ၜၚ်ကံက်၊ ဂျူလာၚ် ၁၆
အပ္ဍဲဍုၚ်သေံ ညးစၞးစၠတ်ထဝ် ရဲလပါ်ဗော်ဒစဵုဒစးတံပတိုန်ထ္ၜးကၠုၚ် သက်သဳပရေၚ်ဍာ်ကၠိခ္ဍက် ဟိုတ်နူပွမၜံက်ခါဲသတ္တု နူဍုၚ်ဝုတ်ဒိုဟ်သ္ၚိဗ္ဒာဲတုဲ သွက်ဂွံထပ်ပတိုန်ထ္ၜးအာကုအလဵုအသဳကြုက်ပၠန်ဂှ် အမာတ်ကလုတ်ဇၞော်ကြုက် ဆေၚ်စပ်ကဵုဍုၚ်သေံဂှ် ဟီုပတိတ်လဝ်ရ။
က္ဍိုပ်သ္ကိုပ်ဗော်ညးဍုၚ်ကွာန်သေံ ပတိုန်ထ္ၜးလဝ် သက်သဳပရေၚ်ဍာ်ကၠိခ္ဍက်ၜက်ပယျဵု ကုရုၚ်ကလုတ်ကြုက် မဒှ်ရ။
စပ်ကဵုပရေၚ်ကိစ္စဏံတုဲ ဂကောံမှာဇန်ညးဍုၚ်ကွာန်တံ ထ္ၜးကၠုၚ်ဆန္ဒ ပ္ဍဲဍုၚ်သေံတုဲ၊ ပ္ဍဲပေါဲထ္ၜးဆန္ဒ ဂတရုၚ်ကလုတ်ကြုက်ဂှ် မၞိဟ်ၜါတၠ ဒးလဝ်ဝပ်နွံရ။
စပ်ကဵုပရေၚ်ဍာ်ကြုၚ်သေံကၠိခ္ဍက်တုဲ ဍုၚ်ဆေင်စပ်ပါလုပ်ဖအိုတ်တံ ထေက်ကဵုဒးပံၚ်တောဲရေၚ်တၠုၚ်အာတုဲ အပ္ဍဲကြုၚ် လပါ်သၟဝ်ကျာဍုၚ်သေံ ဓါတ်ဂျိတံ က္တဵုဒှ်မံၚ်ဂှ် စနူသၞာံတုဲကၠုၚ်ဏံ စၟဳစၟတ်ဆဵုညာတ်လဝ်ရောၚ် သ္ဂးရ။
ပရေၚ်ဍာ်ကၠိခ္ဍက်တံဏံဝွံ က္တဵုဒှ်လဝ် နူဗွိုၚ်အပိုၚ်အခြာတိဍာ်သေံ ဟွံသေၚ်ပုဟ် ညးစၞးစၠတ်ထဝ်ရဲဗော်လပါ်ဒစဵုဒစးတံ နကဵုသက်သဳပတိုန်ထ္ၜးလဝ် ကုရုၚ်ကလုတ်ကြုက်တံဂှ် ချူထမံက်လဝ်ရ။
အပ္ဍဲကဵုသက်သဳပတိုန်ထ္ၜးကဵုလဝ် ရုၚ်ကလုတ်ကြုက်တံဂှ် ဗီုပြၚ်အစာံဍာ် ကေုာံ အစာံလက်ကၠာ်ဟမိက်စှ်ေလဝ်တံ ပါလုပ်မံၚ်ရောၚ် ဂွံတီကေတ်ရ။
ပ္ဍဲအရာပရေၚ်ဍာ်ကြုၚ်ကၠိခ္ဍက်ဂှ် ကြုၚ်ခိုအ်၊ သွိုင်၊ ရူအက်၊ မေဝ်ဂံၚ် ကေုာံ ကြုၚ်သြၚ်လောန်တံ ပါလုပ်မံၚ်ရောၚ် ညးစၞးစၠတ်ထဝ် ဗော်ဒစဵုဒစးသေံတံ ပတိုန်ထ္ၜးလဝ် ကုရုၚ်ကလုတ်ကြုက်ရ။
ပ္ဍဲဍုၚ်ဗၟာ ကြုက်ထံက်ပၚ်လဝ်တံတုဲ ဟိုတ်နူခါဲလဝ်ကတိုၚ်မါၚ်သတ္တု ဍာ်ကြုၚ်သေံတံ ဒှ်ကၠုၚ်ဂျိ ပေါဲထ္ၜးဆန္ဒဟွံတုပ်စိုတ်တံ က္တဵုဒှ်မံၚ်တုဲ ဒှ်ကၠုၚ်ပရေၚ်ဇီုကပိုက်ကု တင်ယုတ်ဒေက် ပရေၚ်မံၚ်စံၚ်စသုၚ်ညးဒေသတံရောၚ် ဂွံတီရ။
ဍာ်ကြုၚ်ကရာဘူရီဝွံ ဓါတ်ဂျိနွံမံၚ် လောန်ၜက်နူသၞောတ်ဗ္ၜတ်စၟတ်ပိုၚ်ခြာလဝ်ဂှ်ရောၚ် တၠပညာသေံတံ စၟဳစၟတ်ဂၠိုက်ဂၠာဲ ဂွံလဝ်ရ။
ဒၞာဲၜံက်ခါဲလဝ်ကတိုၚ်သတ္တု ၂၆၇၆ ဒၞာဲတံဂှ် ပကောံဂွံလဝ်စရၚ်နွံတုဲ ကမၠောန်ကြုက်တံ ကေုာံ ပရေၚ်ဍာ်ကၠိခ္ဍက်တံဏံဂှ် ပရေၚ်ဆက်စပ်နွံကီုဟာ ဟၟဲဟာဂှ် ပတိုန်ထ္ၜးလဝ် မဒှ်ရ။
နကဵုဗော်ညးဍုၚ်ကွာန်မ္ဂး လတူဍုၚ်နိဂီုလဵု၊ ဂကောံလဵုမွဲလေဝ် မိက်ဂွံစောဲစပ်တၚ်စုတ်ဒုဟ်ဟွံသေၚ်ကီုလေဝ်၊ အလဵုအသဳ ပါလုပ်ဆေၚ်စပ်မံၚ် ပ္ဍဲပရေၚ်ၜံက်ခါဲသတ္တုတံဂှ် ထေက်ကဵုဒးပံၚ်တောဲစၟဳစၟတ်အာရောၚ် သာ်ဝွံ ဟီုဂးလဝ်ရ။
Ref:Khaosodenglish