ကိဗ်၊ ဂျူလာၚ် ၁၇
အပ္ဍဲသၞေဟ်ၜၚ် အိုဒက်သာ ၜဳလစံက် ဟိုတ်နူပရေၚ်ဗတိုက်ကဵု ဒရုၚ်၊ ကမ်သၠောဝ်တံတုဲ မၞိဟ် ၃ တၠ ချိုတ်အာလဝ် ဂွံတီရ။ ပ္ဍဲကဵုတ္ၚဲမရနုက်ကဵုမသုန် နူလပါ်ရတ်ယှာ ဗတိုက်ဒၟံၚ်ဒေသတေံဂှ် ပရေၚ်မၞိဟ်ချိုတ်အာတံ က္တဵုဒှ်လဝ် မဒှ်ရ။
ပ္ဍဲဍုၚ်သာမ်မဳ လပါ်ဨသာန်ယူခရုၚ်ဂှ် မၞိဟ် ၃ တၠ ချိုတ်အာတုဲ ပ္ဍဲဍုၚ်ဇာရာပဝ်ဇာ လပါ်သၠုၚ်ကျာဂှ်လေဝ် မၞိဟ် ၃ တၠ ထပ်ချိုတ်အာလဝ်ရောၚ် ညးတာလျိုၚ်ယူခရုၚ်တံ ဟီုလဝ်ရ။
ပ္ဍဲဒေသ ၃ ဒၞာဲတၞဟ် လပါ်အဂၞဲယူခရုၚ်တံဂှ်လေဝ် မၞိဟ် ၅ တၠ ထပ်ချိုတ်လဝ်ရောၚ် ညးတာလျိုၚ်တံ သ္ဂးရ။
ပ္ဍဲၜဳလစံက် ၜၚ်ဖ္ဍိုက်ကၠေၚ်ဍေၚ်ရတ်ယှာ ၁၇ မပါမံၚ် သီုၜၚ်ရတ်ယှာ ၂၀ မတံဂှ် နကဵုဒရုၚ်တံ ဗတိုက်လဝ်ရောၚ် နူယူခရုၚ် ပတိတ်လလောၚ်တြးလဝ် ပရိုၚ်ရ။
နဒဒှ်တၚ်တၟေၚ်မွဲမ္ဂး ပ္ဍဲယူခရုၚ် အဃောပြံၚ်လှာဲမံၚ် ဂကောံအလဵုအသဳဇၞော်ကဵုဇြဟတ်တုဲ သ္ကိုပ်ဝန်ဇၞော် ကေုာံ ဝန်ဇၞော်ပရေၚ်စဵုဒၞာ ညးသီုၜါတၠတံ နုက်တိတ်အာယျ ဂွံတီကေတ်ရ။
ဒဒှ်ရဗတိုက်လဝ် သၞေဟ်ၜၚ်အိုဒက်သာဂှ် ဒှ်ဍာံရောၚ် နူဌာနပရေၚ်စဵုဒၞာရတ်ယှာ သ္ပလဝ်ဒတန်ကိုပ်ကၠာတုဲ စွံလဝ်ပွန်ကု စမြိုၚ်ဒၞာဲသ္ဇိုၚ်သၞေဟ်ၜၚ် အဟိန်ပတိုန်ဖျေံမံၚ် ကၠေၚ်ဍေၚ်၊ ကၠေၚ် ကေုာံ ကၠေၚ်ဆဝ်တံဂှ်ရောၚ် ဟီုရ။
နူကဵုရတ်ယှာ ဗတိုက်လဝ်စမြိုၚ်သၠုၚ်သၠုၚ် ပ္ဍဲကဵုယူခရုၚ်မွဲဒၞာဲဂှ် ဒှ်ပွန်ဗတိုက်မံၚ် လတူညးဍုၚ်ကွာန်ကောန်အရာပ်တံသက်သက်တုဲ ညးဍုၚ်ကွာန်တံ ဒးဝပ်ချိုတ်အာလဝ်ရောၚ် ညးတာလျိုၚ်ဒေသယူခရုၚ်တံ ဟီုရ။
စမြိုၚ်ဒၞာဲမွဲမမၞိဟ်မံၚ်ဟၟဲ ကေုာံ ပၠံၚ်ပိုက်ဂက်သ်မွဲတၞုၚ်ဂှ်လေဝ် ဟိုတ်နူရတ်ယှာ ပန်ဗတိုက်တုဲ ဒးလီုလာ်အာနွံ ညးတာလျိုၚ်ယူခရုၚ်တံ သ္ဂးရ။
ပ္ဍဲဂိတုဂျောန်တုဲကၠုၚ်တေံ အပ္ဍဲယူခရုၚ် ညးဍုၚ်ကွာန် ၂၉၃ တၠ ချိုတ်အာတုဲ ၁၉၉၀ တၠ ဒးလဝ်ဝပ်ရ ဂကောံမၚ်လ္ၚတ်အခေါၚ်အရာမၞိဟ် ကုလသမဂ္ဂ ပ္ဍဲဂျူလာၚ် ၁၅ ဂှ် ဟီုရ။
ဟိုတ်နူပန်ဗတိုက်လဝ်ကဵု ဒရုၚ်၊ ကမ်သၠောဝ် နူဌာန်သ္ၚောဲတံဂှ် ညးဍုၚ်ကွာန်တံ ဒးချိုတ်အာ ဒှ်မံၚ်အဓိကတုဲ စဵုကဵု ၄၅ က္ဍိုပ်ကၠံ ညးချိုတ်အာလဝ်နွံရောၚ် ဂွံတီရ။
ဆၜိုတ်ဒၞာဲကၠောန်ပတိတ်လွဟ်ပၞာန်တံ ကေုာံ တရဴဂၠံၚ်ပလံၚ်ဗ္စိုပ်တံဟေၚ် ဗတိုက်မံၚ်ရောၚ် နူကဵုဒပ်ပၞာန်ရတ်ယှာ ဟီုမံၚ်ကီုလေဝ် ပ္ဍဲယူခရုၚ်ဂှ် ညးဍုၚ်ကွာန်တံ ဒးချိုတ်အာလဝ် ပဵုတုဲဂၠိုၚ်တိုန်ကၠုၚ်မံၚ်ရောၚ်။
Ref:BBC