလဝ် ဒှ်မာန်ရောၚ် သ္ဂးရ။
ဟိုတ်ဂှ်တုဲ လၟိဟ်ဒးယှအ်ဖျေံအာ ဒၞာဲကမၠောန် သွက်ဂွံသ္ပဒတန်အိုတ်ကၞောတ်မ္ဂး ပေၚ် ၁ ကိုတ် ဟွံသေၚ် အောန်စှ်ေနူဏံမာန်ရောၚ် တော်တၟော်မံၚ်ကီုရ။
Ref:BBC