ပေါဲကောံဓရီုဂကောံတၠပညာဂဥုဲကၟိန်ဍုၚ်ဗၟာ မရနုက်ကဵု (၁၁)ဝါဂှ် ကၠောန်ဗဒှ်လဝ် ပ္ဍဲဂိတုဂျောန် စၟတ်တ္ၚဲ (၂၃) ကဵု စၟတ်တ္ၚဲ (၂၄) ပ္ဍဲပယျဵုသေံမွဲဒၞာဲရ။ ပ္ဍဲကောံဓရီုဏံ မ္ၚးနူအကာဲအရာကဏ္ဍ ပရေၚ်ထတ်ယိုတ် လက်ထက်ကံၚ်ဇြဳပၞာန်ဏံ ဒးဒှ်ကၠုၚ်ဓဝိၚ်ဂှ် ကၠောန်သ္ပသဳကၠဳလဝ် ပရေၚ်သ္ၚဳဂၠိပ် လၟေၚ်ကမၠောန်ဆက်ကၠောန်အာအဓာန်ဂတတေံတုဲ အာတ်မိက်လဝ် ဇရေၚ်ဂကောံအလဵုအသဳ ကၟိန်ဍုၚ်နာနာ နွံ (၄) တၚ်ရ။
ပ္ဍဲပေါဲကောံဓရီုဂကောံတၠပညာဂဥုဲကၟိန်ဍုၚ်ဗၟာဂှ် ပရောပရာဒှ်သဳကၠဳလဝ်ကီု၊ အကာဲအရာကဏ္ဍပရေၚ် ထတ်ယိုတ် လက်ထက်ကံၚ်ဇြဳပၞာန်ကီု၊ ညံၚ်အရီုဗၚ်ဗ္စာရဏာပရေၚ်မၞိဟ် ဂွံစိုပ်ညးဍုၚ်ကွာန် နွံဒၟံၚ်ပၟိက်ဍာံဍာံဂှ် အရာလဵု တာဒၞာဒၟံၚ်ရောကီု။ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု သ္ကိုပ်စၞောန်ပ္ညုၚ် ဂကောံတၠပညာဂဥုဲကၟိန်ဍုၚ်ဗၟာ သဝ်နေထူရ။
-ကၠာအိုတ်ဏံ ပ္ဍဲကောံဓရီုဂကောံတၠပညာဂဥုဲ မရနုက်ကဵု (၁၁)ဝါဂှ် အာတ်မိက်ဗတိုက်ဖ္အောဝ်လဝ် ဂကောံအလဵုအသဳကၟိန်ဍုၚ်နာနာဂှ် ဂွံဆဵုကေတ်လဝ်ရ၊ တၚ်လဵုအာတ်မိက် ဗတိုက်ဖ္အောဝ်လဝ် အဓိကရော ဟီုထ္ၜးညိ။
တၚ်ပိုဲအာတ်မိက်လဝ် ဂကောံအလဵုအသဳကဵု ဂကောံကၟိန်ဍုၚ်နာနာဂှ် နွံရ။ မုက်ဂၞန်မွဲဂှ်တှ်ေ အစဳဇန်အရီုဗၚ်ဗ္စာရဏာပရေၚ်မၞိဟ်ဂှ်တှ်ေ သွက်ဂွံရေၚ်တၠုၚ်ကဵုပြဟ်ဟ် နဲဂွံပြဟ်အိုတ်ဂှ် ပိုဲအာတ်မိက်လဝ် အလဵုအသဳကၟိန်ဍုၚ်နာနာ ကဵုဂကောံကၟိန်ဍုၚ်နာနာတအ်ရ။ အစဳဇန်အရီုဗၚ်ဗ္စာရဏာပရေၚ်မၞိဟ်ဂှ် ညံၚ်ဂွံစိုပ်ညးဍုၚ်ကွာန် ဗွဲမစိုပ်တရဴဂှ် မ္ၚးနူဂကောံပရေၚ်ထတ်ယိုတ် ပ္ဍဲဒေသတအ်ဂှ် ပံၚ်တောဲရေၚ်တၠုၚ်ကဵု ဂကောံနွံဒေသတအ်တုဲ ညံၚ်ဂွံစိုပ် ညးဍုၚ်ကွာန်တအ်မာန် သွက်ဂွံရေၚ်တၠုၚ်ကဵု ဗွဲမစိုပ်တရဴဂှ် ပိုဲဗတိုက်ဖ္အောဝ်လဝ်ရ။ ညးဍုၚ်ကွာန်ပိုဲဂှ် အတိုၚ်တီဒၟံၚ်ညးသ္ကအ်ဂှ်ရ မၞိဟ်ဒးဒုၚ်ဒၟံၚ် သၟဝ်ပရေၚ်ကြံကြဓဇန်ကြာန်စကစတအ်ဂှ် နွံဒၟံၚ်ရ။ တၚ်နွံပၟိက် ဆေၚ်စပ်ကဵုပရေၚ်ထတ်ယိုတ်ညးဍုၚ်ကွာန်တအ်ဂှ် ညံၚ်ဂွံက္လိဂွံအရီုဗၚ် ဗွဲမဂီုကၠီုမာန် အာတ်မိက်လဝ် ကၟိန်ဍုၚ်နာနာနွံရ။
သီကေတ်လဝ်အဝဵုဟွံဗဗွဲဓဝ်တုဲ နူစကစရပ်ဒက်လဝ် ကောန်ထံၚ်ပရေၚ်ဍုၚ်ကွာန်တအ်ဖအိုတ်ဂှ် သွက်ဂွံဗလးကဵုလွာဲလၟုဟ် ညံၚ်ဂွံပ္တိတ်ကဵုဇြဟတ် နဲကဲဂၠံၚ်တရဴစုၚ် ပိုဲဗတိုက်ဖ္အောဝ်လဝ် နွံရ။ ကံၚ်ဇြဳပၞာန်သီကေတ်လဝ်အဝဵု ဟွံလုပ်ကဵုသၞောဝ်ဂှ် ညံၚ်ဟွံဂွံသ္ပစၟတ်သမ္တီ နဒဒှ်အလဵုအသဳလုပ်သၞောဝ် ဗတိုက်ဖ္အောဝ်အာတ်မိက်လဝ် နွံရ။ တၠပညာဂဥုဲကောန်ဍုၚ်ဗၟာတအ်ဂှ် ပ္ဍဲကာလကၠုၚ်စိုပ်ဂတဏံ သွက်မူဝါဒပရေၚ်ထတ်ယိုတ် နကဵုသၞောတ်ပရေၚ်ထတ်ယိုတ် ကိတ်ညဳကဵု သၞောတ်ဖေတ်ဒရေဝ် ဂွံမံက်ပြာကတ်ကၠုၚ်ဂှ် ဂကောံပရေၚ်ထတ်ယိုတ်ကောန်ဍုၚ်အရၚ်ကဵု ဂကောံအလဵုအသဳကၟိန်ဍုၚ်နာနာ ပ္တိတ်အာဇြဟတ်မွဲကရောံ မွဲစွံကဵုညးဍုၚ်ကွာန်တအ်တုဲ သွက်ဂွံဘိုၚ်ကၠောန်ရေၚ်တၠုၚ်ကဵုဂှ် ပိုဲဗတိုက်ဖ္အောဝ် အာတ်မိက်လဝ်ရ။
-ပ္ဍဲတၚ်လလောၚ်တြးဂှ် ဟိုတ်နူသၞောတ်တၠအဝဵုပၞာန်တုဲ ပြသၞာပရေၚ်ထတ်ယိုတ် ပ္ဍဲကၟိန်ဍုၚ်ဗၟာ စိုပ်ကၠုၚ်ဒၟံၚ်အကာဲအအရာ ထေက်ကဵုဒးဒှ်ဓဝိၚ်ရဂှ် ဓမံက်ထ္ၜးလဝ်ရ။ အကာဲအရာဒးဒှ်ဓဝိၚ်ဂှ် ဒှ်အကာဲအရာဗီုလဵုရော။
သၞောတ်ပရေၚ်ထတ်ယိုတ်ကၟိန်ဍုၚ်ဗၟာ နူတံတေံရ ပါဲနူပရေၚ်တဴတက်ဇၞော်ကဵုဇြဟတ်ဟၟဲဂှ် သီုကဵုအခက်ခုဲ နွံဒၟံၚ်ဗွဲမဂၠိုၚ်ဂှ်ရ တအ်ဏံဂှ် မွဲဂကူ။ တုဲပၠန် သ္ကုတ်လကြဴနူဒပ်ပၞာန်သီအဝဵုတုဲဏံဂှ်တှ်ေ သမ္တီဒးသီုညးဖအိုတ်ဏောၚ်ထေၚ်။ ပ္ဍဲကဏ္ဍပရေၚ်ထတ်ယိုတ်ဂှ် ညးယိုက်ဝန်ပရေၚ်ထတ်ယိုတ် ဗွဲမဂၠိုၚ် ရေၚ်တၠုၚ်ကဵုဒၟံၚ် ပ္ဍဲကဏ္ဍပရေၚ်ထတ်ယိုတ်တအ်ဂှ် ဟွံဒုၚ်တဲ ပရေၚ်ဒပ်ပၞာန်သီအဝဵုတုဲ တိတ်ထောံနူကဵုကမၠောန်ဇကု သ္ပကၠုၚ် CDM တုဲ အကာဲအရာကလေၚ်ပၠန်ဂတး ဒစဵုဒစကဵုဒပ်ပၞာန်ပၠန်ဂှ် ကောန်ကမၠောန်ပရေၚ်ထတ်ယိုတ် ဒှ်ဒၟံၚ်ဗွဲဂၠိုၚ်ဂှ် အတိုၚ်တီဒၟံၚ် ညးသ္အအ်ဂှ်ရ။ အရာတအ်ဏံလေဝ် ဒှ်အကာဲအရာဒးဒှ်ဓဝိၚ်ရ။ ပူဂဵုရေၚ်တၠုၚ်ကဵုဒၟံၚ်ပရေၚ်ထတ်ယိုတ် အောန်ယအ်စှ်ေကၠုၚ်။ ယဝ်ရဟၟဲပုဟ် ဟီုတှ်ေ အအကာဲအရာဂွံရေၚ်တၠုၚ်ကဵု ကဏ္ဍပရေၚ်ထတ်ယိုတ်ခိုဟ်ဟ်ဂှ် နွံဟွံသေၚ်ရပုဟ်။ ပ္ဍဲကဵုဒေသကောန်ဍုၚ်အရၚ်ဂှ် နူကဵုဒပ်ပၞာန် ကၠုၚ်ဂြာတ်ထောံဖျေံဗုမ် ပ္ဍဲရုၚ်ဂဥုဲဂှ် နွံဒၟံၚ်ဗွဲမဂၠိုၚ်ရ။
ပ္ဍဲဒေသတအ်ဂှ် နူတံဝါဒိတေံလေဝ် သၞောတ်ပရေၚ်ထတ်ယိုတ် အကာဲအရာပရေံဒၟံၚ်ဂှ် ကၠုၚ်ဂြာတ် ထောံဖျေံဗုမ် နူကဵုဗလးအာကာသတုဲ အကာဲအရာဖန်ဗဒှ်ဏာလဝ်ဏံ မွဲလ္ပာ်တေံဂှ် ညးဍုၚ်ကွာန်ဒုၚ် ရေၚ်တၠုၚ်ဒၟံၚ်ပရေၚ်ထတ်ယိုတ်တအ်ဂှ် အရာတအ်ဏံ ဒှ်အာအကာဲအရာ ဒုၚ်တဲဟွံမာန်လေဝ် ဒှ်ကၠုၚ်ရ။ ညးယိုက်ဝန်ပရေၚ်ထတ်ယိုတ်ဗွဲမဂၠိုၚ်ဂှ် နုက်တိတ်ထောံနူကမၠောန်ဇကု ဒစဵုဒစးကဵုတၠအဝဵုပၞာန်တုဲ သ္ပကၠုၚ် CDM လေဝ် နွံရ။ ရံၚ်ကဵုအကာဲအရာၜါသာ်ဏံတုဲ ယဝ်ရဒးဟီုတှ်ေ အကာဲအရာပရေၚ်ထတ်ယိုတ်ပိုဲဂှ် ထ္ၜးဒၟံၚ်အကာဲအရာ ပရေံပရေံရ။
-အရီုဗၚ်ဗ္စာရဏာပရေၚ်မၞိဟ် ပ္ဍဲဒေသ စိုပ်ဒၟံၚ်ဇရေၚ်ညးဍုၚ်ကွာန် နွံပၟိက်ဒၟံၚ်တအ် စိုပ်ဒၟံၚ်တရဴကီုဟာ။ စပ်ကဵုအရီုဗၚ်တအ်ဏံတုဲ မုညးဍုၚ်ကွာန်တအ် ဒးဆဵုဂဗဒၟံၚ်ကဵု အခက်ခုဲ ဗီုပြၚ်လဵု နွံရော။ တုဲပၠန် နကဵုညးဍုၚ်ကွာန်တအ် ပရေၚ်ရံၚ်စံၚ်မၚ်မွဲပရေၚ်ထတ်ယိုတ် ၜိုတ်ကဆံၚ်လဵု နွံဒၟံၚ်ပၟိက်ရော။
ပိုဲတအ်ဂှ် ဒးရံၚ်အာသွာၚ်စုၚ်ရလေဝ်။ အကာဲအရာပရေၚ်ဍုၚ်ကွာန်ပ္ဍဲဍုၚ်ဂှ် ယှုက်ထုဲဒၟံၚ်ကွေံကွေံ။ သွက်အရီုဗၚ်ဗ္စာရဏာပရေၚ်မၞိဟ် ဂွံစိုပ်မာန်ဟီုဂှ် အခက်ခုဲ နွံဗွဲမဂၠိုၚ်ဏောၚ် ပိုဲပတှ်ေလဝ်ရ။ အရီုဗၚ် ဗ္စာရဏာပရေၚ်မၞိဟ် နွံဒေသတအ်ဂှ် ဂွံလဝ်အရီုဗၚ်ဍာံဍာံ၊ ဟွံဂွံလဝ်ပုဟ်ဟာဟီုဂှ် ပိုဲတတ်ကၠောံ ပယျဵုတုဲ ဂၠံၚ်တရဴဂွံရီုဗၚ်မာန်ဂှ် ဒှ်ကိစ္စဒးပံၚ်တောဲရ။ အတိုၚ်ဗီုအဲဟီုလဝ်နူကၠာဂှ်ရ အရီုဗၚ်ကၟိန်ဍုၚ် နာနာလေဝ် ကၟိန်ဍုၚ်စုက်လုက်ဒၟံၚ်ကဵု ကၟိန်ဍုၚ်ဗၟာဇေတ်တ်ဂှ် နွံဒၟံၚ်။ သေံ၊ ကြုက်၊ အိန္ဒိယ၊ နူကဵုဍုၚ် တအ်ဏံ သွက်ဂွံပံက်ကဵုဂၠံၚ်ဍာန်ဂှ် ပၟိက်နွံဒၟံၚ်ရ။ ပံက်ကဵုဂၠံၚ်ဍာန်မှ အရီုဗၚ်ဗ္စာရဏာပရေၚ်မၞိဟ်တအ် ဂွံစိုပ်ညးဍုၚ်ကွာန်တအ်ရ။
ပရေၚ်ပံၚ်တောဲကဵု ဂကောံပရေၚ်ထတ်ယိုတ်၊ ဂကောံပရေၚ်မၞိဟ် နွံဒေသဂှ်ဟၟဲမွဲသာ် အရီုဗၚ်ဗ္စာရဏာ ပရေၚ် မၞိဟ်ဗီုဟီုနူကၠၚ်ဏံ ဂွံစိုပ်ညးဍုၚ်ကွာန်တအ် ဍာံဍာံ ဒှ်မာန် ဟွံမာန်ဂှ် တုဲဒၟံၚ်ကဵု လ္တူအကာဲအရာ ဏံရ။ ပံၚ်တောဲကဵု ဂကောံညးဒေသတအ်တုဲ ဓမံက်အာရုပ်ရဴမာန်မှ အရီုဗၚ်ဗ္စာရဏာ ပရေၚ်မၞိဟ်တအ် ဂွံစိုပ်ဇရေၚ်ညးဍုၚ်ကွာန်တအ်ရ။ ညးတအ်ဂှ် ဒှ်ဂကောံနွံဒၟံၚ်ပ္ဍဲဒေသဂှ် ဗွဝ်ကဵုစှ်ော် သၞာံပြၚ်ဒၟံၚ်တုဲတုဲရ။ တၚ်ခက်ခုဲညးဍုၚ်ကွာန်တအ်လေဝ် ဒှ်ညးတီကၠိုဟ်လဝ်ပေၚ်ၚ်ရ။ ညံၚ်ဂွံစိုပ် ဒၞာဲနွံဒၟံၚ်ပၟိက်ဍာံဍာံဂှ် ပရေၚ် ပံၚ်တောဲကဵု ညးတအ်ဟၟဲမွဲသာ် ဟွံပံၚ်တောဲကဵုညးတအ်တုဲ ဂွံစိုပ်ဒၞာဲနွံဒၟံၚ်ပၟိက်ဍာံဍာံ မာန်ဟွံ သေၚ်ရ။ သွက်ဂွံပံၚ်တောဲကဵု ဂကောံညးတအ်ဂှ် ပၟိက်ဇၞော်ဒၟံၚ်ရ။
-အလန်လကြဴအိုတ်ဏံ ညးဍုၚ်ကွာန် ပ္ဍဲတိဍာ် KNU ဗွဲတၟေၚ်တှ်ေ ညးဍုၚ်ကွာန်ပါဲဘဲပၞာန်တအ် အခိၚ်လၟုဟ်ပြဟ်ဟ်ဏံ ဒးဆဵုဂဗဒၟံၚ်ကဵုပြသၞာပရေၚ်ထတ်ယိုတ် ဗီုပြၚ်လဵုရော။ ဒးဆေၚ်မံၚ်မုက်ကဵုယဲလဵု အဓိကရော။ အခေါၚ်လွဳလွတ်ဂဥုဲ ဍိုက်က်ပေၚ်ၚ် ဂွံဒၟံၚ်ရဟာ။
အခိၚ်ကသီုဟီုတှ်ေ ပြသၞာပရေၚ်ထတ်ယိုတ်ဂှ် ပိုဲ မုဂွံဆဵုကေတ်ဂၠိုၚ်ရောတှ်ေ ဂၞဴလီုဂၞဴအာ။ ယဲပၞော်ယွီု။ ယဲဇွဟ် ပ္ဍဲသၞာံတုဲကၠုၚ် ပိပန်သၞာံတေံဂှ် အောန်ယအ်စှ်ေကၠုၚ်နွံရ။ ဆ္ဂးအကြာပွိုၚ် မွဲ၊ ၜါသၞာံဏံ သာတုဲဂွံဆဵုဂဗကၠုၚ်ယဲဇွဟ်ဂှ် နွံရ။ ဗွဲတၟေၚ်တှ်ေ ပ္ဍဲကာလဗြဲဏံ ယဲဇွဟ်ဂှ် က္ဍိုပ်ကလေၚ်စူတိုန်ကၠုၚ်ရ။ ဂဥုဲဇဗဂှ် ဟၟဲဍိုက်က်ပေၚ်ၚ်တုဲ အခိၚ်လၟုဟ်ဏံ သာပရေံကၠုၚ်ရ။
ပရေၚ်ဆက်စၠောံဂၠံၚ်ဍာန်လေဝ် ဝါတ်ဂါတ်ဒၟံၚ်။ ပရေၚ်ဂီုကၠီုလေဝ်ခက်ခုဲ။ သွာၚ်ရေၚ်တၠုၚ်ပရေၚ်ယိုတ် ဂှ် အကာဲအရာဒးသောၚ်ကလးဒၟံၚ်ဂှ် ဂွံအခေါၚ်လွဳလွတ်ဂဥုဲဟာ၊ ဟွံဂွံပုဟ်ဟာဂှ် ပ္ဍဲသ္ကုတ်လကြဴနူ ဒပ်ပၞာန်သီအဝဵုတုဲဏံ သာတုဲပရေံကၠုၚ်ဒၟံၚ်ရ။ ဟွံက္လိဂွံ ပရေၚ်လွဳလွတ်ဂဥုဲ ဍိုက်က်ပေၚ်ၚ်ပုဟ်ဂှ် ပိုဲမိက်ဂွံဟီုရ။