ထပ်ပပဵုပ္တိုန်အာယုက် အခိၚ်ကာလကာတၟေၚ်ဂှ်ဝွံ သွက်ဒပ်ပၞာန်ဗၟာ အဝဵုဂွံတန်ကြန်ရဒှ်

လ္ဂုၚ်၊ အဝ်ဂါတ် (၂)

ကံၚ်ဇြဳပၞာန်သီအဝဵု လလောၚ်တြး ဒဒှ်ရထပ်ပပဵုပ္တိုန်အာယုက် ကာလတၟေၚ်ဂှ်ဝွံ ဒှ်အရာမဂ္စါန်ဒၟံၚ် သွက်ဒပ်ပၞာန်ဗၟာ အဝဵုဂွံတန်ကြန်ဟေၚ်ရဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံ ကဵု သၟာပရေၚ်ဍုၚ်ကွာန်ဝှ်ကြံၚ်တံ ပါ်ပါဲလဝ်ရ။

ကံၚ်ဇြဳပၞာန် မပလှ်ဖျေံလဝ် အလဵုအသဳအရာပ် ညးဍုၚ်ကွာန်တံ မရုဲစှ်ကဵုလဝ်မာဲဂှ်တုဲ မသီကေတ်လဝ်အဝဵုကၟိန်ဍုၚ်ဂှ်ဝွံ ဒဒှ်ရထပ်ပပဵုပ္တိုန်အာယုက် ကာလကာတၟေၚ် (၆) ဂိတုပၠန်ဂှ် လလောၚ်ပ္တိတ်ကၠုၚ် ပ္ဍဲဂိတုဂျူလာၚ် (၃၁) တုဲကၠုၚ်တေံရ။

ကံၚ်ဇြဳပၞာန်ဂှ် ကော်ကောံဓရီု ကံၚ်ဇြဳပရေၚ်စဵုဒၞါကောန်ဂကူ ကေုာံ ပရေၚ်ဂီုကၠီုတုဲ ဗွဲဗဗွဲကဵု သၞောဝ်သ္ဇိုၚ်ဒက်ပ္တန် ၄၂၅ ဂှ် သွက်ဂွံထပ်ပပဵုပ္တိုန်အာယုက် ကာလကာတၟေၚ် (၆) ဂိတုပၠန်ဂှ် သ္ဂုတ်သွာတ်လဝ် ဗွဲမညဳသၟဟ်ရဂှ် လလောၚ်ပ္တိတ်လဝ်ရ။

ပွမပပဵုပ္တိုန်အာယုက် ကာလကာတၟေၚ်ဂှ်ဝွံ ပ္ဍဲသၞာံ ၂၀၂၃ ကၠုၚ်စိုပ်ဏံ ကၠောန်ဗဒှ်ပေါဲရုဲမာဲတုဲ သွက်ဂွံဒှ်အလဵုအသဳကောန်အရာပ် ကံၚ်ဇြဳပၞာန်တံ မနွံပၟိက်ဂှ် ဒဒှ်ရဂိုတ်ဂ္စါန်ဒၟံၚ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်တံ ပါ်ပါဲလဝ်ရ။

“ပ္ဍဲသၞာံ ၂၀၂၃ ဏံ နကဵုဍေံတံ ဗီုနွံပၟိက်ပလေဝ်ပလေတ် သၞောဝ်သ္ဇိုၚ်ဒက်ပ္တန် ၂၀၀၈ ဂှ် ဗွဲစၟတ်တုဲ ညံၚ်အလဵုအသဳအရာပ် ဍေံတံမၞုံပၟိက် ဂွံတိုန်ဂှ် ဒှ်သဘဴဂ္စါန်အာရဏောၚ်၊ နကဵုအလဵုအသဳအရာပ်ဂှ် ပ္ဍဲအခိၚ်ရုဲစှ် ဒၞါဲသမ္မတဂှ် ဒှ်မာန်အိုတ်ဂှ်တှ်ေ သ္ကိုပ်ပၞာန်ဇၞော် မေန်အံၚ်လှာၚ်ဝွံ မၞိဟ်ညးပတှ်ေဖျေံစိုတ်ဂွံ မွဲတၠဂှ် ပအပ်ကဵုဒပ်ပၞာန်ဂှ်တုဲ သွက်ဂွံအုပ်ဓုပ်အာကၟိန်ဍုၚ် နဒဒှ်သမ္မတဂှ် ရန်တၟံတုဲ စဳဇန်ဖန်ဗဒှ်ဒၟံၚ်ရ” ဂှ် ညးသ္ဂးရ။

အတိုၚ်တၚ်စၞောန်ပျး စပ်ကဵုအခိၚ်ကာတၟေၚ် သၞောဝ်သ္ဇိုၚ်ဒက်ပ္တန် ၂၀၀၈ ဂှ်မ္ဂး ကံၚ်ဇြဳပၞာန်ဝွံ အခိၚ်ကာတၟေၚ်ဂှ် ကေတ်မွဲသၞာံမာန်တုဲ နွံပၟိက်မ္ဂး အခေါၚ်ထပ်ပပဵုပ္တိုန်အာယုက် (၆) ဂိတု ၜါဝါနွံဂှ် ထ္မံက်ထ္ၜးလဝ်ရ။

ကံၚ်ဇြဳပၞာန် မပါဲပလီုထောံ သွဟ်ပေါဲရုဲမာဲ သၞာံ ၂၀၂၀ တုဲကၠုၚ်တေံတုဲ သီကေတ်လဝ်အဝဵုဂှ်ဝွံ ပွမထပ်ပဵုပ္တိုန်အာယုက် အလန်ဏံဂှ် ဒှ်အလန်လက္ကရဴအိုတ်တုဲ ကၠုၚ်စိုပ် သၞာံ ၂၀၂၃ ဂိတုဖေဖဝ်ဝါရဳ (၁) တေံမ္ဂး အာယုက်အိုတ်ရောၚ်။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာသာၚ်ကျဳဇြေန်သဵုဂှ် ပွမထပ်ပပဵုပ္တိုန် အာယုက် အခိၚ်ကာတၟေၚ်ဂှ်ဝွံ ပ္ဍဲပရေၚ်ဍုၚ်ကွာန်ဂှ် နကဵုဒပ်ပၞာန် ညံၚ်ဂွံထိၚ်အကာဲအရာ ဂွံပါလုပ်ဂွံဂှ် ကၠောန်ၜိုတ်ဒၟံၚ်ရောၚ် သ္ပလဝ်တၚ်စၟတ်ရ။

“အဓိကဂှ်တှ်ေ ကိစ္စ ကံၚ်ဇြဳပၞာန် မဂ္စါန်ဒၟံၚ်ဂှ် ညံၚ်အဝဵုဂွံတန်ကြန် ဗွဲတၟေၚ် ပ္ဍဲပရေၚ်ဍုၚ်ကွာန်ဂှ် အဝဵုအခေါၚ်သ္ဂုတ်သွာတ် ဒပ်ပၞာန်၊ ပ္ဍဲပရေၚ်ဍုၚ်ကွာန်ဂှ် နကဵုဒပ်ပၞာန် ညံၚ်ဂွံဒှ်အကာဲအရာ ဂွံပါလုပ်မာန် သွက်ဂွံထိၚ်ဒဝ်ဂှ် ဆန္ဒမၞုံဒၟံၚ်ရ၊ ဟိုတ်ဂှ်ရ အရာဍေံမကၠောန်ဂွံအိုဿီုဂှ် ကၠောန်အာဖအိုတ်ဏောၚ်” သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော်မေန်အံၚ်လှာၚ်ဂှ် သွက်ဂွံကၠောန်ဗဒှ် ပေါဲရုဲမာဲ အလုံကၟိန်ဍုၚ်ဂှ် နွံပၟိက်အခိၚ်ဂှ်ရ ဒးထပ်ပပဵုပ္တိုန်လဝ် အာယုက်ကာလကာတၟေၚ်ရောၚ်ဂှ် သ္ဂးလဝ်ရ။

ကဝ်မယှေန်ပေါဲရုဲမာဲ ကံၚ်ဇြဳပၞာန် မခါန်ကၞက်လဝ်ဂှ် ယဝ်ရရေၚ်တၠုၚ် တၚ်စၞောန်ပျးအခိၚ်ကာလကာတၟေၚ်တုဲမ္ဂး ကၠုၚ်စိုပ်သၞာံ ၂၀၂၃ ဏံ ကၠောန်ဗဒှ်ကဵုပေါဲရုဲမာဲ ဗၠးၜးဗဗွဲဓဝ်မွဲ နကဵုသၞောတ်သ္ပစၞး ခလပ်ဆ ( PR) ဂှ်ရောၚ် ရဴဝွံ ဟီုဂးကၠုၚ်လဝ် ပ္ဍဲပေါဲသောၚ်ကလးလိက်ပရိုၚ်တံလၟိုန်ရ။

ဒုဥက္ကဌ ဗော်ဒဳမဝ်ကရေဇြဳကောန်ဂကူ NLD ပွိုၚ်ဍုၚ်သာန်ချံၚ် ဥူဗိုဝ်ဝ်ဥူဂှ်ဝွံ နကဵုကံၚ်ဇြဳပၞာန် သွဟ်ပေါဲရုဲမာဲ ၂၀၂၀ ညးဍုၚ်ကွာန်တံ မကဵုလဝ်မာဲဂှ်ဟေၚ် ဒးသ္ပစၟတ်သမ္တီရောၚ်ဂှ် ဟီုရ။

“ ဂလာန်မဟီုဂးဒၟံၚ် ကၠောန်ဗဒှ်ပေါဲရုဲမာဲတၟိမွဲ သၟဝ်ကဝ်မယှေန်ပေါဲရုဲမာဲ ကံၚ်ဇြဳပၞာန် မခါန်ကၞက်လဝ်ဟီုဂှ် တုပ်တဴညံၚ်ရဴ မအရေဝ်ဂရိုၚ် သ္ဇက်ဒးဂရိုၚ်ခိုဟ်မွဲရ၊ ဣဏံဂှ် ဂဝဵုဂဝိုက်ဍုၚ်သ္အာၚ်တံသၟးဟွံက သီုကဵုဖ္ဍိုက်ဂရိုက်ဒၟံၚ် ညးဍုၚ်ကွာန်တံတုဲ ဂမြၚ်ညာန်အောန်လေဝ် ဒှ်တဴရ၊ သွဟ်ပေါဲရုဲမာဲ သၞာံ ၂၀၂၀ ညးဍုၚ်ကွာန်တံ မကဵုလဝ်မာဲဂှ်ဟေၚ် ဒးသ္ပစၟတ်သမ္တီရောၚ်ဂှ် အဲမိက်ဂွံဟီု ကုကံၚ်ဇြဳပၞာန်ရ” သာ်ဝွံ ညးဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အလုံမွဲကၟိန်ဍုၚ် ဂကောံရပ်လွဟ်ကောန်ဍုၚ်အရၚ်တံ မပါလုပ် ဂကောံပံၚ်တောဲ စဵုဒၞါညးဒေသတံ ကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်တံ အသိၚ်သ္ကာတ်မြဟ်ဒၟံၚ်တုဲ ပရေၚ်ပြုပြေၚ်ပၞာန်ဒမၠုက် အပ္ဍဲဍုၚ်တံလေဝ် က္တဵုဒှ်ဒၟံၚ် စေအ်အ်ရ။

ပ္ဍဲအကာဲအရာဏံဂှ် ကံၚ်ဇြဳပၞာန် စကာပေါဲရုဲမာဲ နဒဒှ်ပၞော်တိတ်တုဲ သောၚ်ကလးရောၚ်ဟီုမ္ဂး ပြသၞာပရေၚ်ဍုၚ်ကွာန်ဝွံ သ္ဂောံသာပရေံကၠုၚ်ရ နွံဂှ် ဥူဖေတာန် ညးမဒှ်သၟာပရေၚ်ဍုၚ်ကွာန်ဝှ်ကြံၚ် မွဲတၠ သ္ပလဝ်တၚ်စၟတ်ရ။

“ပေါဲရုဲမာဲ မကၠောန်ဗဒှ် ကဵုသၞောတ် PR ဂှ်ဝွံ ဒှ်ပေါဲရုဲမာဲ မကၠောန်သ္ပညံၚ်သၞောတ်တၠအဝဵု သာတုဲ ဂွံခိုၚ်ကၠိုက်ရ၊ သွဟ်ဍေံဂှ် သာ်ဏံရ ဒှ်တုဲ ယဝ်ရဆက်အာဒၟံၚ် အတိုၚ်ဏံရမ္ဂး ပရေၚ်ဍုၚ်ကွာန်ဂှ် ဟွံသောၚ်ကလး ဂၠံၚ်ဍာန်ပရေၚ်ဍုၚ်ကွာန်မွဲသာ် စကာပေါဲရုဲမာဲ နဒဒှ်ပၞော်တိတ်မွဲတုဲ ယဝ်ရတတ်ကၠောံအကြေပ်ဂြတ်ဏံမ္ဂး ပြသၞာာပရေၚ်ဍုၚ်ကွာန် အပ္ဍဲကၟိန်ဍုၚ်ဏံ ဆက်ဂွံအာ အတိုၚ်ဏံရဏောၚ်၊ သာတုဲ သ္ဂောံပရေံကၠုၚ်ရနွံ” သာ်ဝွံ ညးသ္ဂးရ။

အလဵုအသဳညဳသၟဟ်ဂကူ NUG ဂှ် နကဵုဗော်ပရေၚ်ဍုၚ်ကွာန်ဂမၠိုၚ် ပ္ဍဲပေါဲရုဲမာဲ သၞာံ ၂၀၂၃ မဒှ်ပၞော်တိတ်တၠအဝဵုတံဂှ် လ္ပပါလုပ်အိုတ်တုဲ သွက်ဂွံဒစဵုဒစး ပြဝမသကဵုလအ်လကၠေံ ပၠန်ဂတးညးဍုၚ်ကွာန်တံအိုတ်ဂှ် ဟီုဂးလဝ်ရ။

ပရိုၚ်−သြၚ်လောန်တိုၚ်(မ်)