ပ္ဍဲတွဵုရးကရေၚ်ဍာဲ ကံၚ်ဇြဳပၞာန် ပွမဗ္တိုက် နကဵုဂၠံၚ်က္ၜၚ်ကျာတံဂှ် ကၠောန်ကၠုၚ်အဆက်က်

ဒဳမအ်သဵု၊ ဂျူလာၚ် (၉)

ပ္ဍဲတွဵုရးကရေၚ်ဍာဲ ပေါဲဗ္တိုက်ၜါလ္ပာ်တံ သ္ကာတ်မြဟ်ဒၟံၚ်ဂှ် ကံၚ်ဇြဳပၞာန်သီအဝဵုဂှ် စပ္တံနူဂိတုဂျူလာၚ် သတ္တာဟပထမတုဲ ပွမဗ္တိုက်ကဵု ဂၠံၚ်က္ၜၚ်ကျာတံ ကၠောန်ကၠုၚ်အဆက်က်ရဂှ် ညးမၞုံတာလျိုၚ် ဒပ်စဵုဒၞါကောန်ဂကူ ကရေၚ်ဍာဲ KNDF တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဗ္ဒိုပ် (သၚ်္ဘောပၚ်) ကံၚ်ဇြဳပၞာန် မၞုံဗ္ဒါဲကွာန်ဠဝ်ပိတ၊ ပွိုၚ်ဍုၚ်လွိုၚ်ကဝ်ဂှ် ဒပ်ပံၚ်ကောံ ဒပ်ပၞာန်ကရေၚ်ဍာဲ ( KA) ကဵု ဒပ်စဵုဒၞါကောန်ဂကူကရေၚ်ဍာဲ KNDF တံ အာစိုပ်ဗ္တိုက်လဝ်တုဲဂှ် လ္ပာ်ကံၚ်ဇြဳပၞာန် ကၠောန်ၜိုတ်ကၠုၚ် ပွမဗ္တိုက် နကဵုဂၠံၚ်က္ၜၚ်ကျာတံ အဆက်က်ရ။

ပ္ဍဲကဵုပေါဲဗ္တိုက် ဗ္ဒိုပ် (သၚ်္ဘောပၚ်) ဂှ် ဒပ်ကံၚ်ဇြဳပၞာန် နကဵုက္ၜၚ်ကျာ ဟလဳကိုပ်တာဂှ် (၁၁) အလန်၊ ကဵုက္ၜၚ်ကျာတိုက်ဂှ် (၉) အလန် အပံၚ်ဖအိုတ် (၂၀) အလန် ကၠုၚ်စိုပ်ဗ္တိုက်လဝ်ရ။

ပြဟ်ဟ်ဏံဂှ် ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ်တုဲ အကာဲအရာပြဟ်လလုဲဇီုကပိုက် သောဲသောဲဗြဲဗြဲဂှ် ဟွံဂွံတီကေတ်ဏီဂှ် ညးတာလျိုၚ် ဒပ်စဵုဒၞါကောန်ဂကူကရေၚ်ဍာဲ KNDF မွဲတၠ ဟီုရ။

ဆ္ဂး တုဲကၠုၚ် ပ္ဍဲဂိတုဂျူလာၚ် (၄) တေံ အပ္ဍဲကဵုပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲပွိုၚ်ဍုၚ်ဖေဝ်ခုၚ်ဂှ် ဒပ်ကံၚ်ဇြဳပၞာန် (၄၀) တၠ ချိုတ်လဝ်တုဲ ဒပ်ပံၚ်ကောံ စဵုဒၞါညးဒေသတံဂှ် (၁၁) တၠ ပြဟ်လလုဲအာလဝ်ရ။

ဂကောံဒပ်ပံၚ်ကောံ မဟာမိတ် ပရေၚ်စဵုဒၞါဒေသတံ ဟိုတ်နူဂ္စါန်ဒၟံၚ် သွက်ဂွံဗ္တိုက်သီကေတ် ဗ္ဒိုပ်ဖျေံသ္ဇိုၚ် ကံၚ်ဇြဳပၞာန် နူကဵုပွိုၚ်ဍုၚ်လွိုၚ်ကဝ် ကေုာံ ဖေဝ်ခုၚ် တွဵုရးကရေၚ်ဍာဲတံဂှ်ရ ပေါဲဗ္တိုက်ၜါလ္ပာ်တံ ဆက်သ္ကာတ်မြဟ်ဒၟံၚ်ရ။

အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ  ညံၚ်ဟွံဂွံဒးဗလးတဲ ကုဗ္ဒိုပ်ဍေံတံဂှ် ပွမသၠဲပ္တိုန်ဇြဟတ်ဒပ်ကဵု ပွမဗ္တိုက်နကဵု ဂၠံၚ်က္ၜၚ်ကျာတံဂှ် ကၠောန်ဒၟံၚ် အဆက်က်ရ။

ပရိုၚ်−သြၚ်လောန်တိုၚ်(မ်)