“ၜိုန်ရကံၚ်ဇြဳပၞာန်ဟီုဒၟံၚ်ထ္ပက်ကရောၚ်ပၞာန်ကီုလေဝ်။ ဍေံတအ်ကၠောန်ဒၟံၚ်ဂှ် ပ္တဝ်လဝ်ကဵုညးဍုၚ်ကွာန်တအ်ရလေဝ်။ ဂြာတ်ထောံဖျေံဗုမ်ကဵုက္ၜၚ်ကျာ။ ကဵုလွဟ်ဇၞော်လေဝ် ပေါဲဗတိုက်ဟၟဲမွဲသာ် သီုဗ္တံသီုတ္ၚဲ ဗက်ပန်ဒၟံၚ် ပ္ဍဲဒၞာဲညးဍုၚ်ကွာန်တအ် အောပ်မာဒၟံၚ်ဂှ်ရလေဝ်”
ပ္ဍဲဒေသမေဝ်ကနေဝ် ပွိုၚ်ဍုၚ်ဗြဝတဳ တိဍာ်ဗော်သွးကောန်ဂကူကရေၚ် KNU ဒပ်မဟာ(၆)ဂှ် သ္ပတမ်နူ ဂိတုဨဗြဴပထမသတ္တာဟတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ဒပ်ပံၚ်ကောံတအ် ပေါဲဗတိုက်သ္ကာတ်မြဟ်ဒၟံၚ်ကီု ပ္ဍဲပေါဲဗတိုက်ဂှ် မ္ၚးနူကံၚ်ဇြဳပၞာန် ဗတိုက်ကဵုက္ၜၚ်ကျာတုဲ ကၠောန်သ္ပကၠုၚ် ပရေၚ်ပန်ပှော်ကမ်လှောဝ်တောဲ အဆက်ဆက်ရ။ ဟိုတ်ဂှ်ရ အကာဲအရာလ္ပာ်ဒပ်ကံၚ်ဇြဳပၞာန် ချဳဒရာၚ်ကၠုၚ်ပရေၚ်ပၞာန် ပ္ဍဲတိဍာ် KNU သ္ကာတ်တ်မြဟ်ဟ်ကီု၊ ပရေၚ်သၟာဒဒိုက် ညးဒးထောံဌာန်ဒၟံၚ်တအ်ကီု။ ကောန်ဒပ်ကံၚ်ဇြဳပၞာန် ကၠုၚ်စိုပ်ဖျေံလဝ်လွဟ် ပ္ဍဲ KNU ကီု စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ပဒိုဝ်သဝ်တဝ်နဳ ညးမၞုံအခေါၚ်ဟီုဂး KNU ရ။
-ကိုပ်ကၠာအိုတ်ဏံ လ္ပာ်သၠုၚ်ကျာဍုၚ်ဗြဝတဳ ပ္ဍဲလ္ပာ်မေဝ်ကနေဝ် ကျောက်တောၚ် တိဍာ်ဒပ်မဟာ( ၆)ဂှ် ကံၚ်ဇြဳပၞာန် ကၠောန်ကၠုၚ်ပရေၚ်ထ္ပက်ပၞာန် ပ္ဍဲဗလးမုက်တိ၊ ပ္ဍဲဗလးကျာအဆက်ဆက် နွံကၠုၚ်ရ။ ပ္ဍဲလတူပရေၚ်ထ္ပက်ပၞာန်ဏံ သ္ၚဳဂၠိပ်ကဵုမွဲဝါညိ။ အကာဲအရာပၞာန် အခိၚ်လကြဴအိုတ်လၟုဟ်ဏံ ဗီုပြၚ်လဵု ဆက်နွံဒၟံၚ်ရော။
လ္ပာ်သၠုၚ်ကျာဍုၚ်ဗြဝတဳ အခိၚ်လၟုဟ်တှ်ေ လ္ပာ်မေဝ်ကနေဝ် တိဍာ်ဒပ်မဟာ (၆)ဟီုဂှ် ထ္ပက်ဒၟံၚ်ပၞာန်ဇၞော်ကဵုဇြဟတ်ရ။ ပ္ဍဲဗလးမုက်တိကီု၊ ဂြာတ်ထောံဖျေံဗုမ် ကဵုပၞာန်ကျာကီုဂှ် နွံရ။ ပိုဲကၠိုဟ်ကေတ်လဝ်ဂှ်တှ်ေ တိဍာ်ဍေံတအ်ဂှ် ဆောံလေၚ်အာယျ။ တိဍာ်ဍေံတအ် ဗီုပြၚ်လဵုလေဝ် ထိၚ်ဒဝ်ဟွံမာန်ရ။ ဗီုလဵုလေဝ် အုပ်ဓုပ်ဟွံဂှ်ပုဟ်ဟီုဂှ် မံက်ကၠးထေၚ်လဵုဒၟံၚ်ရ။ ဍေံတအ်ဒုၚ်တဲဟွံမာန်တုဲ ကလေၚ်ထ္ပက်လဝ်ပၞာန်ရ၊ အတိုၚ်အကာဲအရာလၟုဟ်တှ်ေ ဗီုလဵုပလေဝ် ဍေံတအ်ထိၚ်ဒဝ်ဟွံမာန်ရဟီုဂှ် သောၚ်ကၠးဒၟံၚ်ရ။
-ဟိုတ်နူကံၚ်ဇြဳပၞာန်ထ္ပက်ပၞာန်တုဲ ကောန်ဍုၚ်ကွာန်တအ် ဒးထောံဌာန်ဒၟံၚ်တုဲ ဒးဂြိပ်ဒဴဒၟံၚ်ရ။ သ္ၚိဌာန်ဗွဲမဂၠိုၚ်ဇီုကပိုက်ဒးလဝ်ရ။ လၟိဟ်မၞိဟ်ပါဲပၞာန် ထပ်ဂၠိုၚ်တိုန်ကၠုၚ်ရ။ ပ္ဍဲလ္တူကမၠောန်ဗီုဏံ မုမိက်ဂွံဟီုရော။ စပ်ကဵုပရေၚ်ပါဲဘဲပၞာန်တုဲနကဵု KNU ပရေၚ်ရီုဗၚ်ဆက်စၠောံ ဗီုပြၚ်လဵုနွံကီုရော။
ၜိုန်ရကံၚ်ဇြဳပၞာန်ဟီုဒၟံၚ် ထ္ပက်ပၞာန်ကီုလေဝ်။ ဍေံတအ်ကၠောန်ဒၟံၚ်ဂှ် ကမၠောန်ပ္တဝ်လဝ်ကဵုကောန်အရာပ်ညးဍုၚ်ကွာန်တအ်ရလေဝ်။ ဂြာတ်ထောံဖျေံဗုမ်ကဵုက္ၜၚ်ကျာဏောၚ်။ လွဟ်ဇၞော်တအ်လေဝ် ပေါဲဗတိုက်ဟၟဲမွဲသာ် သီုဗ္တံသီုတ္ၚဲ ဗက်ပန်ဒၟံၚ် ဒၞာဲညးဍုၚ်ကွာန်အောပ်မာဒၟံၚ်ဂှ်ရ။ ညးပါဲပၞာန်တအ် ဂၠိုၚ်တိုန်ကၠုၚ်ဒၟံၚ်ရလေဝ်။ ဍေံတအ်ကၠောန်ဒၟံၚ်ဂှ် ပါလုပ်ဒၟံၚ် ပ္ဍဲဂဗုတ်ရာဇဝတ်ပၞာန်ရ။ ဒုဟ်ဒဏ်ကလိလောန်ဒၟံၚ် ပ္ဍဲလ္တူညးဍုၚ်ကွာန်တအ်ဂှ် မွဲတုဲမွဲကလိလောန်ဒၟံၚ်ရလေဝ်။ ဍေံရုန်တိတ်ဟွံမာန်တုဲ ဒးထပ်ဂေတ်ဒၟံၚ် ပ္ဍဲဝဲခၞံၚ်ဏံတုဲတှ်ေ ဝေၚ်ဒၟံၚ်ဇာတ် ဟွံတၟေၚ်ဗီုဏံရ။ လ္ပာ်ပိုဲဂှ်တှ်ေ ဟိုတ်နူဒှ်ဒၟံၚ်ညးဍုၚ်ကွာန်တအ်ဂှ်ရ တၚ်နွံပၟိက်ကာတၟေၚ် ပရေၚ်စသုၚ်မံၚ်စံၚ်သွက်ညးတအ်ဂှ် ပိုဲပံၚ်တောဲကဵု ဂကောံညးအရာပ်တအ်တုဲ ဂၠာဲကဵုဒၟံၚ်ရ။ ပ္ဍဲတိဍာပိုဲဂှ် ကြဴနူဒပ်ပၞာန်သီအဝဵုတုဲ သ္ကုတ်လကြဴဏံ ပ္ဍဲသၞာံ ၂၀၂၃ ဂှ် ညးပါဲပၞာန်တအ် မသုန်ကိုတ်ပြၚ်အာတုဲယျ။
-ဃောတ္ၚဲကၠာတေံဂှ် ကောန်ဒပ်ကံၚ်ဇြဳပၞာန် လုပ်ကၠုၚ်ဖျေံလဝ်လွဟ် ပ္ဍဲခရိုၚ် ဘာပန် KNU နွံဒၟံၚ်ရ။ အကာဲအရာကောန်ဒပ်ကံၚ်ဇြဳပၞာန်တအ် လုပ်စိုပ်ဖျေံလွဟ် ဇရေၚ် KNU ဗီုလဵုနွံရော။ လၟိဟ်လၟိဟ်ဂှ် ချိၚ်ခယျကေတ်တှ်ေ ၜိုတ်ဂလိုၚ်လဵု နွံရော၊ ဗီုပြၚ်လဵု စွံပ္တန်လဝ်ရော။
ကောန်ဒပ်နူကဵုဒပ်ကံၚ်ဇြဳပၞာန် လုပ်ကၠုၚ်ဖျေံလွဟ်တအ်ဟီုဂှ် ဒှ်ကိစ္စဒှ်ကၠုၚ်ဒၟံၚ် အဆက်ဆက်ရလေဝ်။ ဍေံတအ်ဒုၚ်ဟွံမာန်ရပုဟ်။ အကာဲအရာဒပ် ပ္ဍဲဗလးမုက်တိ အကာဲအရာစိုတ်ဓာတ်ဂှ်တှ်ေ ချဳဓရာၚ်ဒၟံၚ်တုဲ စိုတ်ဗတိုက်ပၞာန်လေဝ် ဟၟဲရ။ ဇၟာပ်ပေါဲလေဝ် ချိုတ်လဝ် ကၠေံလဝ် ဂၠိုၚ်ဒၟံၚ်၊ ထ္ပက်ပၞာန်ဏောၚ်ဟီုဂှ် ဟီုရ ဍာံဍာံတေံ ဒှ်ပေါဲဗတိုက်တှ်ေ ဂြိပ်ထောံကီု စွံကပေါတ်တုဲ ဖျေံလွဟ်တုဲ ဂြိပ်ဒၟံၚ်ရ။ ဒၟာနူဂှ်ရ စိုတ်ဓာတ်စှ်ေတုဲ၊ အကာအရာဗလးမုက်တိလေဝ် ဟွံခိုဟ်ရပုဟ်။ ဂၠိုၚ်အိုတ်ဂှ်တှ်ေ သွက်ဂွံဒၞာကဵုဍေံတအ်ဂှ် ဂြာတ်ထောံဖျေံဗုမ်က္ၜၚ်ကျာရ ဂွံညာတ်ကေတ်ဒၟံၚ်။ မ္ၚးနူဏံတုဲ အကာဲအရာဍေံတအ် ဟွံခိုဟ်ပုဟ်ဟီုဂှ် ဓမံက်ထ္ၜးဒၟံၚ်ရ။ ဂွံဟီု လၟိဟ်ညးကၠုၚ်ဖျေံလဝ်လွဟ်ဂှ် ဝါတ်ဂါတ်ဒၟံၚ်ညိ။ ပိုဲဂှ်တှ်ေ နွံဒၟံၚ်ပ္ဍဲဒေသတၞဟ်ဟ်ဂှ်ရ မၞိဟ်ရပ်စပ်ဒၟံၚ်ကိစ္စဏံရ သာတီဂၠိုၚ်ဏောၚ်။