သွက်ဂွံတာဒၞါခၠေဝ်ပလန် လၟေၚ်ကမၠောန် ကံၚ်ဇြဳပၞာန်တံ ထ္မံက်ဒၟံၚ်ရုပ်ရဴ ပ္ဍဲတွဵုရးဍုၚ်မန်ဂှ် NUG ကဵု MSICC တံ သဳကၠဳလဝ်

မတ်မလီု၊ ဂျူလာၚ် (၉)

သွက်ဂွံတာဒၞါခၠေဝ်ပလန် ကုလၟေၚ်ကမၠောန် ကံၚ်ဇြဳပၞာန်သီအဝဵုတံ မထ္မံက်ဒၟံၚ်ရုပ်ရဴ ပ္ဍဲတွဵုရးဍုၚ်မန်ဂှ်တုဲ ကမ္မတဳပရေၚ်ဆက်ဆောံမဟာမိတ် အလဵုအသဳညဳသၟဟ်ဂကူ NUG ကဵု ကမ္မတဳပံၚ်ကောံ ရေၚ်တၠုၚ်ကေၚ်ကာ ဍုၚ်မန် ( MSICC) တံ ဆဵုဂဗသဳကၠဳလဝ်ရ။

ပ္ဍဲကဵုပေါဲသဳကၠဳဆဵုဂဗ မကၠောန်သ္ပလဝ် ပ္ဍဲဂိတုဂျူလာၚ် (၆) တုဲကၠုၚ်တေံဂှ် မ္ၚးနူကမၠောန်ပံၚ်တောဲ မကၠောန်ဒၟံၚ်လၟုဟ် အကြာ NUG ကဵု MSICC တံဂှ် သွက်ကိစ္စ ဆက်တုဲမဒးကၠောန်ပံၚ်တောဲတံဂှ်လေဝ် သဳကၠဳလဝ်အိုတ်ရ။

ပ္ဍဲကဵုဂှ် သွက်ဂွံတာဒၞါ ပေါဲရုဲမာဲကံၚ်ဇြဳပၞာန် မကၠောန်သ္ပဂှ်ကီု သွက်ဂွံတာဒၞါခၠေဝ်ပလန် ကုပွမဝးပ္ကဝ် အခေါၚ်အရာမၞိဟ်တံ ကေုာံ ပွမသီကေတ်တိဂူဗ္ၚတံဂှ် ၜါလ္ပာ်သဳကၠဳလဝ် ညးသ္ကအ်ရ။

စပ်ကဵုအကာဲအရာ ဆဵုဂဗသဳကၠဳၜါလ္ပာ်ဂှ်တုဲ ဖက်ဆောညးအုပ်ကာ (၂) ကမ္မတဳပံၚ်ကောံ ရေၚ်တၠုၚ်ကေၚ်ကာ ဍုၚ်မန် MSICC မိသုတဂျဵု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“စပ်ကဵုပေါဲရုဲမာဲတုဲ လ္ပာ်ပိုယ်တံ ပ္တိုန်ထ္ၜးလဝ်နွံ၊ နကဵု NUG မဒှ်အလဵုအသဳကၟိန်ဍုၚ်ဂှ် အစဳဇန်ပေါဲရုဲမာဲ ဂကောံလ္ပာ်တေံဂှ် ဗီုလဵုခၠေဝ်သောၚ်ကလးရော၊ အေတံဏံဂှ် သၟာန်သၟုက်ညးသ္ကအ်တုဲ ဗီုလဵုကၠောန်ထေက်ရော၊ တုဲပၠန် ပ္ဍဲကဵုတွဵုရးဍုၚ်မန်မ္ဂး ဟိုတ်နူကိုန်အစဳဇန်ဇၞော်ဇၞော် မဖျေံလဝ်တံဂှ်တုဲ ပွမသီတိ၊ သီဗ္ၚ၊ ပွမဝးပ္ကဝ်အခေါၚ်အရာမၞိဟ်တံ နွံဒၟံၚ်ဂှ်လေဝ် ဗီုလဵုတာဒၞါရော၊ မုရီုကဵု ညးဍုၚ်ကွာန်တံရော၊ အရာတံဏံဂှ် နကဵုအလဵုအသဳကၟိန်ဍုၚ် NUG မုမိက်ဂွံကဵုကသပ်ရော၊ နကဵုတွဵုရးဂှ်လေဝ် သာ်လဵုသောၚ်ကလးတှ်ေ ခိုဟ်ရော ပရေၚ်ချပ်ဂၞန်သဳကၠဳလဝ်တံ နွံရ” သာ်ဝွံ သ္ဂးရ။

ကံၚ်ဇြဳပၞာန်ဂှ် ပ္ဍဲဗ္ဒါဲဍုၚ်မတ်မလီုဂှ် သွက်ဂွံသိုၚ်ခၞံ သၞေဟ်က္ၜၚ်ကျာ ကဆံၚ်ဂၠးတိကဵု သၞေဟ်က္ၜၚ်မွဲဂှ် ပ္ဍဲဂိတုဒဳဇြေမ်ဗာ(၁၀) သၞာံတုဲကၠုၚ်တေံဂှ် ဒက်ပ္တန်လဝ် ကမ္မတဳဗဟဵု ကောပ်ကာဲထ္မံက်ရုပ်ရဴ ကိုန်အစဳဇန် သဵုကဵုဝန်ဇၞော်ကၟိန်ဍုၚ်တံမပါလုပ်ရဂှ် လလောၚ်ပ္တိတ်လဝ်ရ။

သွက်ဂွံရေၚ်တၠုၚ်ကိုန်အစဳဇန်ဂှ် တၚ်နွံပၟိက်မ္ဂး ပရေၚ်သီဂိုၚ်တိတံ မပါလုပ် မရေၚ်သ္ဂောံဂွံပၟတ်ဓာတ်လလဳ၊ ပရေၚ်သိုၚ်ခၞံဂၠံၚ်တံ၊ သွက်သ္ဂောံဂွံ သြန်ဘဏ္ဍာ မရန်လဝ်တံ ကေုာံ ပရေၚ်ပ္ညဳပ္ညပ်ရေၚ်တၠုၚ် အရာနွံပၟိက်တၞဟ်ဟ်တံ သွက်ဂွံကၠောန်ဂှ် စၞောန်လဝ်တုဲ မဒှ်ရ။

ပရေၚ်သီဂိုၚ်တိဗ္ၚတံ မပါလုပ် လၟေၚ်ကမၠောန်ပေါဲရုဲမာဲတံကဵု ပရေၚ်ဝးပ္ကဝ်အခေါၚ်အရာမၞိဟ် ကံၚ်ဇြဳပၞာန်တံဂှ် ဗီုလဵုတာဒၞါ ဂွံခၠေဝ်ပလန်အာရောဟီုဂှ် လ္ပာ် MSICC ၜိုန်ရဟီုဂးထ္မံက်ပ္တိတ်လဝ် လၟေၚ်ကမၠောန် သောဲသောဲဗြဲဗြဲ ဟွံမွဲကီုလေဝ် ပံၚ်တောဲကၠောန်ၜိုတ်အာ ကဵုဂကောံဇြဟတ်တၞဟ်ဟ် နူအပ္ဍဲတွဵုရးဍုၚ်မန် မဟွံဒုၚ်တဲကဵု တၠအဝဵုပၞာန်တံရောၚ်ဂှ် သ္ဂးရ။

ကမ္မတဳ ပံၚ်ကောံ ရေၚ်တၠုၚ်ကေၚ်ကာ ဍုၚ်မန်ဂှ်ဝွံ ဒှ်ကမ္မတဳ ဒက်ပ္တန်လဝ် ဗွဲကြဴဒပ်ပၞာန်သီအဝဵု မွဲတုဲ အခိၚ်လၟုဟ်ဂှ် ဝန်ဇၞော် နူကဵု NUG ဂှ် (၃) တၠ၊ ညးစၞး နူကံၚ်ဇြဳကဵုကသပ်ဂၞန် ပရေၚ်ညဳသၟဟ်ဂကူ NUCC ဂှ် (၃) တၠ ပါလုပ်ဒၟံၚ်ရ။

ပရိုၚ်− သြၚ်လောန်တိုၚ်(မ်)