ဗွဲကြဴၜက်လုပ် နူကဵုဂၠံၚ်တရဴက္ၜၚ်ကျာတုဲ သၟိၚ်တၠအဝဵုသေံတံ ပံၚ်ပ္တိတ်လဝ်ကသပ်ကဵု ကၟိန်ဍုၚ်ဗၟာရောၚ် ညးချဳဒရာၚ်ကတိုၚ်ကၟဟ်တံ စောတ်စောဲလဝ်

ၜၚ်ကံက်၊ ဂျူလာၚ် (၉)

ပ္ဍဲဂိတုဂျောန် (၃၀) ဂှ် က္ၜၚ်ကျာ (jet) ဍုၚ်ဗၟာ လုပ်စိုပ်ၜက်ၜေတ်လဝ် အပ္ဍဲတိဍာ်သေံ မပိုၚ်ပြဳလဝ်ဂှ်တုဲ သၟိၚ်တၠအဝဵုသေံတံ ပံၚ်ကောံပ္တိတ်လဝ်ကသပ် နွံဟွံမွဲ သွက်ဂွံဂၠိုက်ဂၠါဲစၟဳစၟတ်ဂှ် ဂကောံချဳဒရာၚ်ကတိုၚ်ကၟဟ်တံ အာတ်မိက်လဝ် ကၠတ်ထဝ် ပ္ဍဲတ္ၚဲဗြဴဗ္တိဂှ်ရ။

နကဵုဂကောံဒဳမဝ်ကရေဇြဳ မွဲကရောံကဵု ဂကောံဇာဇၞိက်တၞောဝ်တၟိ နန်တဗူရဳဂှ် သွက်ဂွံဘပဠ ညးဍုၚ်ကွာန်ကရေၚ် မၞုံမွဲဒမြိပ်ပယျဵုတံဂှ် နကဵုတၚ်ရန်တၟံနွံနွံ အကြာသၞာဲဒဴသေံကဵု ဗၟာတံ ဒဒှ်မပံၚ်တောဲရေၚ်တၠုၚ် နွံဟွံမွဲ သွက်ဂွံတီဂှ် အာတ်မိက်လဝ် အမာတ်ကၠတ်ထဝ်ဂမၠိုၚ်ရ။

ပ္ဍဲဂိတုဂျောန် (၃၀) ဂှ် က္ၜၚ်ကျာကၟိန်ဍုၚ်ဗၟာ MiG-29 မွဲဖ္ဍိုက် တတ်ကၠောံ ခရိုၚ်ပါ် ဖအ်ဖရ မၞုံခရိုၚ်တာတ် (ခ်) တုဲ တတ်အာလဝ် တိဍာ်ကၟိန်ဍုၚ်သေံပိုၚ်ဂှ် ဂွံဆဵုကေတ်လဝ်တုဲ ယၚ်ပရောဒဒှ်ဝွံ သ္ကဵုညးဒေသ နူကဵုကွာန် မၞုံအပ္ဍဲခရိုၚ်ပါ် ဖအ်ဖရတံ လကိုတ်တ္ၚဵုလဝ်အိုတ်ရ။

အတိုၚ်သံသယ ဂကောံချဳဒရာၚ်ကတိုၚ်ကၟဟ် (၂) ဂကောံဂှ်မ္ဂး ပွမလုပ်စိုပ်ၜက်ၜေတ်ဏံဝွံ ရိုဟ်ကၞက်ခိုၚ်ဗိုန်ကၠုၚ် နူကဵု “ပွမပံၚ်တောဲချပ်ဇန် ပရေၚ်ဗ္တိုက်ဖလှေက် ဂကူမၞိဟ်” တံတုဲ ကၟိန်ဍုၚ်သေံ ပါလုပ်ဆက်စပ်မ္ဂး သ္ၚဳရံၚ် နဒဒှ်ရာဇဝတ်ပၞာန်မာန်ရောၚ်ဂှ် ညးတံ ဟီုရ။

ဒုသ္ကိုပ်ဗိုလ်ဇၞော် ဒပ်ပၞာန်ဨကရာဇ်သေံ အပဳချာတ်သူသာတ်ဂှ် ဒဒှ်ရတိုန်စိုပ်လဝ် ပေါဲသဳကၠဳ ကမ္မတဳပယျဵုဒၞက် မကၠောန်သ္ပလဝ် ပ္ဍဲဂိတုဂျောန် (၂၉) ပ္ဍဲဍုၚ်နေဗျဳဒဝ် ဍုၚ်ဇၞော်ကၟိန်ဍုၚ်ဗၟာဂှ် ကောန်ဂကောံဒဳမဝ်ကရေဇြဳကဵု ညးချဳဒရာၚ်ကတိုၚ်ကၟဟ်ပရေၚ်ဍုၚ်ကွာန် Somyot Pruksakasemsuk ဟီုလဝ်ရ။

“မုဒှ်ရော ညးမွဲမှ ဟွံဒှ်သံသယရပုဟ်ဟာ၊ ပြဝဏံဂှ် ကၟိန်ဍုၚ်တၠအဝဵုသေံ ကဵု ဗၟာတံ ဒဒှ်ရဘပဠကၠုၚ် အာဇြဳယာန်ကဵု ညးမသၟေဟ်တံမာန်ဂှ် ထ္ၜးဒၟံၚ်သောၚ်ၚ်ကၠးကၠးရ” သာ်ဝွံ ညးချဳဒရာၚ် ကတိုၚ်ကၟဟ် ပရေၚ်ဍုၚ်ကွာန်မွဲတၠ ရန်ကဵုဒဒှ်မတေက်ဒး ပွမလုပ်ၜက်ၜေတ်ဂှ်ကဵု လၟေၚ်တရဴ ဒုသ္ကိုပ်ဗိုလ်ဇၞော် ဂှ်တုဲ ဟီုဂးလဝ်ရ။

အမာတ်ကၠတ်ထဝ် ဗော် Move Forword ရာမ်ဇြဳမာန်ဂှ် ပရောဒဒှ်က္တဵုဒှ်ဒၟံၚ် ကၟိန်ဍုၚ်ဗၟာဂမၠိုၚ်ဝွံ ဟိုတ်နူဆက်စပ်ဒၟံၚ်ကဵု ညးမမံၚ်တန်တဴ ပ္ဍဲပယျဵုသီုၜါလ္ပာ်တံ ကြပ်ပ်ဂှ်ရ လ္တူကၟိန်ဍုၚ်သေံ ပွမဇီုကပိုက်ပရေံပရေံတံ နွံမာန်ရောၚ်ဂှ် သ္ဂးရ။

Ref: Bangkok Post