မတ်မလီု၊ အဝ်ဂါတ် (၂)
ပ္ဍဲတွဵုရးဍုၚ်မန် ကသိုန်ဗ္ကေတ် မလုပ်ကၠုၚ် နူဌာန်ဇဳတံဝွံ မွဲပသာဂှ် စဵုကဵု (၂၀၀၀) ဒ္ကေဝ်ပြၚ် ၚုဟ်သၠုၚ်တိုန်ကၠုၚ် (၂) ဆရဂှ် ဒေၚ်သွံရာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဂျောန်ဂှ် မွဲပသာ နူကဵု ၜိုတ် (၉၀၀) ဒ္ကေဝ်ဓဝ် မၞုံကၠုၚ်ဂှ် ပပ္တံနူ ဂိတုဂျူလာၚ် သတ္တာဟလက္ကရဴအိုတ်ဂှ်တုဲ မွဲပသာ စဵုကဵု (၂၀၀၀) ဒ္ကေဝ်ပြၚ် ၚုဟ်သၠုၚ်တိုန်ကၠုၚ်ဣရ။
ၚုဟ်ကသိုန်ဗ္ကေတ်ဝွံ ဗွဲကြဴဒပ်ပၞာန်သီအဝဵုတုဲ မၞိဟ်တဵုလွဳအောန်စှ်ေကၠုၚ်ကီု၊ ကပေါတ်တမ်ရိုဟ် အရပ်စပ်ပရေၚ်တဵုလွဳတံ ကေုာံ ခရိတ်ပရေၚ်ပလံၚ်ဗစိုပ်တံ က္ဍၚ်ကၠုၚ်ဂှ်ရ ၚုဟ်နှေန်တိုန်ကၠုၚ်ရဂှ် ဒေၚ်သွံရာန်မွဲတၠ ဟီုရ။
“ၚုဟ်တိုန်အာဂှ်တှ်ေ သၞာံဏံဂှ် ဇြဟတ်တဵု အောန်စှ်ေအာကီု၊ သၟာဂူယာတံဂှ် သၞာံဏံ ဟွံတဵုစကွေံကွေံရပုဟ်၊ ၚုဟ်ဝါဲဓာတ်တံလေဝ် က္ဍၚ်ကၠုၚ်ကီု ဟိုတ်ဒၟါနူ ၝဏံတံရ၊ ခရိတ်ပလံၚ်ဗစိုပ်တံလေဝ် တိုန်၊ ၝတံဏံလေဝ်ပါရ၊ ဍေံတံဂှ် တိုန်ညိညိ၊ ကၠေၚ်ဓာတ်က္ဍၚ်တုဲ ခရိတ်ကွဳစက်တံလေဝ် ဗက်တိုန်အာအိုတ်ရ” ဂှ် သ္ဂးရ။
ဟိုတ်နူၚုဟ်ကသိုန်ဗ္ကေတ် သၠုၚ်တိုန်ကၠုၚ်ဂှ်ရ ပွမရာန်ပကောံပကေဝ်ဗီုကၠာတေံဂှ် စဵုကဵုဟွံမွဲ အောန်ကြဳဒၟံၚ်တုဲ ပရေၚ်သွံရာန် အပ္ဍဲဗွဝ်ဖျာတံလေဝ် ညိၚ်ဒၟံၚ်ဂှ် ညးသ္ဂးရ။
ကၠာတေံ အပ္ဍဲကၟိန်ဍုၚ် ၚုဟ်ကသိုန်ဗ္ကေတ်တိုန်မ္ဂး ကသိုတ်ဗ္ကေတ်ကြုက်တံဂှ် ပလံၚ်ပ္တိုန် သွံတြးကၠုၚ်လဝ်ကီုလေဝ် အခါလၟုဟ်ဂှ် ၚုဟ်နှေန်လှုဲကြုက် ယောန်ဂှ်လေဝ် သၠုၚ်တိုန်ဒၟံၚ်ဂှ်ရ ပရေၚ်ပၠောပ်ပ္တိုန် ကသိုန်ဗ္ကေတ်ကြုက်တံ ဟွံမွဲရပုဟ်ဂှ် ဒေၚ်သွံရာန်တံ သ္ဂးရ။
အတိုၚ်ဂလာန် ဒေၚ်သွံရာန်တံဂှ်မ္ဂး ဒၟါနူပေါဲဗ္တိုတက်ၜါလ္ပာ်တံတုဲ ပ္ဍဲဒေသသ္ကုတ်လဒေါဝ်ကၟိန်ဍုၚ်ဗၟာဂှ် ပွမတဵုလွဳကသိုန်ဗ္ကေတ်တံ စှ်ေကၠုၚ်တီတီတုဲ အပ္ဍဲဂိတုကၠုၚ်စိုပ်တံဂှ် ၚုဟ်မး ထပ်သၠုၚ်တိုန်ကၠုၚ်မာန်ရောၚ်ဂှ် သ္ဂးရ။
ပ္ဍဲတွဵုရးဍုၚ်မန်ဂှ် ကသိုန်ဗ္ကေတ်တံဂှ် ပၠောပ်ပ္တိုန်နၚ် နူပွိုၚ်ဍုၚ်မုၚ်ယဲ၊ သုက်ဖျူ၊ မလှိုၚ်၊ မျေတ်တာ၊ မိတ္ထဳလာ ကေုာံ မျေန်ချာန်တံ အဓိကရ။
ပရိုၚ်−သြၚ်လောန်တိုၚ်(မ်)
sanlontai