ဂကောံအခေါၚ်အရာမၞိဟ်ကရေၚ် KHRG ဂှ် ပ္ဍဲဂိတုဂျောန် စၟတ်တ္ၚဲ (၁၆) ဂှ် လလောၚ်တြးလဝ် လိက်ဒုၚ်စဳရေၚ် “မုဟိုတ်ဂွံပ္တဝ်လဝ်ကဵုပိုဲရော – ပွမဓမံက်ပ္တိတ် ဗီုပြၚ်ဒပ်ပၞာန်ဗၟာ ပ္ကီုပရာပ်ဒၟံၚ် ပ္တဝ်လဝ် လ္တူကောန်ကွာန် မၞုံလ္ပာ်ဒိုဟ်အဂၞဲဍုၚ်ဗၟာ” ဂှ်ရ။ ပ္ဍဲလိက်ဒုၚ်စဳရေၚ်ဂှ် ပရေၚ်ဒပ်ကံၚ်ဇြဳပၞာန် ပြိုက်ဂစိုတ်လဝ်၊ ဗတိုက်လဝ်ကဵုပၞာန်ကျာ၊ မပန်ပှော်ဖျေံလဝ် လွဟ်ဇၞော်၊ လွဟ်ဍောတ်ကြာန်န်၊ မရပ်ဒက်လဝ် ဗွဲအဓမ္မ၊ မပလီုပလာ်ပၠံၚ်ၜး ပရေၚ်ပိုၚ်ပြဳတအ်ကီု သီုပရေၚ်ဗတိုက်ပန် ပ္ဍဲလ္တူဂကောံဗွိုၚ်မၞိဟ် မၞုံဒေသဂှ် သီုတၚ်ရန်တၟံနွံနွံ က္တဵုဗဒှ်ကဵု ဖိုလ်အဆက်ပရေံပရေံရဂှ် KHRG ဟီုသ္ဂးလဝ်ရ။
ဟိုတ်ဂှ်ရ စပ်ကဵုအကာဲအရာဒးလလောၚ်တြးလဝ် လိက်ဒုၚ်စဳရေၚ်ကီု၊ ပရေၚ်ဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ်တုဲ ဗတိုက်ပန်ပှော်ကၠုၚ်ကီု၊ အကာဲအရာအာတ်မိက်လဝ် ဇရေၚ်အလဵုအသဳကၟိန်ဍုၚ်နာနာကီုတုဲ ဆက်စၠောံသၟာန်လဝ်ကဵု ညးတာလျိုၚ်စန္ဒက်ဆဝ်ပ္ၚုဟ် ဂကောံအခေါၚ်အရာမၞိဟ်ကရေၚ် (KHRG) သဝ်နန္ဒဇြူရ။
-ကိုပ်ကၠာအိုတ်ဏံ စပ်ကဵုဟိုတ်ဂွံလလောၚ်တြးလဝ် လိက်ဒုၚ်စဳရေၚ် “မုဟိုတ်ဂွံပ္တဝ်လဝ်ကဵုပိုဲရော” တုဲ ဟီုထ္ၜးကဵုညိ။
ပရောပရာလိက်ဒုၚ်စဳရေၚ်ပိုဲ အဓိကဂှ်တှ်ေ စၞောန်ထ္ၜးကဵုဒၟံၚ် ဒပ်ပၞာန်စွံလဝ်တၚ်ပ္တဝ် ဗတိုက်ဒၟံၚ်ဂှ်ရ။ အကြာပဋိပက္ခရပ်လွဟ်ဂှ် ပရေၚ်ဒဒှ်ကောန်အရာပ်ညးဍုၚ်ကွာန် ဒးဒှ်ဒၟံၚ်ချောဲပ္ဍဲသၠာတ်ဝါဂှ် ပိုဲစၞောန်ထ္ၜးလဝ် အဓိကရ။
-ဟိုတ်နူကံၚ်ဇြဳပၞာန် ပ္တဝ်လဝ်က္ဍိုပ်ကဵု ကောန်အရာပ်တုဲ ဗတိုက်ပန်ဒၟံၚ်တုဲ လ္တူဂကောံတွဳဗွိုၚ်မၞိဟ် ပ္ဍဲဒေသဂှ် ဖိုလ်အဆက်ပရေံရေံဂှ် မုရော။ ဟိုတ်နူပရေၚ်ဗတိုက်ပန်ပှော်တုဲ ဖိုလ်အဆက်ဗက်လကြဴ ပရေံပရေံဗီုလဵု ဒးဆဵုဂဗဒၟံၚ်ယျရော။
ဟိုတ်နူပ္တဝ်လဝ်ကဵုကောန်အရာပ်တုဲ ဗတိုက်ဒၟံၚ်ဂှ်ရ ပရေၚ်ဆောံလေၚ် အခေါၚ်အရာမၞိဟ်၊ ဒုဟ်ရာဇဝတ်ကလိလောန်လဝ် လ္တူဇာတ်မၞိဟ်၊ တအ်ဏံဂှ် နဒဒှ်အဆက်တောဲ က္တဵုဗဒှ်ကဵုဒၟံၚ်ရ။ ပရေၚ်ဗတိုက်ဒၟံၚ်ကောန်အရာပ်ညးဍုၚ်ကွာန် ဟၟဲကဵုဒုဟ်ဒဏ်တအ်ဂှ် နူကဵုပရေၚ်အုပ်ဓုပ် တၠအဝဵုပၞာန်အခိၚ်ကၠာတေံရ ကောန်အရာပ်ညးဍုၚ်ကွာန် နွံဒၟံၚ်သ္ကုတ်ဒိုဟ်အဂၞဲဍုၚ်ဗၟာတအ် ဒးဆဵုဂဗ ဇီုကပိုက်ဒၟံၚ်ရ။ အခိၚ်ပေါဲဗတိုက်ဒှ်ကၠုၚ်တှ်ေ ယဝ်ရဆဵုဒးကောန်ကွာန် ဗ္ဒာဲကွာန်ဂှ်တှ်ေ ပရေၚ်ရပ်ဒက် ဟွံဗဗွဲဓဝ်၊ ပရေၚ်ပျဲပျာံဍဵုဍိုက် ပရေၚ်ဒးဒုၚ်ပြိုက်ဂစိုတ်လဝ် နွံကၠုၚ်ဒၟံၚ် ပရေၚ်ဒးဒုၚ်စံၚ်ပလီုလဝ် သီုအလုံမွဲကွာန် နွံရ။ ပ္ဍဲအခိၚ်လကြဴနူပရေၚ်သီအဝဵု သၞာံ ၂၀၂၁ တုဲဂှ်လေဝ် အရာဗီုတအ်ဏံ ဆက်ဒှ်ဒၟံၚ်ရ။ အကြာပေါဲဗတိုက်ရပ်လွဟ်တအ်ဂှ် ကောန်အရာပ်ညးဍုၚ်ကွာန်တအ် ဒးဒှ်ဒၟံၚ် ချောဲပ္ဍဲသၠာတ်ဝါရ။
ဒးဒုၚ်ဂစိုတ်လဝ်ဟွံဗဗွဲဓဝ်။ ပါဲနူဂှ်ပၠန် ဟိုတ်နူကဵုကံၚ်ဇြဳပၞာန် ပန်ဖျေံလွဟ်ဇၞော်ကြာန်န်တုဲ ဗီုကဵု သ္ၚိဌာန်ကောန်အရာပ်ညးဍုၚ်ကွာန်တအ် ဒးလီုလာ်လဝ်ကီု ကောန်အရာပ်ညးဍုၚ်ကွာန်တအ် ဇီုကပိုက် ဒးချိုတ်လဝ်ရ။ တိရစ္ဆာန်လွဳလဝ် ပ္ဍဲသ္ၚိညးတအ် စမြိုၚ်တအ်လေဝ် ဇီုကပိုက် ဒးလီုလာ်လဝ်ရ။ ပရေံအိုတ်ဂှ် ကံၚ်ဇြဳပၞာန် ပန်ဗတိုက်ကဵုက္ၜက်ကျာရ။ ပရေၚ်ပန်ဗတိုက်ကဵုက္ၜၚ်ကျာဂှ် သ္ၚိဌာန်ဗွဲမဂၠိုၚ် ဒးလီုလာ်ခရိုဟ်လီုလဝ်ကီု၊ စမြိုၚ်ပရေၚ်ဘာသာတအ်၊ ဘာဗ္တောန်လိက်တအ်၊ ဗဒမ်ဂဥုဲ ရုၚ်ဂဥုဲတအ်လေဝ် ဒးခရိုဟ်လီုအာအိုတ်ရ။ ယဝ်ရံၚ်အာတှ်ေ သက်က်ရ ပ္တဝ်လဝ်ကဵုကောန်အရာပ် ညးဍုၚ်ကွာန် မုဟွံဆေၚ်ဆက်တအ်တုဲ ဗတိုက်ဒၟံၚ်ရ။ ပရေၚ်ဗတိုက် အကြာဂကောံရပ်လွဟ်မွဲဂကောံကဵု မွဲဂကောံဟွံသေၚ်ပုဟ်။ တၚ်ကၠောန်သ္ပ ဗီုဏံဂှ် ဒှ်ဖံက်ပ္ကဝ်ဒၟံၚ်တၚ်ဗ္စာရဏာပရေၚ်မၞိဟ် ကၟိန်ဍုၚ်နာနာလေဝ်ဒှ်တုဲ ဒုဟ်ရာဇဝတ်ပၞာန်လေဝ်ဒှ်ရ။
-စပ်ကဵုအကာဲအရာက္တဵုဒှ်ဒၟံၚ် သ္ကုတ်ဒိုဟ်အဂၞဲကၟိန်ဍုၚ်ဗၟာတုဲ မုမိက်ဂွံအာတ်မိက် အလဵုကၟိန်ဍုၚ်နာနာကဵု ဂကောံနာနာတအ်မုရော။
ကံၚ်ဇြဳပၞာန် ပ္တဝ်လဝ်ကဵုကောန်အရာပ်တုဲ ဗတိုက်ပန်ပှ်ောကၠုၚ်ဂှ် မုအာတ်မိက်လဝ် အာဇြဳယာန် အဓိကရောတှ်ေ သွက်ဂွံပြံၚ်သၠာဲပလေဝ်ပလေဝ် တၚ်သ္ဂုတ်သွာတ်မသုန်တၚ် ဆေၚ်စပ်ကဵုပရေၚ်ကဵုအရီုဗၚ် ဗ္စာရဏာပရေၚ်မၞိဟ်ဂှ် စွံအဓိကတုဲ ပိုဲဒှ်အာတ်မိက်လဝ်ရ။ အခိၚ်လၟုဟ်တှ်ေ ပ္ဍဲတွဵုရးကရေၚ်ဂှ်တှ်ေ ညးဒေသ ၜိုတ်တြဴကိုတ်ပြၚ် ဒးဂြိပ်ဒဴပါဲဓလေတ်ဒၟံၚ်ရ။ လၟိဟ်မၞိဟ်ဒးဂြိပ်ဒဴပါဲဓလေတ်ဒၟံၚ်ဂှ်တှ်ေ နွံဒၟံၚ်ပၟိက်ကဵု အရီုဗၚ်ထံက်ပၚ် ဗ္စာရဏာပရေၚ်မၞိဟ်အရိုဟ်ဒဒှ်တ္ၚဲရ။ နကဵုအာဇြဳယာန်ဂှ် ညံၚ်ဂွံစိုပ်ဇရေၚ်ညးဍုၚ်ကွာန် နွံဒၟံၚ်ပၟိက်အရီုဗၚ်ဂှ် သွက်ဂွံပံၚ်တောဲကဵု ဂကောံရီုဗၚ်ကဵုဒၟံၚ် အရီုအဗၚ်ဗ္စာရဏာပရေၚ်မၞိဟ် ပ္ဍဲဗလးမုက်တိ ဇေတ်ဇေတ်လအ်ကဵုဗွဝ်ကၠံသၞာံတအ်ဂှ် ပိုဲအာတ်မိက်လဝ်ရ။ နူကဵုစကစမွဲကဆံၚ် ယဝ်ရညးတအ်ပံၚ်တောဲရေၚ်တၠုၚ်အာဏောၚ်တှ်ေ စိုပ်ဇရေၚ်ညးဍုၚ်ကွာန် နွံဒၟံၚ်ပၟိက်ကဵုအရီုဗၚ်တအ်ဟွံသေၚ်တုဲ ကံၚ်ဇြဳပၞာန်ဂှ် ဒှ်ဟိုတ်အဓိက က္တဵုဗဒှ်ဒၟံၚ် ပရေၚ်ကြေပ်ဂြတ် အရီုဗၚ်ဗ္စာရဏာပရေၚ်မၞိဟ် အဓိက်ဂှ် ပိုဲဗတိုက်ဖ္အောဝ်ဒၟံၚ်လၟိုန်ရ။
-အလန်လကြဴအိုတ်ဏံ ပ္ဍဲလ္တူလိက်ဒုၚ်စဳရေၚ်ဏံ မုမိက်ဂွံထပ်ဟီုဗပေၚ်နွံရော။
သွက်ကောန်အရာပ်ညးဍုၚ်ကွာန် ဒးဆဵုဂဗဒၟံၚ်ကဵု သၟဝ်ပရေၚ်အုပ်ဓုပ် ပျဲပျာဲဟွံဗဗွဲဓဝ် ကဵုတၠအဝဵုပၞာန် ခေတ်အဆက်က်ဂှ် ညံၚ်ဂွံက္လိဂွံပရေၚ်ဗဗွဲဓဝ်ဂှ် ပ္ဍဲလ္တူဒုဟ်ရာဇဝတ်ပၞာန် ကံၚ်ဇြဳပၞာန်ကလိလောန်လဝ် ဒုဟ်ရာဇဝတ်ကလိလောန်လဝ် လ္တူဇာတ်မၞိဟ်ကဵု ပရေၚ်ဖံက်ပ္ကဝ်လဝ် သၞောဝ်ဥပဒေဗ္စာရဏာပရေၚ်မၞိဟ် ကၟိန်ဍုၚ်နာနာ သၞာံ ၂၀၂၁ ဂှ် ညံၚ်ပရေၚ်ကေတ်လျိုၚ် ပရေၚ်ဒုၚ်လျိုၚ်ဂွံနွံကၠုၚ် သွက်ညးဆေၚ်စပ်တအ် ဂွံကဵုဇြဟတ်ဓရိုဟ်မာန် သွက်ဂွံကေတ်ကဵုအရေဝ် နူကဵုနဲကဲဂၠံၚ်ဍာန်ဒှ်မာန်ဂှ် ပိုဲအာတ်မိက်လဝ်ဂှ်နွံရ။
ပ္ဍဲလ္တူပရေၚ်ဖံက်ပ္ကဝ်ဇၞော်ဇၞော်၊ လ္တူညးကလိလောန်လဝ် ဒုဟ်ရာဇဝတ်တအ်ဂှ် ညံၚ်ဂွံရေၚ်တၠုၚ် ကေတ်ကဵုအရေဝ်ဂွံနွံကၠုၚ် ညံၚ်ပရေၚ်ကေတ်လျိုၚ် ပရေၚ်ဒုၚ်လျိုၚ်ဂွံနွံကီု သွက်ဂွံဖအိုတ်သ္အးထောံ အခေါၚ်တိတ်ဗၠးနူဒုဟ်ဒဏ်ဂှ် နူကၟိန်ဍုၚ်နာနာ သွက်ဂွံကၠောန်ရေၚ်တၠုၚ်ကဵု ဗွဲမပြဟ်ဒေါံဟွံဂွံဂှ် နူကဵုအခန်ကဏ္ဍပရေၚ်စဳရေၚ်သၞောဝ်ဓဝ် ပိုဲအာတ်မိက်ဒၟံၚ် ဗွဲလၟေၚ်နွံရ။ နကဵုညးဍုၚ်ကွာန်ဇီုကပိုက် ဒးဂိလဝ်တအ် ညံၚ်အခေါၚ်ဒုၚ်စသိုၚ် ဗဗွဲကဵုဓဝ်ဂွံနွံကၠုၚ် နကဵုနဲကဲဂၠံၚ်ဍာန်ဒှ်မာန်ဂှ် သွက်ဂွံဘိုၚ်ပူဗိုၚ်ရေၚ်တၠုၚ်ကဵု ပိုဲအာတ်မိက်လဝ်ရ။