ဒပ်စဵုဒၞာညးဍုၚ်ကွာန် PDF အလုံမွဲကၟိန်ဍုၚ်ဂှ် ဆေၚ်မုက်ဗတိုက်ကဵု ကောန်ပၞာန်ရပ်လွဟ်တအ် ဟွံသေၚ်တုဲ ပြိုက်ဂစိုတ်ဒၟံၚ် ကောန်အရာပ် ညးဍုၚ်ကွာန်၊ ခမဳသၚ် ညးယိုက်ဝန်ကၟိန်ဍုၚ်တအ်ရ ဂးတုဲ ဌာနဝန်ဇၞော်ပရေၚ်ဍုၚ်သ္အာၚ် ကံၚ်ဇြဳပၞာန် ဝန်ဇၞော်ကၟိန်ဍုၚ် ဥူတာန်သွေ ဟီုစောတ်စောဲလဝ်ရ။
အတိုၚ်ညးတာလျိုၚ် အလဵုအသဳသေံပၠလဝ်တရဴဂှ် ဂိတုဂျောန် စၟတ်တ္ၚဲ (၁၉) တုဲကၠုၚ်ဏံ ပ္ဍဲပေါဲသဳကၠဳပရေၚ်ကၟိန်ဍုၚ်ဗၟာ ဗွဲပလး ကၠောန်ဗဒှ်လဝ် ပ္ဍဲဍုၚ်ပတ္ထရာ၊ ဍုၚ်သေံဂှ် ဝန်ဇၞော်ကၟိန်ဍုၚ် ဥူတာန်သွေ၊ ဌာနဝန်ဇၞော်ပရေၚ်ဍုၚ်သ္အာၚ်ကံၚ်ဇြဳပၞာန် စောတ်စောဲ ဟီုသ္ဂးလဝ်ရ။ ဟိုတ်ဂှ်ရ လ္တူကံၚ်ဇြဳပၞာန် ဟီုဂးစောတ်စောဲလဝ်ဂှ် ဗီုပြၚ်လဵု ဒပ်စဵုဒၞာညးဍုၚ်ကွာန်တအ် ဟီုပလန်လဝ်တဲရော။ ပြသၞာပဋိပက္ခရပ်လွဟ် က္တဵုဒှ်ဒၟံၚ် ပ္ဍဲကၟိန်ဍုၚ်ကီု သီုကဵုတၚ်ကံၚ်ဇြဳပၞာန် ကၠောန်ရေၚ်တၠုၚ်လဝ်တအ် စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ညးတာလျိုၚ် PDF ခရိုၚ်သဓီု ကိုဝ်အေမေန်ထောန်ရ။
-ကိုပ်ကၠာအိုတ်ဏံ EAO လ္ၚဵုတအ်ဂှ် ကဵုတန်ဗ္တောန်သၟတ်လ္ၚဵုတအ် နဒဒှ် PDF ဗ္ဂပ်ကဵုလွဟ်တုဲ ညံၚ်ဂွံဒှ်ပရေၚ်ပန်ဗတိုက် ပ္ဍဲဒေသ ဖန်ဗဒှ်လဝ်ရ ဟီုစောတ်စောဲဒၟံၚ် ဂွံညာတ်ကေတ်ရ။ လ္တူဏံ ဗီုလဵုညာတ်ကေတ်ရော။
PDF ပိုဲဂှ် EAO တအ် ကဵုလဝ်ဘာတန်ဗ္တောန်ဂှ် ဍာံဒၟံၚ်ရ။ ဆ္ဂးဂှ် ပိုဲဂှ် ဟိုတ်နူယဲဂိုဝ်ဝေတ်တုဲ ဗ္တောန်ကဵုသၟတ်တအ် ဇီုကပိုက်ဒးစိုတ်ဓာတ် လောဲဒၟံၚ်တအ် တန်ဗ္တောန် နဒဒှ် PDF ဂှ် ဗၠေတ်မံၚ်ပေၚ်ၚ်ရ။ ကၠောန်ဒၟံၚ်ကဵု တၚ်ဒုၚ်စသိုၚ်ပိုဲကဵု တၚ်ဒုၚ်စသိုၚ်သၟတ်တအ်ဏောၚ်။ ဟွံဒးစိုတ် ဒပ်ပၞာန်သီအဝဵုတုဲ ပိုဲထ္ၜးလဝ်ဆန္ဒ ၜိုဟ်ဟ်သြိုဟ်ဟ်ရ။ ထ္ၜးဒၟံၚ်ဆန္ဒ ၜိုဟ်ဟ်သြိုဟ်ဟ်ဂှ် ကံၚ်ဇြဳပၞာန် ကၠုၚ်ဗတိုက် သရိုဟ်လဝ် ကဵုလွဟ်တုဲ သၟတ်ဗွဲမဂၠိုၚ် ဒးချိုတ်လဝ်ရ။ ဒဵုကဵုဒးပၠန်ဂတးကၠုၚ်ကဵုကံၚ်ဇြဳပၞာန် ကဵုလွဟ်လက်နက် ဒှ်အာရ။
-ကၟိန်ဍုၚ်ၜိုဟ်သြိုဟ်ဒၟံၚ် ဗ္ဒာဲ ၅၀ သၞာံပြၚ်ဂှ် ဟိုတ်နူပရေၚ်ပန်ဗတိုက်ရပ်လွဟ်တုဲ ဟွံၜိုဟ်သြိုဟ်ရပုဟ် လ္တူကံၚ်ဇြဳပၞာန်ဟီုသ္ဂးလဝ်ဗီုဏံ မုမိက်ဂွံဟီု နွံရော။
အပံၚ်သၞာံ ဗ္ဒာဲ ၅၀ သၞာံၜိုဟ်သြိုဟ်မံၚ် ဟီုလဝ်ရ။ ဣဏံဂှ်လေဝ် ယဝ်ရဍေံတအ် ဟွံသီအဝဵုတှ်ေ အရာဏံ ဂွံထပ်ဒှ်ကၠုၚ်ပၠန်ဂှ် ဟၟဲပုဟ်လေဝ်။ ဘာသာဍေံတအ် ပအပ်ထောံအဝဵုကဵု ဗော်ဇၞးမာဲဂှ်တှ်ေ ဂွံမံၚ်ရ။ ဗော်ဇၞးမာဲဂှ် ဆက်အုပ်ဓုပ်အာတှ်ေ တုဲဒၟံၚ်ရ။ ပြဒ္ဒညာတအ်ဏံ မုလေဝ် ဒှ်ကၠုၚ်ဟွံသေၚ်ပုဟ်။ PDF ဟီုဂှ် ဍေံတအ်ရ ဖန်ဗဒှ်လဝ်။ ညံၚ် PDF ဂွံဒှ်ကၠုၚ် ဘာသာဍေံတအ်ရ ဖန်ဗဒှ်ကဵုလဝ်။ ကံၚ်ဇြဳပၞာန်ရ ဖန်ဗဒှ်ကဵုလဝ်ရ။
-PDF တအ်ဂှ် ဆေၚ်မုက်ဗတိုက်ကဵုကောန်ပၞာန်ရပ်လွဟ်တအ်ဟွံသေၚ်တုဲ ပြိုက်ဂစိုတ်ဒၟံၚ် ကောန် အရာပ်ညးဍုၚ်ကွာန်၊ ခမဳသၚ် ညးယိုက်ဝန်ကၟိန်ဍုၚ် ဟၟဲကဵုလွဟ်ရဂှ် ဝန်ဇၞော်ပရေၚ် ဍုၚ်သ္အာၚ် ကံၚ်ဇြဳပၞာန် စောတ်စောဲလဝ်ရ။ လ္တူဏံ ဗီုလဵု မိက်ဂွံကလေၚ်ဟီုရော။
PDF ပိုဲတအ် ဗတိုက်မံၚ်ဂှ်တှ်ေ သောၚ်မံၚ်ရလေဝ်။ ဟွံဒးစိုတ် ပရေၚ်သီအဝဵုတုဲ ဗတိုက်ဒၟံၚ်။ ညးသီလဝ်အဝဵုဂှ်ညးဂှ်ရော ကံၚ်ဇြဳပၞာန်လေဝ်။ ကံၚ်ဇြဳပၞာန်ရ ပိုဲစွံလဝ်တၚ်ပ္တဝ်တုဲ ဗတိုက်ဒၟံၚ်ရ။ ဗတိုက်ဒၟံၚ်ကောန်အရာပ်ညးဍုၚ်ကွာန်ဟၟဲကဵုဒုဟ်ဒဏ်ဂှ် ပိုဲဟွံဂွံဗတိုက်လဝ် လးလးရ။ ပြိုက်ဂစိုတ်ဒၟံၚ်ခမဳသၚ် ညးယိုက်ဝန်ကၟိန်ဍုၚ်ဂှ်လေဝ် ဟၟဲလးလးရ။ ညးနွံလ္ပာ်ကံၚ်ဇြဳပၞာန် ညးထံက်ပၚ် ထ္ၜလဘာ်ဒၟံၚ် ကံၚ်ဇြဳပၞာန် ညးနွံဒၟံၚ်လ္ပာ်ကံၚ်ဇြဳပၞာန်တအ်ဂှ်ရ ပိုဲဗတိုက်ဒၟံၚ်။
-တုဲပၠန် နကဵုဒပ်ပၞာန်ဍေံတအ် သွက်ဂွံဗတိုက်သရိုဟ် ညးရပ်လွဟ်သာမညဂှ် လောဲဒၟံၚ်ရ။ ဆ္ဂး ဟိုတ်နူဂွိၚ်ဖေက် ကောန်အရာပ်ညးဍုၚ်ကွာန်တအ် ဇီုကပိုက် ဖေက်ဒးချိုတ်တုဲ ကၠောန်သ္ပရေၚ်တၠုၚ် ဒၟံၚ်ထိၚ်ထိၚ်ဒဝ်ဝ်ရဂှ် ဟီုလဝ်ရ။ လ္တူဏံ ဗီုလဵုမိက်ဂွံဟီုရော။
နကဵုဍေံတအ် ဗတိုက်သရိုဟ် ဂကောံရပ်လွဟ်သာမည လောဲဒၟံၚ်ဏောၚ်ဟီုဂှ် မးမးရ။ မၞိဟ်လီဠာန်ရ။ ပိုဲဂှ် ဂကောံရပ်လွဟ် သာမည ဟွံသေၚ်ပုဟ်။ သၟတ်အခေတ်လၟုဟ်ဏံ မုလေဝ် သာမည ဟွံသေၚ်ရပုဟ်။ အစောန်စရာဲဍာ်ဒ္ကေဝ် နွံနူကဵုဍေံတအ်ဏီ။ နဲကဲကွတ်ပညာ တဴတက် နူကဵုဍေံတအ်ဏီ။ ဒုၚ်တဲဍေံတအ်သီအဝဵုဟွံမာန်တုဲ ဗတိုက်ဒၟံၚ်ရနွံ။ ဗတိုက်ဒၟံၚ်ကောန်အရာပ် တအ်ဂှ်လေဝ် ဍေံတအ်ရ ဗတိုက်ဒၟံၚ်။ ဗတိုက်ဒၟံၚ် ကောန်အရာပ်တအ်သၟးရ။ ပန်ကဵုလွဟ်ဇၞော်၊ ပန်ဖျေံ ပ္ဍဲကွာန်၊ ကောန်ကွာန် တအ်ဒးချိုတ်။ ဂွံကၠုၚ်ဘဲဝပ်၊ တိရစ္ဆာန်တအ်ချိုတ်လဝ်။ ကွာန်တအ် လီုလာ်လဝ်ရ။ သီုဖအိုတ်ဂှ် ကံၚ်ဇြဳပၞာန်ရ ကၠောန်ဒၟံၚ်လေဝ်။ ဂကောံဇြဟတ်ပၠန်ဂတးပိုဲ PDF လဵုလေဝ် ကၠောန် ဟွံသေၚ်ပုဟ်။ ဣဏံဂှ် ပ္ဍဲဗလးမုက်တိ နတဲရ။ ပ္ဍဲပိုဲဂှ် စၟတ်သမ္တီလေဝ် နွံဒၟံၚ်။ တအ်ဏံဂှ် စိုပ်မွဲအခိၚ်မ္ဂး ပိုဲသီုညးဖအိုတ် ဒးကလေၚ်သောၚ်ပၠန်ဏောၚ်။ ပ္ဍဲကဵုကွာန်တအ်ဏံဟီုဂှ်တှ်ေ ပိုဲလုပ်ဗတိုက်ရ။ ဇီုကပိုက်ဒးဍေံတအ်ဗက် ပန်ဖျေံနၚ်လွဟ်ဇၞော် ပ္ဍဲကွာန်ဂှ်ရ။ ဍေံတအ်လေဝ် ကညာၚ်ကရေဲနၚ်ရ။ ၝတအ်ပန်ပိုဲ၊ ဒးပိုဲတှ်ေ ကလေၚ်ပန်ဏာကဵုလွဟ်ဇၞော်ဏောၚ်။ ဗီုဏံ ဍေံတအ်က္ညာၚ်ဒၟံၚ် တွဵုရ။ တအ်ဏံဂှ် ပိုဲဂွံဆဵုဒၟံၚ်ဂတမတ်ရ ပ္ဍဲဗလးမုက်တိဂှ်။ ပ္ဍဲဗလးမုက်တိဂှ် ၝသတ္တိဟၟဲတအ်ဏံ။ လကြဴအိုတ်ဏံ ပန်ဖျေံပ္ဍဲကဵုကွာန်။ ကောန်ကွာန်တအ်ရ ဇီုကပိုက်ဒးလဝ်ရ။
-အလန်လကြဴအိုတ်ဏံ ပ္ဍဲလ္တူတၚ်ကံၚ်ဇြဳပၞာန်ဟီုဂးလဝ်ဂှ် မုမိက်ဂွံထပ်ဟီုဗပေၚ် နွံရော။
နူကဵုကံၚ်ဇြဳပၞာန် ယဝ်ရကဵုထောံအခေါၚ်ဗော်ဇၞးမာဲဂှ် အုပ်ဓုပ် ဟွံသီကေတ်အဝဵုဏောၚ်တှ်ေ ပြသၞာတအ်ဏံဂွံဒှ်ကၠုၚ် မုဟၟဲပုဟ်။ PDF တအ်ဟီုဂှ်လေဝ် ဂွံမံက်တိတ်ကၠုၚ် ဟၟဲပုဟ်။ ၜိုဟ်ဟ်သြိုဟ်ဟ် သွက်ဂွံတဴတက်တိုန် လ္တူနူဏံရ နွံဏောၚ်။ ပ္ဍဲအခိၚ်အလဵုအသဳညးဍုၚ်ကွာန်အုပ်ဓုပ်လဝ် ပွိုၚ် (၅)သၞာံဂှ် တော်ကဵုဍေံတအ် အုပ်ဓုပ်လဝ် ပွိုၚ် (၅၀)၊ (၆၀)သၞာံဂှ်တှ်ေ တဴတက်ဒၟံၚ်ဂှ် ဆဵုကေတ်မံၚ် နမတ်ရလေဝ်။ သၟတ်တအ်ဂှ် ဆၜိုတ်ဂွံစေပ်ရံၚ် ရှ်သာဒဳမဝ်ကရေဇြဳဂှ် ဒပ်ပၞာန်သီကေတ်ထောံအဝဵုဂှ်ရ ဒုၚ်ဟွံမာန်ဒှ်တိုန်တုဲ သၟတ်တအ်သီုဖအိုတ် ထ္ၜးကၠုၚ်ဆန္ဒ ၜိုဟ်ဟ်သြိုဟ်ဟ်ရ။ ထ္ၜးဆန္ဒဟွံဂွံဂှ်ရတှ်ေ လကြဴအိုတ်ဏံ ဒးပၠန်ဂတးရလေဝ်။ သွက်ဂွံဗတိုက်သရိုဟ်ဗပိုတ်ထောံ ရိုဟ်ကၞက်ဍေံတအ်။